ەلباسى نۇرسۇلتان نازارباەۆ قازان ايىنداعى جولداۋىندا ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە, ياعني 28 مىڭنان 42 مىڭعا دەيىن ءوسىرۋدى تاپسىرىپ, ەلىمىزدەگى ءىرى كومپانيالاردى بۇل باستاماعا ءۇن قوسۋعا شاقىرعان ەدى.
مەملەكەت باسشىسىنىڭ باستاماسىن شىعىستاعى ءىرى ءوندىرىس ورىندارى قولداپ, قازىردىڭ وزىندە قىزمەتكەرلەردىڭ جالاقىسىن كوتەرۋگە كىرىسىپ كەتتى دەۋگە بولادى. بۇگىن وسكەمەندەگى وڭىرلىك كوممۋنيكاتسيالار قىزمەتىندە وتكەن بريفينگتە ايماقتاعى الپاۋىت كاسىپورىندار - «قازتسينك» جشس مەن «ازيا اۆتو» اق قىزمەتكەرلەردىڭ جالاقىسىن وسىرۋگە دايىن ەكەندىكتەرىن مالىمدەدى.
«قازتسينك» جشس باس ديرەكتورى الەكساندر حمەلەۆ قازىر كومپانيا قىزمەتكەرلەردىڭ جالاقىسىن ەسەپتەۋگە كىرىسىپ كەتكەنىن, كاسىپورىنداعى قانداي مامانداردىڭ جالاقىسى قانشا مولشەرگە كوبەيتىلەتىندىگى كەلەسى اپتادا بەلگىلى بولاتىندىعىن ايتتى. ء«بىزدىڭ كومپانيادا 28 مىڭ تەڭگە الاتىن قىزمەتكەرلەر جوق. پرەزيدەنت ايتقانداي ءبىز قىزمەتكەرلەردىڭ جالاقىسىن ءبىر جارىم ەسەگە وسىرمەسەك تە, جۇمىسشىلاردىڭ ماماندىقتارىنىڭ ەرەكشەلىگىن ەسكەرە وتىرىپ 2019 جىلدىڭ 1 قاڭتارىنان باستاپ كەيبىرىنىڭ جالاقىسىن 3-4, كەيبىرىنىكىن 20-30 پروتسەنتكە كوتەرەمىز. ورتاشا جالاقى شامامەن 10 پروتسەنتكە ۇلعايادى دەپ ويلايمىز. مۇنى كومپانيانىڭ قۇرىلىمدارىنداعى ۇجىممەن كەزدەسىپ, تۇسىندىرەمىز», - دەيدى ول.
«ازيا اۆتو» اق پرەزيدەنتى ەرىك ساعىمباەۆ قازىردىڭ وزىندە مەكەمەدە ءتيىستى ەسەپتەۋلەر جۇرگىزىلىپ, قىزمەتكەرلەردىڭ جالاقىسىن ورتاشا ەسەپپەن 20 پروتسەنتكە وسىرگەندىكتەرىن جەتكىزدى. ونىڭ ايتۋىنشا, «ازيا اۆتودا» ورتاشا جالاقى 226, ەڭ تومەنگى جالاقى 94 مىڭ تەڭگەنى قۇرايدى.
ازامات قاسىم,
«ەگەمەن قازاقستان»
وسكەمەن