بەلگىلى عالىم, ۇلتتىق عىلىم اكادەمياسىنىڭ اكادەميگى عابدوللا قۇلقىباەۆ ءوز سالاسىنىڭ بەلگىلى مامانى بولۋىمەن قاتار, ۇلتتىڭ رۋحاني دۇنيەسىنە دە جەتە ءمان بەرىپ جۇرەتىن ەدى. قازىرگى تاۋەلسىزدىگىمىز تۋرالى ول كىسىنىڭ ارتىنا قالدىرعان شاعىن دۇنيەسىنەن الار تاعىلىم از بولماسا كەرەك. ۇلىستىڭ ۇلى كۇنى اتالىپ ءوتىپ جاتقان تۇستا ارامىزدا جوق اكادەميكتىڭ ارحيۆىندەگى سول دۇنيەسىن گازەت وقىرماندارىنا ۇسىنۋدى ءجون كوردىك.
بەلگىلى عالىم, ۇلتتىق عىلىم اكادەمياسىنىڭ اكادەميگى عابدوللا قۇلقىباەۆ ءوز سالاسىنىڭ بەلگىلى مامانى بولۋىمەن قاتار, ۇلتتىڭ رۋحاني دۇنيەسىنە دە جەتە ءمان بەرىپ جۇرەتىن ەدى. قازىرگى تاۋەلسىزدىگىمىز تۋرالى ول كىسىنىڭ ارتىنا قالدىرعان شاعىن دۇنيەسىنەن الار تاعىلىم از بولماسا كەرەك. ۇلىستىڭ ۇلى كۇنى اتالىپ ءوتىپ جاتقان تۇستا ارامىزدا جوق اكادەميكتىڭ ارحيۆىندەگى سول دۇنيەسىن گازەت وقىرماندارىنا ۇسىنۋدى ءجون كوردىك.
عاسىرلار بويى اڭساعان تاۋەلسىز ەل بولۋ ارمانى حح عاسىردىڭ سوڭىندا عانا جۇزەگە استى. ەندىگى جەردە حالقىمىزدىڭ ساناسىنا تاۋەلسىزدىكتىڭ نەگىزگى جەتىستىكتەرىن بارىنشا ءسىڭىرىپ, ولاردىڭ بويىندا پاتريوتتىق, ەلدىك سەزىمدەرىن ورنىقتىرۋ ۋاقىت العا تارتىپ وتىرعان مىندەت بولىپ تابىلادى.
قازىرگى كەزدە اتقارىلاتىن بارلىق شارالار تاۋەلسىزدىكتىڭ ساياسي قۇندىلىقتارىن ءار قازاقتىڭ, ءاربىر قازاقستاندىقتىڭ وي-سانا تاۋەلسىزدىگىنە ۇلاستىرۋ مىندەتىنە قىزمەت ەتۋى ءتيىس. وسىلاي بولعان كۇندە عانا ەلىمىزدىڭ ساياسي تاۋەلسىزدىگى ءوزىنىڭ تولىققاندى بەينەسىنە يە بولىپ, تاريحي بەرىكتىككە جەتە الماق. بۇلاي دەيتىنىمىز, ءبىز بارلىق تمد ەلدەرى ءتارىزدى توتاليتارلىق جۇيە مەن كەڭەستىك يدەولوگيا جورگەگىنەن شىققان ەلمىز. ونىڭ تابىن سانادان, ويلاۋ جۇيەمىزدەن ىعىستىرىپ شىعارۋ وڭاي شارۋا ەمەس.
ارينە, وي-سانا تاۋەلسىزدىگى جولىندا قىرۋار ءىس اتقارىلىپ جاتقانى بەلگىلى. حالقىمىز ا.بايتۇرسىنوۆ, م.دۋلاتوۆ, ءا.بوكەيحانوۆ, م.شوقاي, ج.ايماۋىتوۆ, م.جۇماباەۆ, ح.دوسمۇحامەدوۆ سياقتى ارىستارىمىزدىڭ شىعارماشىلىعىمەن قايتا قاۋىشىپ, جاڭا تۇرعىدان قابىل الدى. قازىرگى كەزدە كەڭەستىك زاماندا حالقىمىزعا جاسالعان ساياسي جانە يدەولوگيالىق گەنوتسيدتىڭ نەشە ءتۇرلى سۇمدىقتارىنا كوز جەتتى. مەملەكەتتىگىمىزدىڭ ىرگەتاسىن قالاپ, قابىرعاسىن بەكىتۋگە ۇمتىلعان ءاز تاۋكە, ەسىم, قاسىم, ءاز جانىبەك, ۇلى ابىلاي ءتارىزدى حاندارىمىزدىڭ بولعانىن, قانجىعالى بوگەنباي, قاراكەرەي قابانباي, شاپىراشتى ناۋرىزباي سىندى ەلىن, جەرىن قاسىق قانى قالعانشا قورعاعان قولباسشىلارىمىزدىڭ بولعانىن, تولە بي, قاز داۋىستى قازىبەك بي, ايتەكە بي سەكىلدى الەمدىك ورەدەگى اقىلمان دانىشپاندارىمىزدىڭ بولعانىن, قازتۋعان, بۇقار, دوسپامبەت, شالكيىزدەي عاجايىپ جىراۋلارىمىزدىڭ بولعانىن ءبىلىپ قانا قويماي, ولاردىڭ ۇستانىمدارىن كۇندەلىكتى ومىرىمىزدە باسشىلىققا الاتىن بولدىق.
