الماتىدا قورعانىس ءمينيسترىنىڭ ءبىرىنشى ورىنباسارى – قازاقستان قارۋلى كۇشتەرى باس شتابىنىڭ باستىعى, گەنەرال-لەيتەنانت مۇرات مايكەەۆتىڭ توراعالىق ەتۋىمەن ۇجىمدىق قاۋىپسىزدىك تۋرالى شارت ۇيىمىنىڭ اسكەري قۇرامداس بولىگىن دامىتۋ ماسەلەلەرى بويىنشا ۇقشۇ اسكەري كوميتەتىنىڭ 13-ءشى وتىرىسى ءوتتى.
وتىرىسقا قاتىسۋشىلار ورتالىق ازيا ايماعىندا اسكەري قاۋىپسىزدىكتىڭ قاۋىپ-قاتەرلەرىنىڭ سيپاتى, سونداي-اق ولارعا قارسى ءىس-قيمىل بويىنشا پىكىر الماستى.
سونىمەن قاتار ۇجىمدىق قاۋىپسىزدىكتىڭ ورتالىق ازيا وڭىرىندە اۋە شابۋىلىنا قارسى قورعانىستى ۇيىمداستىرۋ, ۇجىمدىق قاۋىپسىزدىك تۋرالى شارت ۇيىمى ۇجىمدىق قاۋىپسىزدىگىنىڭ كۇشتەرى جانە جۇيە قۇرالدارىنىڭ تاپسىرمالاردى ورىنداۋىن قامتاماسىز ەتۋ ءۇشىن ماتەريالدىق قۇرالدار قورىن جاساقتاۋ, تاجىك-اۋعان شەكاراسىندا شيەلەنىستى ازايتۋعا باعىتتالعان شارالار ازىرلەۋ تۋرالى ءارى قارايعى جۇمىستىڭ باعىتتارى ايقىندالدى.
– ۇسىنىمداردى ازىرلەي وتىرىپ, ۇجىمدىق قاۋىپسىزدىكتىڭ وڭىرلەردەگى اسكەري-ساياسي جاعدايدىڭ مونيتورينگى مەن تالداۋى جالعاستىرىلاتىن بولادى. 2020 جىلعا دەيىنگى كەزەڭگە ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ اسكەري ىنتىماقتاستىعىن دامىتۋدىڭ نەگىزگى باعىتتارىن ىسكە اسىرۋ جونىندەگى جوسپاردىڭ ورىندالۋ بارىسى تۋرالى اقپارات تىڭدالدى. قاراستىرىلعان ماسەلەلەر ءبىز ءۇشىن باستى ماقسات – ۇيىمعا مۇشە مەملەكەتتەردىڭ ۇجىمدىق قاۋىپسىزدىگى مەن تۇراقتىلىعىن نىعايتۋعا نەگىز بولادى. اسكەري كوميتەتتىڭ كەزەكتى وتىرىسى 2019 جىلدىڭ ءبىرىنشى جارتىجىلدىعىندا قىرعىز رەسپۋبليكاسىندا وتەدى, – دەدى اسكەري كوميتەت توراعاسى, قورعانىس ءمينيسترىنىڭ ءبىرىنشى ورىنباسارى – قازاقستان قارۋلى كۇشتەرى باس شتابىنىڭ باستىعى, گەنەرال-لەيتەنانت مۇرات مايكەەۆ.
وتىرىس قورىتىندىسى بويىنشا ۇقشۇ-عا مۇشە مەملەكەتتەردىڭ ۇجىمدىق قاۋىپسىزدىگىن نىعايتۋعا باعىتتالعان بىرقاتار ۋاعدالاستىققا قول جەتكىزىلدى.
سەرىك ابدىبەك,
«ەگەمەن قازاقستان»