تاۋەلسىزدىك كۇنى مەرەكەسىنە وراي جامبىل وبلىسىندا 28 نىسان اشىلدى. ونىڭ 12-ءسى كوپقاباتتى تۇرعىن ءۇي بولسا, 7 دارىگەرلىك امبۋلاتوريا, 4 بالاباقشا, 4 اۋىز سۋمەن قامتاماسىز ەتۋ جانە 1 كارىز جۇيەسى پايدالانۋعا بەرىلدى. اتالعان جۇمىستىڭ ءبارى مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىنداعى باسىم مىندەتتەردى ورىنداۋعا جانە حالىقتىڭ تۇرمىس ساپاسىن ارتتىرۋعا نەگىزدەلگەن.
جولداۋدىڭ ءومىر سۇرۋگە جايلى ورتا قالىپتاستىرۋ باسىمدىعى بويىنشا ەلباسىنىڭ «بەس الەۋمەتتىك باستاماسىنىڭ» ءبىرىنشى باعىتى ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ» اياسىندا بىرقاتار جوبالار ىسكە اسىرىلۋدا. وعان مەرەكە اياسىندا پايدالانۋعا بەرىلگەن 12 كوپپاتەرلى تۇرعىن ءۇي دالەل بولا الادى. ونىڭ توعىزى تاراز قالاسىنىڭ سۇلەيمەنوۆ كوشەسىنىڭ سوڭىنداعى جاڭا №15, ال ەكەۋى «بايتەرەك» مولتەك اۋداندارىنان بەرىلدى. سونداي-اق, شۋ قالاسىنداعى «جەتىسۋ» تۇرعىن القابىنداعى 75 پاتەرلى كوپقاباتتى تۇرعىن ءۇي قايتا جوندەۋدەن ءوتتى.
بۇگىندە تاراز قالاسىنداعى قاجەتتى ينفراقۇرىلىممەن قامتاماسىز ەتىلگەن 462 گەكتار جەر تەلىمىندە جاڭا ەكى مولتەك اۋداندارىنىڭ قۇرىلىسى جۇرۋدە. اتالعان اۋدانداردا «7-20-25» باعدارلاماسى اياسىندا ۇسىنىلاتىن 480 كوپ قاباتتى جانە 969 جەكە تۇرعىن ءۇي قۇرىلىستارى باستالىپ, اعىمداعى جىلى 10 كوپپاتەرلى ءۇي (800 پاتەر), 2019 جىلى - 25 ءۇي (1 380 پاتەر) پايدالانۋعا تاپسىرىلۋ جوسپارلانعان. جالپى, قازىرگى كەزدە تاراز قالاسىنداعى 686 پاتەر باعدارلاما اياسىندا ازاماتتارعا ۇسىنىلۋدا.
ايتا كەتۋ كەرەك, №15 جاڭا مولتەك اۋدانىنداعى كوپپاتەرلى تۇرعىن ۇيلەردىڭ ءبىرىنشى قاباتتارىن ىسكەرلىك ورتاعا بەرۋ كوزدەلۋدە. وسىعان وراي وڭىردە ءتيىستى شارالار اتقارىلۋدا. وسىلايشا تۇرعىن ءۇي عيماراتتارىنىڭ سىرتقى اجارىن ارتتىرۋ جوسپارلانۋدا. جاڭا مولتەك اۋداننىڭ جوسپارى قايتا قارالىپ, وندا الداعى ۋاقىتتا وقۋشىلار, نەكە قيۋ, سالتانات سارايلارى, اكىمشىلىك عيماراتتار مەن الەۋمەتتىك نىساندار بوي كوتەرەتىن بولادى. حالىققا قىزمەت كورسەتۋ ورتالىعى, قوناقۇي, تاۋەلسىزدىك مونۋمەنتى, ۇلكەن ساۋدا-ويىن ساۋىق ورتالىعىنىڭ قۇرىلىستارىن جۇرگىزۋ جوسپاردا بار. «7-20-25» كرەديتتەۋ باعدارلاماسى اياسىندا اكىمدىك پەن قر ۇلتتىق بانكىنىڭ وبلىستىق فيليالى, باعدارلاماعا قاتىسۋشى بانكتەر اراسىندا بىرلەسكەن ءىس-قيمىل جوسپارى بەكىتىلگەن. يپوتەكالىق نەسيەنىڭ العاشقى جارناسىنىڭ 30 پايىزدان 20 پايىزعا تومەندەۋىنە بايلانىستى, پاتەر الۋعا مۇمكىندىگى بار ازاماتتاردىڭ سانى 3 ەسەگە ارتقان.
