جۋىردا عانا ۆەنادا وتكەن حالىقارالىق جارىستىڭ جارتىلاي فينالىنا دەيىن جەتىپ, سول تابىسىنىڭ ارقاسىندا الەمدىك رەيتينگتە 71-ورىننان 54-ساتىعا دەيىن كوتەرىلگەن ميحايل كۋكۋشكين پاريجدە تۇساۋى كەسىلگەن ءتۋرنيردى دە ءساتتى باستادى.
جۇلدە قورى 4 835 975 ەۋرونى قۇراعان ماستەرس ءتۋرنيرىنىڭ العاشقى اينالىمىندا جەرلەسىمىزدىڭ جولى پەر-يۋگ ەربەرمەن قيىستى. 27 جاستاعى نەمىس تەننيسشىسى اتر تىزىمىندە كۋكۋشكيننەن ءۇش ساتى تومەن تۇر. گەرمانيانىڭ وكىلى «ۇلكەن دۋلىعا» ساناتىنداعى تۋرنيرلەردە ءۇشىنشى كەزەڭنەن اسا الماعانىمەن, جۇپتىق سايىستاردا ول كەرەمەت ونەر كورسەتۋدە. اتاپ ايتساق, اۆستراليانىڭ اشىق بىرىنشىلىگىنىڭ فينالىنا دەيىن جەتسە, قالعان ءۇش جارىستىڭ بارلىعىندا باس جۇلدەنى ولجالادى. بۇل باسەكە 3:6, 6:3, 7:6 ەسەبىمەن قازاقستاندىق ويىنشىنىڭ پايداسىنا شەشىلدى.
ەكىنشى اينالىمدا ميحايل كۋكۋشكين دجون يزنەرمەن كۇش سىناسادى. 33 جاستاعى اقش-تىڭ اتاقتى تەننيسشىسى اتر تۋرنيرلەرىندە 14 مارتە توپ جارعان. بيىل ول اقش-تىڭ اشىق بىرىنشىلىگىنىڭ شيرەك فينالىندا ويناسا, ۋيمبلدوننىڭ جارتىلاي فينالىنا دەيىن جەتتى. قازىرگى كەزدە ول الەمدىك رەيتينگتە 9-ورىندا تۇر. بۇل باسەكە بۇگىن وتەدى. وسى جۇپتىڭ جەڭىمپازى كەلەسى كەزەڭدە رەسەيلىك كارەن حاچانوۆپەن كۇش سىناسادى. ال اتالمىش ءتۋرنيردىڭ ءوزى 4-قاراشادا ءوز مارەسىنە جەتەدى.
عالىم سۇلەيمەن,
«ەگەمەن قازاقستان»