تاۋەلسىزدىگىمىزدىڭ تۇعىرى نىقتالىپ, ەڭسەمىزدى تىكتەگەن سايىن كەشەگى الاش ءۇشىن ارپالىسىپ وتكەن ارىستارىمىزدىڭ باعاسى ودان سايىن ارتىپ, مارتەبەسى ودان سايىن بيىكتەي بەرمەك. سونىڭ ءبىر دالەلىندەي بيىل پرەمەر-ءمينيستردىڭ قاۋلىسىمەن 5 قىركۇيەك, ياعني احمەت بايتۇرسىن ۇلىنىڭ تۋعان كۇنى قازاقستان حالقى تىلدەرىنىڭ كۇنى بولىپ بەكىتىلگەن بولاتىن.
كەشە استانا قالاسىنىڭ اكىمدىگى مەن تىلدەردى دامىتۋ جانە ارحيۆ ءىسى باسقارماسى, «رۋحانيات» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا احمەت بايتۇرسىن ۇلىنىڭ شىعارماشىلىعىنا ارنالعان «الاشتىڭ احاڭى» اتتى رۋحاني- تاعىلىمدى ءىس-شارا ءوتتى.
كەشكە احمەت اتامىزدىڭ اتالاس تۋىستارىنان تاراعان ۇرپاقتارى دا كەلىپتى. «بىزگە كۇللى الاشقا ورتاق احمەت بايتۇرسىن ۇلىنىڭ ۇرپاعى دەگەن ات ارينە ماقتانىش, سونىمەن بىرگە وتە ۇلكەن جاۋاپكەرشىلىك. اۋلەتىمىزدىڭ ۇل-قىزدارى وسى ارداقتى اتقا جامانات كەلتىرمەي, ۇرپاعى دا عىلىم, بىلىممەن ۇلتقا قىزمەت ەتۋ كەرەكتىگىن ايتىپ, سول باعىتتا جۇمىس ىستەۋگە تىرىسامىز», دەدى احمەت بايتۇرسىن ۇلى اتىنداعى ەۋرازيالىق ءبىلىم جانە عىلىمدى دامىتۋ قوعامدىق قورىنىڭ اتقارۋشى ديرەكتورى ازامات نۇرلان ۇلى.
كەش ق.قۋانىشباەۆ تەاترىنىڭ ارتىستەرى سومداعان «ۇلت قايراتكەرى» قويىلىمىمەن باستالىپ, «احمەت بايتۇرسىن ۇلىنىڭ عۇمىرناماسى» اتتى بەينەسيۋجەت كوپشىلىك نازارىنا ۇسىنىلدى. الاشتانۋشى عالىم, فيلولوگيا عىلىمدارىنىڭ دوكتورى, اكادەميك ديحان قامزابەك ۇلى ءسوز سويلەپ, احمەت بايتۇرسىن ۇلىنىڭ ارمان-مۇراتى جايلى باياندادى.
ول ءار ۇرپاقتىڭ موينىنا ءوز ۋاقىتىنىڭ جۇگى ارتىلاتىنىن, سول جۇكتى كەلەسى ۇرپاقتىڭ ارقاسىنا ارتىپ كەتۋ ۇلتتى كەرى شەگىندىرەتىن نەمەسە باسقالارعا ىلەسە الماي قالۋعا الىپ كەلەتىن قاتەلىك ەكەنىن ايتا وتىرىپ, احاڭنىڭ ءوز داۋىرىندە موينىنا ارتىلعان اسا اۋىر جۇكتى تولىعىمەن اتقارىپ كەتكەن عالىم ەكەندىگىن تىلگە تيەك ەتتى.
«بۇل شارانىڭ ماقساتى – الاشتىڭ رۋحاني كوسەمى, قازاق ءتىل ءبىلىمىنىڭ نەگىزىن قالاۋشى عالىم, ادەبيەت زەرتتەۋشىسى, اعارتۋشى, ۇلت ۇستازى احمەت بايتۇرسىن ۇلىنىڭ شىعارماشىلىق مۇراسىن كوپشىلىك قاۋىمعا كەڭىنەن ناسيحاتتاۋ, جاس ۇرپاقتىڭ بويىندا ۇلتجاندىلىق پەن وتانشىلدىق رۋحتى قالىپتاستىرۋ, قوعامدىق سانانى ۇلتتىق باعىتتا جاڭعىرتۋ, ۇلتتىڭ اسىل قازىناسى – قازاق ءتىلىنىڭ مارتەبەسىن ارتتىرۋ, قازاق ءسوز ونەرىنىڭ قۇندى مۇرالارىن تانىتۋ», دەيدى ۇيىمداستىرۋشىلار.
تاعىلىمدى دا تارتىمدى كەشتە ءداستۇرلى ءانشى امانگەلدى سەيىتحان احاڭنىڭ فايزوللا دوسىنا جازعان سوڭعى حاتتارىنىڭ ءبىرى «قان شەڭگەل» تولعاۋىن ورىندادى. «سەنەن بۇلت مەنەن قايعى تارقامادى» دەپ ءماديدىڭ انىمەن باستاعان ايگىلى ءانشى رامازان ستامعازيەۆ ء ارى قاراي «الاش قونعان اقبوز ءۇي...» دەپ قاپەزدىڭ انىمەن جالعادى. كۇيشى ايبەك بەكبوسىن «الاش» كۇيىن تارتۋ ەتتى. سونداي-اق وقۋشىلار احمەت اتامىزدىڭ ولەڭدەرىن وقىدى.
يگى ءىس-شاراعا زيالى قاۋىم وكىلدەرى مەن قالا باسشىلىعى, قۇرىلىمدىق جانە الەۋمەتتىك مەكەمەلەردىڭ, وقۋ ورىندارىنىڭ, جاستار ۇيىمدارىنىڭ جەتەكشىلەرى, بەلسەندى جاستار مەن ۇلت ۇستازىنىڭ ۇلاعاتىنان سۋسىنداۋعا قىزىققان قالا تۇرعىندارى قاتىستى.
ۇلاربەك نۇرعالىم ۇلى,
«ەگەمەن قازاقستان