مادەنيەت جانە سپورت مينيسترلىگىنىڭ قولداۋىمەن قازاقستان تەاترلارى اسسوتسياتسياسى 30 قازان مەن 6 قاراشا ايى ارالىعىندا تالدىقورعان قالاسىندا استانانىڭ 20 جىلدىعى جانە كورنەكتى مەملەكەت قايراتكەرى تەمىربەك جۇرگەنوۆتىڭ 120 جىلدىعىنا ارنالعان VII ورتالىق ازيا ەلدەرىنىڭ حالىقارالىق تەاتر فەستيۆالىن وتكىزەدى.
فەستيۆال ورتالىق ازيا ەلدەرىنىڭ تەاتر ونەرى سالاسىنداعى ارىپتەستىكتى نىعايتۋ, تەاتر ونەرىن دامىتۋ جانە وسى سالا ماماندارىن شىعارماشىلىق باستامالارعا ىنتالاندىرۋ, سونداي-اق جۇرتشىلىقتىڭ نازارىن تەاتر ءۇردىسىنىڭ جاڭا, زاماناۋي ۇلگىلەرىنە اۋدارۋ ماقساتىندا وتكىزىلەدى. فەستيۆالگە باق سىناۋعا قازاقستان, قىرعىزستان, تاجىكستان, تۇرىكمەنستان, باشقۇرتستان, وزبەكستان, تۇركيا ەلدەرىنىڭ تەاترلارى قاتىسادى.
اتالعان جەتى مەملەكەتتىڭ تەاترلارى قاتىساتىن فەستيۆال اياسىندا جالپى كولەمدە 12 قويىلىم كورەرمەن نازارىنا ۇسىنىلادى. الپ ارسلان اتىنداعى تۇرىكمەن ۇلتتىق جاستار تەاترى «كوروعلى جانە اگايۋنۋس», م.گافۋري اتىنداعى باشقۇرت مەملەكەتتىك اكادەميالىق دراما تەاترى «ىزدەپ تاپتىم سەنى...», سىرداريا وبلىستىق مۋزىكالىق دراما تەاترى (وزبەكستان) «انا – جەر-انا», حاسان اسار اتىنداعى تۇركيا تەاترى «پيرايە», ب.قىدىكەەۆا اتىنداعى قىرعىز مەملەكەتتىك جاسوسپىرىمدەر تەاترى «قاسقىر ۇلىعان ءتۇن», ا.لاحۋتي اتىنداعى تاجىك مەملەكەتتىك اكادەميالىق دراما تەاترى «قىلمىس پەن جازا» سپەكتاكلدەرىمەن قاتىسسا, قازاقستاننان ب.ريموۆا اتىنداعى تالدىقورعان دراما تەاترى «ايمان-شولپان», ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى «قورعانسىزدىڭ كۇنى», س.مۇقانوۆ اتىنداعى سولتۇستىك قازاقستان وبلىستىق قازاق مۋزىكالىق دراما تەاترى «قاراگوز», ن.بەكەجانوۆ اتىنداعى قىزىلوردا وبلىستىق قازاق مۋزىكالىق دراما تەاترى «ناركوم جۇرگەنوۆ» قويىلىمدارىن ۇسىنادى. ايتا كەتەيىك, اتالمىش فەستيۆال بيكەن ريموۆا اتىنداعى تالدىقورعان دراما تەاترىنىڭ جاڭا جانە ەسكى عيماراتىندا وتەدى.
ايگۇل احانبايقىزى,
«ەگەمەن قازاقستان»