قۇرلىقتىق حوككەي ليگاسىندا (قحل) كۇش سىناسىپ جۇرگەن استانانىڭ «بارىسى» ءوز ايدىنىندا وتكەن كەزەكتى تۋردا مينسكىنىڭ «ديناموسىن» قابىلداپ, 3:1 ەسەبىمەن ۇتتى.
العاشقى كەزەڭنىڭ اياقتالار تۇسىندا «بارىس» ويىنشىسى دميتري گۋركوۆ ەسەپتى اشقان بولاتىن. الايدا تورەشى بۇل شايبانى ەسەپكە المادى. بەينە قايتالاۋ بارىسىندا ەلوردا كومانداسىنىڭ ويىنشىسى شايبانى اياقپەن سوققانى بەلگىلى بولدى. ءسويتىپ ويىنداعى ەسەپ ەكىنشى كەزەڭدە ءبىر-اق اشىلدى. 31-مينۋتتا دميتري شەۆچەنكو «بارىستى» ەسەپتە العا شىعارسا, ارادا التى مينۋت وتكەندە اندرە پەتەرسسون ەسەپتى 2:0-گە جەتكىزدى.
ءۇشىنشى كەزەڭدى قوناق كوماندا جىلدام شابۋىلمەن باستاپ, ەسەپتى قىسقارتۋعا مۇمكىندىك الدى. شايبا اۆتورى – دەنيس وسيپوۆ. دەگەنمەن 48-مينۋتتا داستين بويد ويىنداعى قورىتىندى شايبانى سوعىپ, «بارىسقا» جەڭىس سىيلادى.
وسى جەڭىسىنەن كەيىن استانانىڭ كلۋبى قحل-دىڭ شىعىس كونفەرەنتسياسىنداعى جارىس كەستەسىندە 6-ورىنعا كوتەرىلدى. «بارىس» 18 كەزدەسۋدەن كەيىن 26 ۇپاي يەلەنىپ وتىر.
دايىنداعان الي بيتورە,
«ەگەمەن قازاقستان»