استانا دەكلاراتسياسى قابىلداندى

دۇنيەجۇزىلىك دەنساۋلىق ساقتاۋ ۇيىمىنا مۇشە 140-تان اسا ەلدەن 1500-گە جۋىق وكىل قاتىسقان باسقوسۋعا بەينە-قۇتتىقتاۋ جولداعان مەملەكەت باسشىسى نۇرسۇلتان نازارباەۆ استانا دەكلاراتسياسىن قابىلداۋ الەمدەگى دەنساۋلىق ساقتاۋ سالاسى ءۇشىن ماڭىزدى كەزەڭ بولاتىنىن ايتىپ, بۇل جاھاندىق دەڭگەيدە ادامداردىڭ دەنساۋلىعىن جاقسارتۋعا ۇلەس قوساتىن باعدارلامالىق قۇجات ەكەنىن جەتكىزدى. «وسىدان 40 جىل بۇرىن الەم جۇرتشىلىعى الماتى قالاسىنا جينالىپ, دۇنيەجۇزىلىك دەنساۋلىق ساقتاۋ ۇيىمىنا مۇشە مەملەكەتتەر العاشقى مەديتسينالىق-سانيتارلىق كومەك جونىندەگى الماتى دەكلاراتسياسىن قابىلدادى. وندا حالىقتى سانيتارلىق باعىتتا اقپاراتتاندىرۋ, انا مەن بالانىڭ دەنساۋلىعىن قورعاۋ, اۋرۋلاردىڭ الدىن الۋ, ونىڭ ىشىندە ۆاكتسيناتسيا مەن ءدارى-دارمەكتەرمەن قامتاماسىز ەتۋ سەكىلدى ماڭىزدى قاعيداتتار بولدى. ودان بەرى الەمنىڭ دەنساۋلىق ساقتاۋ باعىتى وسى نەگىزگى باعىتتار بويىنشا دامىپ كەلە جاتىر», دەدى پرەزيدەنت.

قورشاعان ورتانىڭ بۇزىلۋى, قوزعالىستىڭ ازايۋى, دۇرىس تاماقتانباۋدان سوزىلمالى اۋرۋلاردىڭ كوبەيىپ بارا جاتقانىن جەتكىزگەن ەلباسى بۇگىنگى تاڭدا دەنساۋلىق ساقتاۋ سالاسىن قارجىلاندىرۋ مەن تسيفرلاندىرۋ اسا ماڭىزدى ەكەنىن اتاپ ءوتتى.

كونفەرەنتسيانىڭ اشىلۋ سالتاناتىنا جانە جوعارى دەڭگەيلى سەسسياسىنا قاتىسقان پرەمەر-مينيستر باقىتجان ساعىنتاەۆ استانادا جاھاندىق كونفەرەنتسيانى وتكىزۋدىڭ ماڭىزدىلىعىن اتاپ ءوتتى. «ددسۇ-عا مۇشە ەلدەردىڭ, حالىقارالىق ۇيىمدار مەن اكادەميالىق قاۋىمداستىقتىڭ بىرىگىپ كۇش-جىگەر سالۋىنىڭ ناتيجەسىندە مەديتسينالىق-سانيتارلىق العاشقى كومەك تۋرالى جاڭا دەكلاراتسيا ازىرلەندى. ونىڭ قابىلدانۋى كەز كەلگەن ەلدىڭ دەنساۋلىق ساقتاۋ جۇيەسىنىڭ نەگىزى رەتىندە مساك-تىڭ دامۋى ءۇشىن باعىت-باعدار بولادى. جاڭا دەكلاراتسيادا جەتىلدىرىلگەن مساك ارقىلى بارشانىڭ دەنساۋلىققا قول جەتكىزۋى ءۇشىن مەملەكەتتىڭ, ادامداردىڭ, قاۋىمداستىقتاردىڭ, دەنساۋلىق ساقتاۋ جۇيەسى مەن سەرىكتەستەرىنىڭ مىندەتتەمەلەرى كورسەتىلگەن. بۇل قۋاتتى مساك ستراتەگياسىن ءححى عاسىردا دا جالعاستىرۋعا دەگەن ۇلتتاردىڭ ورتاق ەرىك-جىگەرىنىڭ ايقىن كورىنىسى», دەدى ب.ساعىنتاەۆ.