سونىمەن قاتار ەلباسى جولداۋىندا مەديتسينالىق قىزمەت ساپاسى حالىقتىڭ الەۋمەتتىك كوڭىل-كۇيىنىڭ اسا ماڭىزدى كومپونەنتى بولىپ سانالاتىنىڭ باسا ايتتى دەسەك, مەرەكە قارساڭىندا اشىلعان 28 نىساننىڭ 7-ءسى مەديتسينالىق مەكەمەلەر بولىپ وتىر. «اسىرەسە اۋىلدىق جەرلەردە العاشقى مەديتسينالىق-سانيتارلىق كومەكتىڭ قولجەتىمدى بولۋىن قامتاماسىز ەتۋ قاجەت. العاشقى مەديتسينالىق-سانيتارلىق كومەك كورسەتەتىن قىزمەتكەرلەردى ىنتالاندىرۋ ءۇشىن 2019 جىلدىڭ 1 قاڭتارىنان باستاپ اۋرۋلاردى ەمدەۋ ءىسىن باسقارۋدىڭ جاڭا تاسىلدەرىن ەنگىزگەن ۋچاسكەلىك مەديتسينا قىزمەتكەرلەرىنىڭ جالاقىسىن كەزەڭ-كەزەڭمەن 20 پايىزعا كوبەيتۋدى تاپسىرامىن», دەگەن بولاتىن مەملەكەت باسشىسى. وسى ورايدا وبلىس كولەمىندە حالىق دەنساۋلىعىنىڭ ساپاسىن ارتتىرۋ ماقساتىندا اۋقىمدى جۇمىستار جۇرگىزىلۋدە. جەكەمەنشىك سەكتوردى جۇمىلدىرا وتىرىپ, قارجىلاندىرۋ مەن باسقارۋدىڭ جاڭا ادىستەرى قولدانىلۋدا. مەديتسينالىق قىزمەت ساپاسىن ارتتىرۋ بويىنشا يننوۆاتسيالىق ءادىس-تاسىلدەرى ەنگىزىلىپ, جاڭا عيماراتتار مەن نىسانداردىڭ قۇرىلىسى جۇرگىزىلدى. تاۋەلسىزدىك كۇنى اشىلعان 7 مەديتسينالىق نىساننىڭ 2-ءى مەملەكەتتىك, 5-ءى مەملەكەتتىك-جەكەمەنشىك ارىپتەستىك اياسىندا بوي كوتەرگەن. ولار بايزاق اۋدانىنداعى كوكوزەك, جۋالى اۋدانىنداعى ەرتاي, قوشقاراتا, قورداي اۋدانىنداعى جاڭاتۇرمىس, ت.رىسقۇلوۆ اۋدانىنداعى ماماي جانە قايىڭدى, شۋ اۋدانىنداعى كوكقاينار, بايدىبەك اۋىلدارىندا ورنالاسقان. بۇل اشىلعان مەديتسينالىق مەكەمەلەر ارقىلى اۋىلدىق جەرلەردەگى العاشقى مەديتسينالىق كومەك كورسەتۋ قاجەتتىلىگى 84 پايىزعا قامتىلادى. جالپى بۇعان دەيىن وبلىستا 95 العاشقى مەديتسينالىق كومەك كورسەتۋ ۇيىمدارىنا عيمارات قاجەت بولاتىن.
