بۇگىن ۇلتتىق اكادەميالىق كىتاپحانادا بەلگىلى قالامگەر, قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى, اقىن, جازۋشى, پۋبليتسيست ەرعازى راحيموۆتىڭ 80 جىلدىعىنا ارنالعان ادەبي-تانىمدىق كەش ءوتتى.
ادەبي جيىننىڭ ماقساتى – قارىمدى قالامگەردىڭ ءومىرى مەن شىعارماشىلىعىن جۇرت جادىندا جاڭعىرتۋ, وسكەلەڭ ۇرپاققا ناسيحاتتاۋ بولدى.
اتالمىش كەشتى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قازاق ادەبيەتى كافەدراسى جانە قازاقستان جازۋشىلار وداعى ۇيىمداستىردى.
باسقوسۋعا ۇعا اكادەميگى س.قاسقاباسوۆ, قر مەملەكەتتىك سىيلىعىنىڭ لاۋرەاتى, اقىن ن.ايت ۇلى, فيلولوگيا عىلىمدارىنىڭ دوكتورلارى, پروفەسسورلار س.نەگيموۆ, ق.الپىسباەۆ, ر.تۇرىسبەك, بەلگىلى جازۋشىلار ت.ءابدىرايىم قاتىسىپ, ەرعازى راحيموۆ تۋرالى ەستەلىكتەرىمەن ءبولىستى. سونداي-اق, شارا بارىسىندا بەلگىلى ءانشى تۇرسىنعازى راحيموۆتىڭ «اياگوز», «اقبوكەن» سىندى اۋەزدى اندەرى ورىندالدى.
سونىمەن قوسا ەرعازى راحيموۆتىڭ 80 جىلدىق مەرەيتويىنا ارنايى وتكىزىلگەن ءمۇشايرانىڭ دا قورىتىنداسى جاريالاندى. «قازىر قازاق پوەزياسى تۋرالى ءارتۇرلى پىكىرلەر ايتىلىپ جاتادى. بىراق وسى مۇشايراعا كەلىپ تۇسكەن ولەڭدەردەن بايقاعانىم ءبىزدىڭ ادەبيەتىمىزدە تەگەۋرىندى جاس اقىندار ءوسىپ كەلەدى. ەرعازى سياقتى اقىندارىڭ ءىزباسارلارى جەتىلىپ كەلەدى», دەدى نەسىپبەك ايت ۇلى. قازىلار القاسىنىڭ شەشىمى بويىنشا باس جۇلدە نۇربول مۇراتبەككە, 1 ورىن قازبەك بايجۇمانعا, 2 ورىن ورازاي جەڭىس ۇلى مەن قابيدەن قۋانىشباي ۇلىنا, 3 ورىن ەدىلبەك دۇيسەن مەن اسىلان تىلەگەنگە بۇيىردى. ىنتالاندىرۋ سىيلىقتارىنا ۇمىتبەك باعدات ۇلى مەن ەرجان جۇمابەك لايىق دەپ تانىلدى.
ەرعازى اققازى ۇلىنىڭ ليريكالىق ولەڭدەرى, كوركەم وچەركتەرى مەن قىسقا اڭگىمەلەرى قازاق وقىرمانىنا كەڭىنەن تانىس. «وكپەتى ورەندەرى», «مۇڭسىزبايدىڭ مۇراگەرلەرى», ء«سۇرى قار», «تەنتەك كەلىن», «تەرىسايرىق» اڭگىمەلەر مەن پوۆەستەر جيناقتارى, «زەينەل كۇيى», «جىرلايدى جۇرەك», «ىمىرت پەن قوبىز» ولەڭدەر مەن داستاندار جيناقتارى ءار جىلدارى جارىق كورگەن.
باعاشار تۇرسىنباي ۇلى,
«ەگەمەن قازاقستان»