جيىنعا قاتىسۋشىلاردىڭ ايتۋىنشا, استانا دەكلاراتسياسىنىڭ قابىلدانۋى كەز كەلگەن ەلدىڭ دەنساۋلىق ساقتاۋ سالاسىنىڭ نەگىزى بولعان XXI عاسىرداعى مساك جۇيەسىن دامىتۋعا مۇمكىندىك بەرەدى. جاڭا دەكلاراتسيادا تۇراقتى مساك ارقىلى دەنساۋلىق ساقتاۋداعى مەملەكەتتەردىڭ, قاۋىمداستىقتاردىڭ جانە جەكەلەگەن ادامداردىڭ مىندەتتەمەلەرى كورسەتىلەدى. اتالعان قۇجات 2019 جىلى قىركۇيەك ايىندا مەملەكەتتەر باسشىلارى دەڭگەيىندە بۇۇ باس اسسامبلەياسىنداعى جوعارى دەڭگەيلى كەزدەسۋدە ۇسىنۋ كوزدەلىپ وتىر.

الماتى دەكلاراتسياسى قابىلدانعالى بەرى قازاقستاندا عانا ەمەس, الەمدە دە كوپتەگەن وزگەرىستەر ورىن العانىن ايتقان دەنساۋلىق ساقتاۋ ءمينيسترى ەلجان ءبىرتانوۆ دۇنيەجۇزى بويىنشا سوزىلمالى اۋرۋلاردىڭ جيىلەپ كەتكەنىن جەتكىزدى. «بۇعان الەۋمەتتىك فاكتورلار دا اسەرىن تيگىزىپ جاتىر. ءبىز وسى ماسەلەنى كوتەرىپ, دۇنيە ءجۇزىنىڭ مەديتسينا سالاسىنىڭ, العاشقى مەديتسينالىق كومەكتىڭ كەلەشەگىنىڭ دامۋ باعىتتارىن ايقىنداۋ ءۇشىن وتكەن جىلى جەنەۆا قالاسىنداعى دۇنيەجۇزىلىك دەنساۋلىق اسسامبلەياسىندا باستاما كوتەردىك. الماتى دەكلاراتسياسى نەگىزىندە جاڭا مەديتسينالىق-سانيتارلىق العاشقى كومەكتى دامىتۋ دەكلاراتسياسىن قابىلداۋدى ۇسىندىق», دەدى ە.ءبىرتانوۆ.

دەنساۋلىق ساقتاۋ ءمينيسترى 40 جىل بۇرىن قابىلدانعان قۇجات پەن بۇگىنگى جاڭا دەكلاراتسيانىڭ ايىرماشىلىعىنا دا توقتالدى. «استانا دەكلاراتسياسى ۋاقىتتىڭ تالابى مەن الماتى دەكلاراتسياسىنان بەرى قابىلدانعان ساياسي قۇجاتتاردى ەسەپكە الادى. ەڭ الدىمەن, استانا دەكلاراتسياسى – بۇۇ-نىڭ تۇراقتى دامۋىنىڭ ماقساتى. ەكىنشىدەن, جاڭا دەكلاراتسيا ادامي كاپيتالدى دامىتۋدا, تسيفرلى تەحنولوگيالاردى قولدانۋدا ۇكىمەتتەردەن قوسىمشا كۇش-جىگەر جۇمساۋدى سۇرايدى. دەمەك, استانا دەكلاراتسياسى 40 جىلدان بەرگى عىلىمي-تەحنيكالىق پروگرەستى ەسەپكە الىپ وتىر. ۇشىنشىدەن, بۇل قۇجات ءوزىنىڭ جۇزەگە اسىرىلۋى جولىندا قول قويعان مەملەكەتتەرگە تالاپتى كۇشەيتۋدى ۇسىنادى. سەبەبى, بۇگىن ايتىلىپ جاتقانداي كەيبىر ەلدەر وسىدان 40 جىل بۇرىن قابىلدانعان الماتى دەكلاراتسياسىنىڭ قاعيداتتارىن ىسكە اسىرىپ ۇلگەرمەگەن. وسىعان بايلانىستى, دەكلاراتسيانى قولداعان مۇشە-مەملەكەتتەر, ددسۇ, يۋنيسەف وسى دەكلاراتسيانىڭ قاعيداتتارىنىڭ ورىندالۋىنا ءۇن قوسادى», دەدى ول.

مايگۇل سۇلتان,

سۋرەتتى تۇسىرگەن ەرلان ومار,

«ەگەمەن قازاقستان»