الەۋمەتتىك مەديتسينالىق ساقتاندىرۋ قورىمەن كەلىسىمشارت جاساسقان جەكە كلينيكالار كوبەيدى

«8 قازانداعى مالىمەت بويىنشا, قورمەن كەلىسىمشارت بەكىتكەن جەتكىزۋشى كومپانيالارعا 549,8 ملرد تەڭگە تولەندى. بۇل جالپى تەگىن مەديتسينالىق كومەكتىڭ كەپىلدەندىرىلگەن كولەمى (تمككك) پاكەتى شەڭبەرىندە بەكىتىلگەن كەلىسىمشارت سوماسىنىڭ 70 پايىزىن قۇرايدى», دەدى مسق باسقارما توراعاسىنىڭ مىندەتىن اتقارۋشى بوتاگوز جاقسىلىقوۆا.

تمككك جانە مىندەتتى الەۋمەتتىك مەديتسينالىق ساقتاندىرۋ پاكەتتەرىنىڭ قارجىلىق وپەراتورى بولىپ سانالاتىن قور ەمدەۋ مەكەمەلەرىمەن تمككك پاكەتى شەڭبەرىندە حالىققا تەگىن كومەك كورسەتۋ جونىندە كەلىسىمشارتتار بەكىتكەن بولاتىن. بەكىتىلگەن كەلىسىمشارتتاردىڭ جالپى سوماسى – 785,8 ملرد تەڭگە.

«جۇمىس كەستەگە ساي ءجۇرىپ جاتىر. بولىنگەن قاراجات مەديتسينا مەكەمەلەرىنىڭ وپەراتسيالىق شىعىندارىن وتەۋگە جەتكىلىكتى», دەدى ب.جاقسىلىقوۆا.

بۇگىنگى تاڭدا قور مەملەكەتتىك تاپسىرىس بويىنشا 1379 مەديتسينا ۇيىمىمەن كەلىسىمشارت بەكىتكەن. ونىڭ 627-ءسى – جەكە مەنشىك. بيىل جەكە كلينيكالار سانى 2017 جىلمەن سالىستىرعاندا 166-عا كوبەيگەن. ال, ولارمەن بەكىتىلگەن كەلىسىمشارت سوماسى 2 ەسەگە ارتىپ, 120,2 ملرد تەڭگەنى قۇرادى.