پارلامەنت سەناتىنىڭ توراعاسى قاسىم-جومارت توقاەۆ وزبەكستاننىڭ ولي ءماجىلىسى زاڭناما پالاتاسىنىڭ توراعاسى نۋردينجون يسمويلوۆپەن كەلىسسوز وتكىزدى.
ق.توقاەۆ قازاقستان مەن وزبەكستان باسشىلارىنىڭ كۇش-جىگەرىنىڭ ارقاسىندا ەكى ەل اراسىنداعى قاتىناستار سوڭعى جىلدارى جاڭا قارقىنعا يە بولعانىن اتاپ ءوتتى. «ەلدەرىمىزدىڭ بەلسەندى ىنتىماقتاستىعى جانە بۇكىل ورتالىق ازيانىڭ تابىستى ەكونوميكالىق دامۋى, تۇراقتىلىعى مەن قاۋىپسىزدىگى قازاقستان مەن وزبەكستاننىڭ حالىقارالىق ارەناداعى ءوزارا ءىس-قيمىلىنا بايلانىستى», - دەدى سەنات توراعاسى.
جۇزدەسۋشىلەر پرەزيدەنت ن.نازارباەۆتىڭ « ۇلى دالانىڭ جەتى قىرى» ماقالاسى بويىنشا پىكىر الماستى. ق.توقاەۆ اتاپ وتكەندەي, ەلباسى ءوزىنىڭ ماقالاسىندا وتكەننىڭ مۇراسىن شىعارماشىلىق تۇرعىدا زەردەلەپ, ءبىزدىڭ حالقىمىزدىڭ جاھاندىق وركەنيەتكە قوسقان ۇلەسىن لايىقتى باعالاۋدى ۇسىنادى. «ەلىمىزدىڭ دامۋىنىڭ كەلەشەگىن جاڭا قىرىنان باعالاۋ ءۇشىن ءبىز ەڭ الدىمەن ءوز تاريحىمىزدى ماقتان تۇتۋعا ءتيىسپىز», - دەدى ق.توقاەۆ. سەنات توراعاسىنىڭ ايتۋىنشا, پرەزيدەنت باستاعان ءىرى جوبالار «رۋحاني جاڭعىرۋ» باعدارلاماسىنىڭ زاڭدى جالعاسى بولعالى وتىر.
ق.توقاەۆ سونداي-اق وزبەكستانمەن پارلامەنتارالىق ىنتىماقتاستىقتى جانە وزبەك ارىپتەستەرىمىزبەن حالىقارالىق ۇيىمدار اياسىندا بايلانىستاردى نىعايتۋ قاجەتتىگىن اتادى.
كەزدەسۋگە قاتىسۋشىلار ەكى ەلدىڭ زاڭ شىعارۋ ورگاندارىنىڭ ساۋدا-ەكونوميكالىق, كولىك-ترانزيت جانە گۋمانيتارلىق بايلانىستاردى كەڭەيتۋدى ىنتالاندىرۋعا ءازىر ەكەنىن ناقتىلادى. ق.توقاەۆ 15 قاراشادا شىمكەنتتە وتكەن العاشقى ايماقارالىق فورۋمنىڭ قورىتىندىلارىن جوعارى باعالاپ, ىسكەرلىك قاۋىمداردىڭ وسىنداي كەزدەسۋلەرىن جالعاستىرۋدىڭ ماڭىزدى ەكەنىن اتاپ ءوتتى. سەنات توراعاسىنىڭ پىكىرىنشە, مۇنداي سيپاتتاعى كەزدەسۋلەر شەكارا ماڭىنداعى بايلانىستارعا سالماقتى سەرپىن بەرىپ, ەكىجاقتى ساۋداعا ەلەۋلى تۇردە قارقىن بەرە الادى. ەكى ەل باسشىلارىنىڭ ايتۋىنشا, 2020 جىلعا قاراي قازاقستان مەن وزبەكستان اراسىنداعى ساۋدا كولەمى 5 ميلليارد دوللارعا دەيىن جەتۋى ءتيىس. ق.توقاەۆتىڭ پىكىرىنشە, دەگەنمەن مۇنداي جوعارى كورسەتكىشكە قول جەتكىزۋ ءۇشىن ەكى ەل ۇكىمەتتەرى مەن پارلامەنتتەرىنىڭ اۋقىمدى كۇش-جىگەرى قاجەت.
ءوز كەزەگىندە, ن.يسمويلوۆ وزبەك تاراپى ەلدەرىمىز اراسىنداعى دوستىق قاتىناس پەن ىنتىماقتاستىقتى نىعايتۋعا بار كۇشىن سالۋعا ءازىر ەكەنىن جەتكىزدى.