رەسپۋبليكا پرەزيدەنتى نۇرسۇلتان ءابىش ۇلى نازارباەۆ قازاقستان حالىقتارى اسسامبلەياسىنىڭ كەزەكتى ءبىر سەسسياسىندا سويلەگەن سوزىندە يتاليان ساياساتشىسى كاۆۋردىڭ ءحىح عاسىردا ايتقان سوزدەرىن وزىمىزگە بەيىمدەي كەلىپ, مىناداي وي ءتۇيىپ ەدى: «ءبىز قازاقستاندى سومدادىق, ەندى قازاقستاندىقتاردى سومدايىقشى».
مۇنىڭ ءوزى جاي ايتىلعان ءسوز بولماسا كەرەك, ونىڭ ءمانى وتە تەرەڭ. ءبىز تاۋەلسىز قازاقستاندى ورناتتىق, ءوركەندەتە بەرەمىز, الايدا وي-سانا تاۋەلسىزدىگىمىزدى ورنىقتىرا الدىق پا؟
كوزقاراستىڭ, تاريحي زەردەنىڭ قازىرگى زاماندىق بەتبۇرىس جاساۋىنا م.اۋەزوۆتىڭ, ءى.ەسەنبەرليننىڭ, م.ماعاۋيننىڭ, ق.ءجۇمادىلوۆتىڭ, س.سماتاەۆتىڭ جانە باسقا جازۋشىلار شىعارمالارىنىڭ كوپ اسەرى بولدى دەسەم, ارتىق ايتقاندىق ەمەس. كورنەكتى عالىمدارىمىز ءا.مارعۇلان, م.قوزىباەۆ, و.ىسماعۇلوۆ, ك.بايپاقوۆتىڭ تاريحي زەرتتەۋلەرى سانا توڭكەرىسىنە ۇمتىلىسقا سەپتىگىن تيگىزگەنىن اتاپ ايتقان ءجون. حالقىمىزدىڭ تاريحي ساناسىن وياتىپ, تاۋەلسىز ويلارىنىڭ ورنىعا ءتۇسۋىنە ايرىقشا اسەر ەتكەن ەڭبەك – نۇرسۇلتان نازارباەۆتىڭ «تاريح تولقىنىندا» بولعاندىعى بارشامىزعا بەلگىلى.
بۇگىندە ءبىز ۇلكەن ساياساتتان باستاپ, شارۋاشىلىقتىڭ, رۋحانياتتىڭ قاي سالاسىندا بولسىن دەربەس ءىس-قيمىل جاساي الامىز. سونىمەن بىرگە ەلباسى ۇستانعان مەملەكەتتىك ساياساتىمىزعا سايكەس قازاقستاننىڭ باتىسپەن دە, شىعىسپەن دە, الىس جانە جاقىن شەت ەلدەرمەن دە ارا-قاتىناسىن نىقتاپ, تەڭ دارەجەدە بايلانىس ورناتىپ وتىرمىز. وسىنىڭ ءبارى بىزگە تاۋەلسىزدىك بەرگەن ءمۇمكىندىكتەر. سوندىقتان دا ونىڭ ءمان-ماڭىزىن ءوزىمىز عانا ءبىلىپ قويماي, سىرتتاعىلاردىڭ بارىنە دە بىلگىزۋگە ءتيىسپىز.
تاۋەلسىزدىك – ۇلى ۇعىم. ونى قاستەرلەۋگە ۇيرەتۋ, داعدىلاندىرۋ, ادام بويىنداعى باستى قاسيەتكە اينالدىرۋ – ارقايسىمىزدىڭ پارىزىمىز. تاۋەلسىزدىكتى ۇلىقتاۋ – ونى نىعايتۋ. ەندەشە ءىسپەن, مىقتى ەكونوميكامىزبەن نىعايتۋ – بارشامىزدىڭ مىندەتىمىز.