بىرقاتار مينيسترلىكتەر مەن وڭىرلەردىڭ اكىمدەرى مەملەكەتتىك بيۋدجەتتىڭ ورىندالۋى تۋرالى باياندادى

قارجى ءمينيسترى ءا. سمايىلوۆ 11 ايدىڭ قورىتىندىسى بويىنشا مەملەكەتتىك بيۋدجەتتىڭ ورىندالۋى تۋرالى بايانداي وتىرىپ, مەملەكەتتىك بيۋدجەتتىڭ كىرىستەرى (ترانسفەرتتەردى ەسەپكە الماعاندا) جوسپاردان 102,6%-عا اسىرا ورىندالعانىن جەتكىزدى. بيۋدجەتكە 7,38 ترلن تەڭگە قارجى ءتۇستى. بۇل 2017 جىلعى كورسەتكىشتەن 232 ملرد تەڭگەگە كوپ. رەسپۋبليكالىق بيۋدجەت كىرىستەرىنىڭ جوسپارى 102,1%-عا جانە جەرگىلىكتى بيۋدجەتتەر 104%-عا ورىندالدى.

قارجى ءمينيسترى جۇرگىزىلگەن ءىس-شارالاردىڭ ناتيجەسىندە 2017 جىلدىڭ 11 ايىمەن سالىستىرعاندا بيۋدجەت قاراجاتتارىن يگەرۋ قارقىنى ءبىراز جاقسارعانىن اتاپ ءوتتى. مەملەكەتتىك بيۋدجەتتىڭ شىعىستارى 98%-عا يگەرىلسە, رەسپۋبليكالىق – 98,6%, جەرگىلىكتى بيۋدجەتتەر – 98,2% ورىندالعان.

قارجى مينيسترلىگىنىڭ دەرەكتەرىنە سايكەس, رەسپۋبليكالىق بيۋدجەتكە 5,3 ترلن تەڭگە كىرىس ءتۇستى, بۇل 2017 جىلدىڭ جىلدىق جوسپارىنان ارتىعىمەن ورىندالدى. شيكى مۇنايعا سالىناتىن ەكسپورتتىق كەدەن باجى جانە پايدالى قازبالاردى وندىرۋگە سالىناتىن سالىقتاردىڭ جىلدىق جوسپارى 109 ملرد تەڭگەگە جانە 38 ملرد تەڭگەگە اسىرا ورىندالدى.

كىرىستەردىڭ ءوسۋ قارقىنى 120% قۇراپ, بىلتىرعى جىلدىڭ وسىنداي كەزەڭىمەن سالىستىرعاندا بيۋدجەتكە 873 ملرد تەڭگە كوپ ءتۇستى. ولار نەگىزىنەن سالىق تۇسىمدەرىنىڭ ەسەبىنە كەلەدى.

«سالىقتاردىڭ وسۋىنە بىرىنشىدەن, ەكونوميكانىڭ جەكەلەگەن سالالارىنداعى تاۋارلار ءوندىرۋ مەن قىزمەتتتەر كورسەتۋ كولەمىنىڭ ۇلعايۋى اسەرىن تيگىزدى. ەكىنشىدەن, نەگىزگى ەكسپورتتىق پوزيتسيالار بويىنشا باعانىڭ جانە مۇنايدىڭ, اقش دوللارى باعامىنىڭ ورتاشا باعاسىنىڭ ءوسۋى دە سەبەپ بولدى. ۇشىنشىدەن, سالىقتىق جانە كەدەندىك اكىمشىلەندىرۋدىڭ جاقسارۋى», — دەپ ءا. سمايىلوۆ كىرىستەردىڭ, ونىڭ ىشىندە سالىقتاردىڭ اي سايىنعى ورىندالۋ سەرپىنىن ەسكەرە وتىرىپ, جىل سوڭىندا رەسپۋبليكالىق بيۋدجەتتىڭ تازا كىرىستەرى شامامەن 103%-عا ورىندالادى دەپ كۇتىلەتىنىن اتاپ ءوتتى.

رەسپۋبليكالىق بيۋدجەتتىڭ شىعىستارى وسى جىلدىڭ 11 ايىندا 8,7 ترلن تەڭگەنى نەمەسە 98,6% قۇرادى. قر قم دەرەكتەرىنە سايكەس, جىل قورىتىندىسى بويىنشا, رەسپۋبليكالىق بيۋدجەت شىعىستارىنىڭ ورىندالۋى 99,6% دەڭگەيىندە كۇتىلۋدە.

«ەسەپتى كەزەڭدە وڭىرلەرگە 698 ملرد تەڭگە ماقساتتى ترانسفەرتتەر ءبولىندى. 668 ملرد تەڭگە نەمەسە 95,6% جەرگىلىكتى دەڭگەيدە يگەرىلدى. 30 ملرد تەڭگە ورىندالمادى. ونىڭ 2 ملرد تەڭگەسى – ۇنەمدەۋ سوماسى. 28 ملرد تەڭگە يگەرىلمەدى. بۇل وتكەن جىلدىڭ 11 ايىنداعى كورسەتكىشتەن 34 ملرد تەڭگەگە تومەن», — دەدى ءا. سمايىلوۆ.

