استانادا «قازاقستاننىڭ جاڭعىرتۋ ستراتەگياسى الەۋمەتتانۋلىق ولشەمدە: جاڭا قۇندىلىقتار, جاڭا جۇيەدەگى باعىت-باعدار, جاڭا زامان» تاقىرىبىمەن وتكەن قازاقستان الەۋمەتتانۋشىلارىنىڭ VI كونگرەسىندە الەۋمەتتانۋ عىلىمىنىڭ بۇگىنى مەن بولاشاعى ءسوز بولدى.
قوعامدىق دامۋ مينيسترلىگى مەن «قازاقستانداعى الەۋمەتتانۋشىلار قاۋىمداستىعى» قوعامدىق ۇيىمى ۇيىمداستىرعان ءىس-شارا اياسىندا جاس الەۋمەتتانۋشىلار فورۋمى, جەرگىلىكتى اتقارۋشى ورگاندار مەن جەرگىلىكتى باق وكىلدەرىنە ارنالعان ترەنينگتەر جانە تاجىريبەلى سەمينار وتكىزىلدى.
استانا قالاسىنىڭ 20 جىلدىعىنا ارنالعان پلەنارلىق وتىرىسقا پرەزيدەنت اكىمشىلىگى باسشىسىنىڭ ءبىرىنشى ورىنباسارى, قازاقستانداعى الەۋمەتتانۋشىلار قاۋىمداستىعىنىڭ پرەزيدەنتى مارات ءتاجين, قوعامدىق دامۋ ءمينيسترى, ساياساتتانۋ عىلىمدارىنىڭ دوكتورى دارحان كالەتاەۆ, حالىقارالىق الەۋمەتتانۋشىلار قاۋىمداستىعىنىڭ (حاق) ۆيتسە-پرەزيدەنتى, الەۋمەتتانۋ دوكتورى, ريو-دە-جانەيرو (برازيليا) فەدەرالدى ۋنيۆەرسيتەتىنىڭ پروفەسسورى, حاق Current Sociology جۋرنالىنىڭ رەداكتورى ەلويزا مارتين, جاپونيا, تۇركيا, رەسەي, ءباا, گەرمانيا وكىلدەرى, پارلامەنت دەپۋتاتتارى, مەملەكەتتىك ورگانداردىڭ, جوعارى وقۋ ورىندارىنىڭ, ساراپتامالىق قىزمەتتەردىڭ وكىلدەرى قاتىستى.
مارات ءتاجين ءتۇرلى عىلىمداردى توعىستىرعان سالانىڭ كوتەرەر جۇگى اۋىر ەكەنىن ايتا كەلىپ, جاڭعىرۋ ستراتەگياسىنداعى الەۋمەتتانۋشىلاردىڭ رولىنە توقتالدى. جيىندا «رۋحاني جاڭعىرۋ» باعدارلاماسىنىڭ بۇكىل قوعامدى قامتۋىنداعى الەۋمەتتانۋ عىلىمىنىڭ ءرولى ايتىلىپ, ەلباسى باعدارلاماسىنداعى قوعامدىق سانانى جاڭعىرتۋ مىندەتىنە الەۋمەتتانۋشىلاردىڭ دا قوسار ۇلەسى زور ەكەنى اتاپ ءوتىلدى. الەۋمەتتىك عىلىمي جۇمىستار ساپاسىنىڭ سىن كوتەرمەۋى, زەرتتەۋ جۇمىستارىنىڭ از جۇرگىزىلۋى, كەڭ كولەمدە جۇرگىزىلگەننىڭ وزىندە قوعامدىق قولدانىسقا ەنبەۋى دە وسى سالاداعى وزەكتى ماسەلەلەردىڭ ءبىرى. سوندىقتان جيىنعا قاتىسۋشىلار شەتەلدەن كەلگەن ساراپشى ماماندارمەن ءوزارا ءجيى تاجىريبە الماسۋ ماسەلەسىن كوتەردى. سونداي-اق ەلىمىزدەگى ۋرباندالۋ پروتسەسى ءسوز بولىپ, وعان از ۋاقىت ىشىندە ەلىمىزدىڭ ءار وڭىرىنەن جينالعان حالىقتىڭ تۇتاس ءبىر ەلوردانى قۇراعانى مىسال بولدى.
جيىندا ازاماتتىق قوعامدى دامىتۋ, «رۋحاني جاڭعىرۋ» باعدارلاماسىن ىسكە اسىرۋ جانە بۇۇ دامۋ باعدارلاماسى اياسىنداعى الەۋمەتتىك زەرتتەۋلەردىڭ تانىستىرىلىمى جونىندە پانەلدىك سەسسيالار ءوتتى.
ايتا كەتەيىك, كونگرەسس جۇمىسىنىڭ قورىتىندى ماتەريالدارى قازاقستانداعى الەۋمەتتانۋشىلار قاۋىمداستىعىنىڭ «الەۋمەتتانۋ-Sociology» جۋرنالىنىڭ ارنايى باسىلىمىندا جاريالانادى.
مايگۇل سۇلتان,
«ەگەمەن قازاقستان»