ەلباسى بۇگىن جاريالانعان « ۇلى دالانىڭ جەتى قىرى» ماقالاسىندا « ۇلى دالانىڭ ۇلى ەسىمدەرى» اتتى وقۋ-اعارتۋ ەنتسيكلوپەديالىق ساياباعىن اشۋدى ۇسىندى.
«كوپشىلىكتىڭ ساناسىندا تاريحي ۇدەرىستەر, نەگىزىنەن, تۇلعالاندىرۋ سيپاتىنا يە بولاتىنى بەلگىلى. كوپتەگەن حالىقتار ءوز ەلىنىڭ ەرەكشە ەلشىسى سىندى ۇلى بابالارىنىڭ ەسىمدەرىن ماقتان تۇتادى. مىسالى, وتكەن داۋىرلەردەگى تۋتانحامون, كونفۋتسي, ەسكەندىر زۇلقارنايىن, شەكسپير, گەتە, پۋشكين جانە دجوردج ۆاشينگتون سياقتى دۇنيە جۇزىنە بەلگىلى تۇلعالار بۇگىندە ء«وز مەملەكەتتەرىنىڭ» باعا جەتپەس سيمۆولدىق كاپيتالى سانالادى ءارى سول ەلدەردىڭ حالىقارالىق ارەنادا ءتيىمدى ىلگەرىلەۋىنە سەپتىگىن تيگىزىپ وتىر. ۇلى دالا ءال-فارابي مەن ياساۋي, كۇلتەگىن مەن بەيبارىس, ءاز-تاۋكە مەن ابىلاي, كەنەسارى مەن اباي جانە باسقا دا كوپتەگەن ۇلى تۇلعالار شوعىرىن دۇنيەگە اكەلدى. سوندىقتان, ءبىز بىرىنشىدەن, اتاقتى تاريحي تۇلعالارىمىز بەن ولاردىڭ جەتىستىكتەرىنىڭ قۇرمەتىنە اشىق اسپان استىندا ەسكەرتكىش-مۇسىندەر قويىلاتىن « ۇلى دالانىڭ ۇلى ەسىمدەرى» اتتى وقۋ-اعارتۋ ەنتسيكلوپەديالىق ساياباعىن اشۋىمىز كەرەك», دەلىنگەن ماقالادا.
سونداي-اق مەملەكەت باسشىسى قازىرگى ادەبيەتتەگى, مۋزىكا مەن تەاتر سىندى ءتۇرلى سالا تۇلعالارىنا ارنالعان گالەرەيا جاساۋدى قولعا الۋدى تاپسىردى.
«ەكىنشىدەن, ماقساتتى مەملەكەتتىك تاپسىرىس ۇيىمداستىرۋ ارقىلى قازىرگى ادەبيەتتەگى, مۋزىكا مەن تەاتر سالاسىنداعى جانە بەينەلەۋ ونەرىندەگى ۇلى ويشىلدار, اقىندار جانە ەل بيلەگەن تۇلعالار بەينەسىنىڭ ماڭىزدى گالەرەياسىن جاساۋدى قولعا الۋ قاجەت. سونداي-اق بۇل جەردە كلاسسيكالىق قالىپتان تىس, بالامالى جاستار ونەرىنىڭ كرەاتيۆتى الەۋەتىن دە پايدالانۋدىڭ ءمانى زور. وسىعان وراي, بۇل ىسكە تەك وتاندىق قانا ەمەس, سونىمەن بىرگە شەتەلدىك شەبەرلەر مەن شىعارماشىلىق ۇجىمداردى دا تارتقان ءجون», دەيدى ن.نازارباەۆ.
سونىمەن قاتار ەلىمىزدىڭ تاريحي كەزەڭدەرىن كەڭىنەن قامتيتىن « ۇلى دالا تۇلعالارى» اتتى عىلىمي-كوپشىلىك سەريالار شىعارىلىپ, تاراتۋ جۇمىستارى ءبىر جۇيەگە ەنەتىن بولادى. ول ءۇشىن قازاقستاندىق عالىمدارمەن قاتار شەتەلدىك ماماندار دا تارتىلاتىن حالىقارالىق كوپبەيىندى ۇجىم قۇرىلادى. بۇل ارقىلى ەل قاھارماندارىنىڭ ءومىرى مەن قىزمەتى جونىندە تەك قازاقستاندىقتار عانا ەمەس, سونداي-اق شەتەلدىك ازاماتتار دا بىلەتىن بولادى.