جاقىندا جۇرگىزىلگەن بيۋدجەت تۇزەتۋىندە 8 ملرد تەڭگەگە ماقساتتى ترانسفەرتتەردىڭ كولەمى قىسقارتىلدى. 1,8 ملرد تەڭگە وڭىرلەر اراسىندا قايتا ءبولىندى. قارجى ءمينيسترى بولىنگەن ترانسفەرتتەردىڭ جەرگىلىكتى ورگاندارمەن تولىق يگەرىلۋىنە بارلىق جاعداي جاسالعانىن ايتىپ ءوتتى.

بيۋدجەتتىڭ قاراجاتتارىنىڭ جۇمسالۋ بارىسىن باقىلاۋ تۋرالى بايانداي وتىرىپ, ءا. سمايىلوۆ اتالعان ماسەلە تۇراقتى باقىلاۋعا الىنعانىن اتاپ ءوتتى. 11 ايدىڭ ىشىندە 2887 اۋديتورلىق تەكسەرىستەر جۇرگىزىلدى. بيۋدجەت قاراجاتىنىڭ قامتىلعان سوماسى 1,5 ترلن تەڭگەنى قۇرادى. 155 ملرد تەڭگەگە قارجىلىق بۇزۋشىلىقتار انىقتالدى. بۇل 2017 جىلدىڭ سايكەس كەزەڭىمەن سالىستىرعاندا 60%-كە تومەن. تەكسەرۋ كەزىندە اتقارىلعان جۇمىس, كورسەتىلگەن قىزمەت, تاۋاردى جەتكىزىپ بەرۋمەن, بيۋدجەتكە قايتارۋمەن, ەسەپتە كورسەتۋ جولىمەن 134 ملرد تەڭگەگە بۇزۋشىلىقتار جويىلدى. اۋديت وبەكتىلەرىنە 2243 ۇسىنىس جىبەرىلدى. ونىڭ 1395 ورىندالدى.

قورىتىندىلاي كەلە, ءا. سمايىلوۆ بارلىق اكىمشىلەرگە 2019 جىلدىڭ بيۋدجەتىنە مەملەكەتتىك ساتىپ الۋلاردىڭ الدىن الا جوسپارلارىن بەكىتۋ جانە ءتيىستى كونكۋرستاردى جاريالاۋدى باستاۋ ۇسىنىلعانىن اتاپ ءوتتى. قر قم سوڭعى دەرەكتەرىنە سايكەس, مەملەكەتتىك ساتىپ الۋلار پورتالىندا 5 ترلن تەڭگەگە ساتىپ الۋلار جاريالانعان. ونىڭ ىشىندە, اشىق كونكۋرس تۇرىندە — 3,4 ترلن تەڭگەگە.

«وسى جۇمىس قارجى مينيسترلىگىنىڭ باقىلاۋىنا الىنعان. ەسەپتى كەزەڭنىڭ ناتيجەسى بويىنشا 2018 جىلى رەسپۋبليكالىق بيۋدجەت كىرىستەرى 103%-عا, شىعىستار – 99,6%-عا ورىندالادى دەپ كۇتىلۋدە», — دەپ تۇيىندەپ ءا. سمايىلوۆ, كەلەسى قارجى جىلىنا اۋىساتىن كاسسالىق قالدىقتار شامامەن 200 ملرد تەڭگەنى قۇرايتىنىن, بۇل سوما جاڭا قارجى جىلىنىڭ شىعىستارىن ۋاقىتىلى جانە ۇزدىكسىز قارجىلاندىرۋعا مۇمكىندىك بەرەتىنىن اتاپ ءوتتى.

وتىرىس بارىسىندا وڭىرلەردە بولىنگەن قاراجاتتى يگەرۋدى قامتاماسىز ەتۋ بويىنشا قابىلدانىپ جاتقان شارالار تۋرالى ماڭعىستاۋ وبلىسىنىڭ اكىمى ە. توعجانوۆ, تۇركىستان وبلىسىنىڭ اكىمى ج. تۇيمەباەۆ, قىزىلوردا وبلىسىنىڭ اكىمى ق. كوشەرباەۆ, استانا قالاسىنىڭ اكىمى ب. سۇلتانوۆ, سونىمەن قاتار الماتى وبلىسى اكىمىنىڭ ءبىرىنشى ورىنباسارى ل. تۇرلاشوۆ, قاراعاندى وبلىسى اكىمىنىڭ ورىنباسارى س. شايداروۆ تىڭدالدى. جىل سوڭىنا دەيىن بولىنگەن بيۋدجەت قاراجاتىن ساپالى يگەرۋ بويىنشا جۇرگىزىلىپ جاتقان جۇمىستار تۋرالى پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ءو. شوكەەۆ, قورعانىس ءمينيسترى ن. ەرمەكباەۆ, ىشكى ىستەر ءمينيسترى ق. قاسىموۆ, ءبىلىم ءمينيسترى ە. ساعاديەۆ, مادەنيەت جانە سپورت ءمينيسترى ا. مۇحامەدي ۇلى باياندادى.