اتىراۋلىق تاۋار وندىرۋشىلەردىڭ ونىمدەرى رەسەيدىڭ استراحان وبلىسىنداعى ءىرى جوبالاردى جۇزەگە اسىرۋ كەزىندە پايدالانىلادى. قازاقستاندا جاسالعان ونىمدەر مەن تاۋارلار استراحانداعى ساۋدا-ونەركاسىپ كورمەسىنە قويىلىپ, كورشىلەردىڭ قىزىعۋشىلىعىن تۋدىردى. شاراعا مۇنايلى وڭىردەن 20 بيزنەس سۋبەكتىسى قاتىستى.
وبلىستىق كاسىپكەرلەر پالاتاسىنىڭ باسشىسى ابدوللا ىدىرىسوۆ: «كورمە ەكى ەل اراسىنداعى ىسكەرلىك بايلانىستى نىعايتۋدى كوزدەدى, ناتيجەسى دە جاقسى بولدى. مىسالى, «كارات» جشس رەسەيلىك «ميراج» كومپانياسىمەن كونسەرۆى جەتكىزىلىمىنە, «ديەل» جشس-مەن ديلەرلىك جەلى اشۋعا كەلىسىمشارتقا وتىردى. «اسىل اگرو» سەرىكتەستىگى دە بىرقاتار كەلىسىمدەرگە قول جەتكىزدى. «ينستالكوم» جشس استراحان وبلىسىنداعى ءىرى قۇرىلىس جوبالارىنا قاتىسۋعا مۇمكىندىك الدى. «شەۆرون» قۇبىر زاۋىتىنىڭ ونىمدەرىن كورشىلەرىمىز پايدالاناتىن بولادى», – دەيدى.
رەسەيلىك كاسىپكەرلەردى «بۋم-2020» جشس-ءنىڭ ەكولوگيالىق تازا قاعازدان جاسالعان قاپتامالارى دا قىزىقتىرىپتى. كورمەگە اپارىلعان «ونەرپاز», «كاسپي لانا» سەرىكتەستىكتەرى شىعاراتىن تريكوتاجدان تىگىلگەن كيىمدەر مەن جامىلعىلار تۇگەلگە جۋىق ساتىلىپ كەتكەن.
مۇنداي شارالار شەكارالاس ايماقتاردىڭ ءوزارا بايلانىسىن ارتتىرا تۇسەرى انىق. الداعى ۋاقىتتا رەسەيدىڭ ومبى, ءنوۆوسىبىر, چەليابى وبلىستارىندا دا كورمە ۇيىمداستىرۋ كوزدەلىپ وتىر.
باقىتگۇل باباش,
«ەگەمەن قازاقستان»
اتىراۋ