قاراعاندى قالاسىندا تەك ەلىمىزدىڭ وندىرىستىك ايماعى بولىپ قانا قويماي, سونىمەن قاتار تسيفرلى تەحنولوگيالاردى دامىتۋ ورتالىعىنا اينالۋ الەۋەتى پايدا بولدى. الەمگە تانىمال ءىت-ماماندار قاراعاندىنى «تەرريكون القابى» دەپ اتاۋدى ۇسىندى.
تاياۋدا كەنشىلەر استاناسىندا ءتورت كۇن بويى «IT-WEEKEND.KZ-2018» حالىقارالىق فورۋمى ءوتتى. شاراعا بارلىق ايماقتاردان جانە باسقا ەلدەردەن جوعارى تەحنولوگيا ماماندارى جينالدى. فورۋمنىڭ «قاراعاندى – ءىت-كەڭىستىكتىڭ باستاۋ الاڭى» اتتى باستى پانەلدىك سەسسياسىنا قاراعاندى وبلىسىنىڭ اكىمى ەرلان قوشانوۆ قاتىستى. ايماق باسشىسى ءوز سوزىندە بۇگىنگى تاڭدا ءىت-نارىق بارلىعىمىز ءۇشىن كەرەمەت مۇمكىندىكتەر جانە باستاما پوزيتسيالار بولىپ تابىلاتىنىن اتاپ ءوتتى.
«ەلباسى باستاماسىنىڭ ارقاسىندا ەلىمىزدە «تسيفرلى قازاقستان» باعدارلاماسى جۇزەگە اسىرىلۋدا. الدىڭعى قاتارلى ەلدەر تسيفرلاندىرۋعا ونداعان جىلدار بويى قاتەلىكتەر مەن تاجىريبەلەر ارقىلى جەتكەن. بۇل الەمدىك تاجىريبە ءىت-سالانى دامىتۋعا ارنالعان ستراتەگيا بولىپ تابىلاتىن «تسيفرلى قازاقستان» باعدارلاماسىندا ەسكەرىلگەن», دەدى ەرلان قوشانوۆ.
ۇيىمداستىرۋشىلاردىڭ ايتۋىنشا, قاراعاندى ءىت-فورۋمدى وتكىزەتىن جەر رەتىندە تەگىن تاڭدالعان جوق. قالادا جوو جانە مامانداندىرىلعان كوللەدج نەگىزىندەگى مىقتى ماتەماتيكالىق مەكتەپ بار. قاراعاندىلىق باعدارلامالاۋشىلار Google سەكىلدى الەمنىڭ الدىڭعى قاتارلى ءىت-كومپانيالارىندا قىزمەت ەتەدى. بۇعان قوسا, وبلىستا تسيفرلى «ەرەكشەلىكتەر» ەنگىزىلىپ جاتقان ءساتتى ۇلگىلەر بار. مىسالى, دەنساۋلىق ساقتاۋ جانە ءبىلىم بەرۋ سالالارى كوپتەگەن ناتيجەلەرگە قول جەتكىزگەن. ۇيدە وتىرىپ, دارىگەردىڭ قابىلداۋىنا جازىلۋعا, مەديتسينا قىزمەتكەرىن ۇيگە شاقىرۋعا جانە قاجەتتى ءدارى-دارمەكتىڭ رەتسەپتىن جازعىزىپ الۋعا مۇمكىندىك بەرەتىن «دامۋ مەد» قوسىمشاسى ءساتتى جۇمىس ىستەپ جاتىر. قاراعاندىلىق IT مامانداردىڭ زەرتتەمەسى قازىرگى كۇنى قازاقستاننىڭ بارلىق قالاسىندا قولدانىسقا ەنگىزىلدى. تەك قاراعاندىنىڭ وزىندە-اق بۇل قوسىمشانى 300 مىڭنان استام ادام پايدالانادى.
«مۇندا, قاراعاندىدا ماتەماتيكالىق وي-ءورىسى دامىعان, وسى سالادا وزىڭمەن تەڭ ادامدارمەن سويلەسە الاسىڭ. وسىندا قازىر جاستار, تاجىريبەلى ماماندار, تابىستى كاسىبي قىزمەتكەرلەر, عىلىم مەن بيلىك وكىلدەرى ءوزارا بايلانىس ورناتىپ, درايۆ قۇرىپ, جاڭاشىلدىقتار ويلاپ تاۋىپ, وزدەرىن دە, ءوڭىردى دە, جالپى ەلدى دامىتۋعا تالپىناتىن بىرەگەي الاڭ قۇرىلىپ جاتىر», دەدى سەسسيادا ءماجىلىس دەپۋتاتى پاۆەل كازانتسەۆ.
فورۋمعا قاتىسۋشىلار قاراعاندىلىق ءىت حابتى «تەرريكون القابى» دەپ اتاۋدى ۇسىندى.
– سيليكون القابى بار, ال قاراعاندىدا ءوزىنىڭ تەرريكون القابى بولادى. مەن ونى قولدايمىن, – دەدى ەرلان قوشانوۆ.
وسىعان وراي ءوڭىر باسشىسى ءوزىنىڭ ورىنباسارى الماس ايداروۆقا جانە «قاراعاندى وبلىسىنىڭ اقپارات, مەملەكەتتىك قىزمەتتەردى كورسەتۋ جانە مۇراعاتتار» مب جەتەكشىسىنە تاپسىرما بەردى.
سەسسيا سوڭىندا ەرلان قوشانوۆ فورۋم شەڭبەرىندە وتكەن حاكاتون جەڭىمپازدارىنا اقشالاي سەرتيفيكاتتار تابىس ەتتى. جەڭىمپاز اتانعانداردىڭ بارلىعى دا قممۋ ستۋدەنتتەرى بولدى. ولار 500 مىڭ تەڭگەدەن يەلەندى. ستۋدەنتتەر مۇمكىندىگى شەكتەۋلى ادامدارعا نەمەسە توسەك تارتىپ قالعان ناۋقاسقا كومەكشى نەمەسە كۇتۋشى تاۋىپ الۋعا مۇمكىندىك بەرەتىن ءموبيلدى قوسىمشا جاساپ شىعارعان بولاتىن.
قايرات ءابىلدا,
«ەگەمەن قازاقستان»
قاراعاندى