وتكەن جىلى اتىراۋدا 42,3 ملن توننا مۇناي, 20,9 ملرد تەكشە مەتر ىلەسپە گاز ءوندىرىلدى. وكىنىشتىسى, وڭاي ولجا تاپقىسى كەلەتىندەر وسى سالانى كوپ توڭىرەكتەيدى. مۇناي ونىمدەرىنىڭ زاڭسىز اينالىمى بويىنشا كەلتىرىلگەن زالال قۇنى بيىل 52 ملن تەڭگەگە جەتكەن جانە بۇل تەك انىقتالعان قىلمىستارعا عانا قاتىستى بولىپ وتىر.
وبلىستىق پروكۋراتۋرانىڭ ءباسپاسوز قىزمەتى بەرگەن مالىمەتكە سۇيەنسەك, 2017 جىلى مۇناي جانە مۇناي ونىمدەرىن جىمقىرۋمەن بايلانىستى, سونداي-اق ولاردى زاڭسىز ساقتاۋ, تاسىمالداۋ جانە ساتۋمەن بايلانىستى 35 قىلمىس تىركەلىپ, ونىڭ 18-ءسى سوتقا جولدانعان. ال بيىلعى التى ايدا وسى ساناتتاعى قىلمىستاردىڭ سانى 14 بولدى, بەسەۋى سوتقا جولداندى.
پروكۋراتۋرامەن جۇرگىزىلگەن تالداۋ قىلمىستىق ىستەردى تەرگەۋ بارىسىندا مۇنايدىڭ نەمەسە مۇناي ونىمدەرىنىڭ شىققان جەرلەرى انىقتالمايتىنىن كورسەتكەن. تەرگەۋ تەك تاسىمالداۋشىلاردى انىقتاۋ دەڭگەيىمەن شەكتەلۋدە. ال شيكىزاتتىڭ باستاپقى جونەلتۋشىسى بۇركەمەلەنىپ, جابۋلى قازاق جابۋلى كۇيىندە قالىپ كەلەدى. وسىعان وراي وبلىستىق پروكۋراتۋرا قىلمىستىق جولمەن تابىلعان قارجىنى انىقتاۋدى جانە كىرىستى زاڭداستىرۋىنا قارسى ءىس-ارەكەت جاساۋدى قۇقىق قورعاۋ ورگاندارىنىڭ نازارىنا بەرگەن.
بۇل تۋرالى اتىراۋ وبلىستىق پروكۋراتۋراسىندا «مۇناي جانە مۇناي ونىمدەرىنىڭ اينالىمى سالاسىندا زاڭدىلىقتىڭ جاعدايى, سونىڭ ىشىندە وسى ساناتتاعى قىلمىستاردىڭ پروفيلاكتيكاسىنا, انىقتالۋىنا, تەرگەلۋىنە ءتيىمدى شارالاردى قابىلداۋ» تاقىرىبىندا وتكەن ۇيلەستىرۋ كەڭەسىندە ايتىلدى. شارادا باس پروكۋراتۋرا جانىنداعى قۇقىق قورعاۋ اكادەمياسىنىڭ وكىلدەرى «مۇناي جانە مۇناي ونىمدەرى سالاسىنداعى قىلمىستاردى انىقتاۋ جانە تەرگەۋ» عىلىمي-تاجىريبەلىك كەشەنىن تانىستىردى. ونەركاسىپ سالاسىنداعى كولەنكەلى ەكونوميكاعا قارسى كۇرەستىڭ ناتيجەلەرىن ارتتىرۋعا باعىتتالعان كەشەن ءىس جۇزىندە تيىمدىلىگىن كورسەتسە يگى.
باقىتگۇل باباش,
«ەگەمەن قازاقستان»
اتىراۋ