قر مەملەكەتتىك حاتشىسى گۇلشارا ابدىقالىقوۆا قىزىلوردانىڭ 200 جىلدىعىنا ارنالعان مەرەكەلىك ءىس-شارالارعا قاتىستى, دەپ حابارلايدى www.akorda.kz.
گ.ابدىقالىقوۆا ەلباسى ن.ءا.نازارباەۆتىڭ سالتاناتتى ءىس-شاراعا قاتىسۋشىلارعا ارنالعان قۇتتىقتاۋىن وقىپ بەردى. وندا قىزىلوردا ءوڭىرى ەجەلدەن قازاق ۇلتىنىڭ ۇيىسقان ورداسى بولعانى, بۇگىن دە سول ءمانىن ساقتاپ وتىرعانى اتاپ وتىلگەن. قوبىز اتاسى – قورقىت بابامىزعا توپىراق وسى دالادان بۇيىردى. بۇل جەردە قازاق جىرشىلىق ونەرىنىڭ مەكتەبى قالىپتاستى. سىرداريانىڭ جاعاسىندا جوعارى دامىعان قالالاردىڭ پايدا بولۋى كەزدەيسوق ەمەس. ەلىمىزدىڭ تۇڭعىش مادەني-اعارتۋ ورتالىعى بولعان قىزىلوردا وبلىسى بۇگىندە قازاقستاننىڭ دامىعان وڭىرلەرىنىڭ بىرىنە اينالدى. قازىرگى قىزىلوردا – تاۋەلسىزدىكتىڭ جانە بىرلىكتىڭ سيمۆولى.
قازاقستاندا ەلىمىزدىڭ ءۇشىنشى جاڭعىرۋى اۋقىمدى تۇردە جۇزەگە اسىرىلۋدا. ونىڭ ماڭىزدى باسىمدىقتارىنىڭ ءبىرى – «تسيفرلى قازاقستان» باعدارلاماسى. وسى باعدارلاما اياسىندا «Smartcity» تۇجىرىمداماسى ازىرلەندى. مۇندا «اقىلدى» جانە ءومىر سۇرۋگە ىڭعايلى قالا قالىپتاستىرۋدى كوزدەيتىن نەگىزگى باعىتتار, جوبالار مەن شەشىمدەر قامتىلعان. بيىل قىزىلوردا وبلىسى اقىلدى باسقارۋ تاجىريبەسى سىننان وتەتىن ايماق بولىپ بەلگىلەندى. وسى ماقساتپەن 33 جوبانى جۇزەگە اسىرۋ جوسپارلانىپ وتىر.
جۇمىس ساپارى بارىسىندا مەملەكەتتىك حاتشى بىرقاتار الەۋمەتتىك نىسانداردىڭ جۇمىسىمەن تانىستى. گ.ابدىقالىقوۆا «رۋحاني جاڭعىرۋ» وبلىستىق ورتالىعىنىڭ سالتاناتتى اشىلۋ راسىمىنە قاتىستى, سونداي-اق ءا.تاجىباەۆ اتىنداعى كىتاپحانانىڭ IT-پاركىن, نازارباەۆ زياتكەرلىك مەكتەبىن, دوستىق ءۇيىن ارالاپ كوردى.
مەرەكەلىك ءىس-شارادان سوڭ ەلىمىزدىڭ بەلگىلى ارتىستەرى مەن جەتەكشى ونەر ۇجىمدارىنىڭ قاتىسۋىمەن ۇلكەن گالا-كونتسەرت ءوتتى.