بۇل بيۋدجەتتىك ينۆەستيتسيالىق جوبا رەتىندە جۇزەگە اسىرىلعاندا, وعان جالپى 6 567,6 ميلليون تەڭگە جانە 7 جىل ۋاقىت كەرەك بولاتىن. ال, مەملەكەتتىك-جەكەمەنشىك ارىپتەستىك اياسىندا سالۋ ارقىلى مەرزىمىن 3 جىلعا, جۇمسالاتىن قارجى كولەمى 2 376 ميلليون تەڭگەگە قىسقارتىلدى. ناقتىراق ايتقاندا, 4 جىل ۋاقىت جانە 4 192 ميلليون تەڭگە قارجى ۇنەمدەلىپ وتىر. ياعني, 95 نىساننىڭ 29-ى بيىل اشىلدى. وسى سەكىلدى 2019 جىلى 40, 2020 جىلى 25 نىسان بوي كوتەرەدى دەپ جوسپارلانۋدا.
ەلىمىزدىڭ تاۋەلسىزدىك كۇنىنە وراي جامبىل وبلىسىندا حالىقتىڭ تۇرعىن ءۇي مەن مەديتسينالىق مەكەمەلەرگە دەگەن قولجەتىمدىلىگىن ارتتىرۋعا ارنالعان بۇل نىسانداردان بولەك, جۇرتشىلىقتىڭ الەۋمەتتىك تۇرمىس ساپاسىن جاقسارتۋعا نەگىزدەلگەن مەكەمەلەر دە ەل يگىلىگىنە بەرىلدى. اتاپ ايتار بولساق, جامبىل اۋدانىنداعى توعىزتاراۋ اۋىلىنىڭ سۋمەن قامتاماسىز ەتۋ جۇيەسى ىسكە قوسىلسا, پريگورودنوە جانە قورداي اۋدانىنداعى اۋقاتتى اۋىلىنىڭ سۋمەن قامتاسىز ەتۋ جۇيەسى قايتا جاڭعىرتىلدى.
تالاس اۋدانىنداعى قىزىلاۋىت اۋىلىنىڭ ينجەنەرلىك كوممۋنيكاتسيالىق ينفراقۇرىلىمىن دامىتۋ جانە جايلاستىرۋ, شۋ اۋدانىنداعى تولە بي اۋىلىنىڭ كارىز جۇيەسىن قايتا جاڭعىرتۋ شارالارى اياقتالدى. قورداي اۋدانىنداعى 100 ورىندىق «ايارۋ», «ايسۇلتان», «سەنىم قورداي», «نۇرسيلا» جەكەمەنشىك بالاباقشالار ەسىگىن ايقارا اشتى. بۇل وبلىستاعى مەكتەپكە دەيىنگى تاربيەمەن قامتىلعان 3-6 جاستاعى بالالاردىڭ ۇلەسىن 98 پايىزعا جۋىقتاتتى. ال, كەلەر جىلى تاعى 29 بالاباقشا اشۋ ارقىلى 3-6 جاستاعى بالالاردى مەكتەپكە دەيىنگى تاربيەمەن 100 پايىز قامتۋ كوزدەلىپ وتىر.
سونىمەن قاتار وبلىستا بيىل ۆەتەريناريالىق پۋنكتتەردى تيپتىك ۇلگىدەگى عيماراتپەن قامتۋ بويىنشا دا اۋقىمدى جۇمىستار اتقارىلدى. ايتالىق, وتكەن جىلى وڭىردە نەبارى 22 ۆەتپۋنكت بولاتىن بولسا, اعىمداعى جىلى ولاردىڭ قاتارى 45-كە ارتىپ, جالپى سانى 71-گە جەتتى. بۇل دا جۇيەلى جۇمىستىڭ ناتيجەسى ەكەندىگى ءسوزسىز.
حاميت ەسامان,
«ەگەمەن قازاقستان»
جامبىل وبلىسى