2017 جىلى وبلىس وڭىرىندە 9 نىساننىڭ, 3 اۋىلدىق وكرۋگتىڭ, 4 اۋىلدىڭ, 73 كوشەنىڭ اتى وزگەرتىلدى.
ۇستىمىزدەگى جىلى قوستاناي قالاسىنداعى بۇرىنعى اۆياتسيوننايا كوشەسىنە كامشات دونەنباەۆانىڭ ەسىمى بەرىلدى. كازاحسكايا كوشەسى ءابىلساي بولىپ وزگەردى. ارقالىق قالاسىنداعى №4 مەكتەپكە كەيكى باتىر ەسىمى, مەڭدىعارا اۋدانىنداعى بوروۆسكوي كاسىپتىك-تەحنيكالىق كوللەدجىنە كامشات دونەنباەۆانىڭ ەسىمىن بەرۋ تۋرالى ۇسىنىستار رەسپۋبليكالىق ونوماستيكا كوميسسياسىنان وڭ باعا الدى.
«اتالعان كورسەتكىشتەرگە تۇرعىندار اراسىندا وتكىزىلگەن ءتۇسىندىرۋ-اقپاراتتىق جۇمىستار ارقىلى قول جەتتى. اسىرەسە, فەدوروۆ, قارابالىق, تاران, جىتىقارا اۋداندارىندا كوشە اتتارىن وزگەرتۋ كەزىندە كوپتەگەن ءتۇسىندىرۋ جۇمىستارىن جۇرگىزدىك. الداعى ۋاقىت جەر-سۋ اتتارىن قايتا قالپىنا كەلتىرۋدە, وزگەرتۋدە قر ۇكىمەتى جانىنداعى رەسپۋبليالىق ونوماستيكا كوميسسياسىنىڭ 2018 جىلعى 12 ناۋرىزداعى وتىرىسىندا بەكىتىلگەن قازاقستان تاريحىندا,ى جالپىۇلتتىق ددەڭگەيدە تانىمال 150 تۇلعانىڭ ەسىمى بار «تاريحي تۇلعالار», «تاريحي وپونيمدەر جانە ء«داستۇرلى اتاۋلار» تىزىمدەرى قاتاڭ باسشىلىققا الىنادى» دەيدى وبلىستىق تىلدەردە دامىتۋ باسقارماسى باسشىسىنىڭ مىندەتىن اتقارۋشى قازىمبەك احمەتوۆ جۋرناليستەر ءۇشىن وتكىزگەن بريفينگتە.
ۇستىمىزدەگى جىلدىڭ ناۋرىز ايىندا قوستاناي قالاسىنىڭ ىرگەسىندەگى زاتوبول كەنتىنىڭ مارتەبەسى مەن اتاۋىن اۋداندىق ماڭىزداعى توبىل قالاسىنا وزگەرتۋ تۋرالى ۇسىنىستى كوپشىلىك ءبىر اۋىزدان قولدادى. ال جاقىندا عانا, 30 قىركۇيەك كۇنى زيالى قاۋىم مەن تاران اۋدانى جۇرتشىلىعىنىڭ ەلباسىنا, وبلىس جانە اۋدان باسشىلىعىنا جولداعان جازباشا ۇسىنىستارىنا سايكەس تاران اۋدانىنا بەيىمبەت مايلين ەسىمىن بەرۋ تۋرالى تۇرعىندار پىكىرىن ەسكەرۋ ماقساتىندا اۋداندىق ءماسليحاتتىڭ تۇراقتى كوميسسياسى مۇشەلەرىنىڭ جۇرتشىلىقپەن بىرلەسكەن وتىرىسى بولىپ ءوتتى. وندا اۋدان جۇرتشىلىعىنىڭ, قوعامدىق ۇيىمدار وكىلدەرىنىڭ پىكىرى تىڭدالدى. سونىمەن قاتار اۋدان ورتالىعى تاران سەلوسى مەن سەلولىق وكرۋگىنىڭ تاريحي اتاۋىن قايتا قالپىنا كەلتىرۋ, ياعني ايەت دەپ وزگەرتۋ تۋرالى جەرگىلىكتى تۇرعىندار پىكىرى تىڭدالدى. وندا اقىن اقىلبەك شاياحمەت قازىرگى تاران سەلوسى تۇرعان جەر بۇرىنعى دومبار بولىسىنان ءبولىنىپ شىققان ايەت بولىسى بولعان جەر ەكەنىن, ول كەيىن ۋاقىت, ساياسات ىقپالىمەن ۆيكتوروۆ, كەيىن تاران دەپ وزگەرتىلگەنىن ايتتى. سونىمەن قاتار ول وزەننىڭ ايەت دەگەن اتىنىڭ تاريحي مازمۇنىن دا ءتۇسىندىرىپ بەردى. سونىمەن ءبىر اۋىزدان قۇپتالىپ, قۇجاتتار رەسپۋبليكالىق ونوماستيكا كوميسسياسىنا جىبەرىلەتىن بولدى.
بريفينگتە تاران اۋداندىق ءماسليحاتى تۇراقتى كوميسسياسىنىڭ ءتورايىمى, اۋداندىق قوعامدىق كەڭەستىڭ ءتورايىمى ناتاليا رۋدنەۆا, «نۇر وتان» پارتياسى تاران اۋداندىق فيليالى توراعاسىنىڭ ءبىرىنشى ورىنباسارى, قوستاناي وبلىستىق ءماسليحاتىنىڭ دەپۋتاتى ايناش دادانوۆا, تاران اۋىلى جەرگىلىكتى قاۋىمداستىعى مۇشەسى گاۋحار اسانوۆا جانە وبلىستىق تىلدەردە دامىتۋ باسقارماسى باسشىسىنىڭ مىندەتىن اتقارۋشى قازىمبەك احمەتوۆ جۋرناليستەر سۇراقتارىنا جاۋاپ بەردى.
ءنازيرا جارىمبەت,
«ەگەمەن قازاقستان»
قوستاناي