«ەگەمەن قازاقستان» گازەتىنىڭ باسشىسى دارحان قىدىرالى الماتىدا «جاس وركەن» سەرىكتەستىگىنە قارايتىن «بالدىرعان», «اق جەلكەن» جۋرنالدارى مەن «ۇلان», «درۋجنىە رەبياتا» گازەتتەرىنىڭ رەداكتسياسىندا ارنايى قوناق بولدى.
رەداكتسيا ۇجىمىمەن كەزدەسىپ, پىكىرلەستى. بالالار باسىلىمدارىنا قولداۋ ءبىلدىرۋ كەرەكتىگىنە باسا نازار اۋداردى. «باسىلىمدارعا كۇشتەپ جازدىرۋعا مەن دە قارسىمىن. بىراق, بالالار باسىلىمىنا كەلگەندە كوزقاراسىم ءسال باسقاشا. ويتكەنى ەرەسەك ادامدار وزىنە نە كەرەك ەكەنىن بىلەدى, ال ءالى كوزقاراسى قالىپتاسپاعان بالالارعا باعىت-باعدار بەرگەن دۇرىس. ءوزىمىز وسى بالالار باسىلىمدارىمەن وستىك», – دەگەن ول فاريزا اپايلاردى كورۋ, ساباقتان بوس ۋاقىتتا وسى رەداكتسيالارعا كەلىپ حات قورىتۋ دا وزىنشە قىزىق بولعانىن اتاپ ايتتى.
سونىمەن قاتار, ەلدەگى ەڭ ءىرى باسىلىمدى باسقارۋ تاجىريبەسىمەن ءبولىسىپ, “ەگەمەندى” زامان تالابىنا ساي, باسەكەگە قابىلەتتى گازەت رەتىندە جاڭعىرتۋ ءۇشىن الەمدىك باسىلىمداردىڭ تاجىريبەسى زەرتتەلگەنىنە توقتالدى. «The New York Times», «Washington post» باسىلىمدارى نەگىزگى نازارعا الىنعانىن ايتتى. سوڭىندا «جاس وركەندىك» جاستاردى «ەگەمەننىڭ اكادەمياسىنا» شاقىردى.
باس باسىلىم باسشىسى سوزبەن عانا ەمەس, ىسىمەن دە قولداۋ ءبىلدىرىپ, 2019 جىلعا ءتورت باسىلىمعا دا جازىلىپ قايتتى.