سىرتقى ىستەر مينيسترلىگىندە «قازاقستان رەسپۋبليكاسىنىڭ بۇۇ قاۋىپسىزدىك كەڭەسىنە مۇشەلىگى» تاقىرىبىندا «مەرەيتويلىق جانە اتاۋلى كۇندەر» سەرياسىنان پوشتالىق ماركانى ءوشىرۋدىڭ سالتاناتتى ءراسىمى ءوتتى. ءىس-شاراعا سىرتقى ىستەر ءمينيسترىنىڭ ورىنباسارى ەرجان اشىقباەۆ جانە «قازپوشتا» اق باسقارۋشى ديرەكتورى باۋىرجان اينابەكوۆ قاتىستى, دەپ حابارلايدى ءسىم ءباسپاسوز قىزمەتى.
2017 جىلدىڭ قاڭتارىندا قازاقستان 2017-2018 جىلدارعا بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ ورتالىق ازيا مەملەكەتتەرى اراسىنان العاشقى ەل رەتىندە سايلانعان بولاتىن. مۇنداي جوعارى لاۋازىمعا داۋىس بەرۋ كەزىندە قازاقستان ءۇشىن بۇۇ-نىڭ 138 مۇشەسى داۋىس بەردى. بۇل فاكت ەلىمىزدىڭ جاھاندىق تۇراقتىلىق پەن قاۋىپسىزدىكتى نىعايتۋعا قوسقان ۇلەسىن مويىنداۋىن, سونداي-اق قازاقستان پرەزيدەنتى نۇرسۇلتان نازارباەۆتىڭ حالىقارالىق ارەناداعى جوعارى بەدەلىن كورسەتەدى.
ە. اشىقباەۆتىڭ ايتۋىنشا, قازاقستاننىڭ بۇۇ قاۋىپسىزدىك كەڭەسىنە مۇشەلىگى 27 جىلدىق تاۋەلسىزدىگىمىزدىڭ كەزەڭىندە ەلىمىزدىڭ ماڭىزدى سىرتقى ساياسي جەتىستىكتەرىنىڭ ءبىرى بولىپ تابىلادى. «بۇگىنگى سالتاناتتى ءراسىم قازاقستاننىڭ تۇڭعىش پرەزيدەنتى كۇنى قارساڭىندا وتكىزىلگەنى سيمۆوليكالىق مانگە يە. اتاپ ايتقاندا, ەلباسى نۇرسۇلتان نازارباەۆتىڭ ەلىمىزدىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە سايلانۋىنداعى ۇلەسى نەگىزگى ورىن الۋدا», دەپ, ءمينيستردىڭ ورىنباسارى اتاپ ءوتتى.
پوشتالىق ماركا ءتورت بوياۋدان تۇراتىن وفسەتتىك باسپا رەتىندە شىعارىلىپ, پاراعى 10 ماركادان تۇرادى. تارالىمى - 20 000 دانا. باعاسى 250 تەڭگەنى قۇرايدى.