قۇرلىقتىق حوككەي ليگاسىنداعى (قحل) كەزەكتى ماتچىن ماسكەۋدە وتكىزگەن استانانىڭ «بارىسى» جەرگىلىكتى «دينامونى» وۆەرتايمدا 3:2 ەسەبىمەن جەڭدى.
بۇل كەزدەسۋ وتە شيەلەنىستى ءوتتى. ءبىرىنشى كەزەڭدە ەسەپ اشىلعان جوق. ۇزىلىستەن كەيىن كانادالىق لەگيونەر مەتتيۋ فرەتتين «بارىستى» العا شىعارسا, كوپ ۇزاماي يليا نيكۋلين تارازى باسىن تەڭەستىردى. ءۇشىنشى كەزەڭدى ايدىن يەلەرى ەكپىندى شابۋىلدارمەن باستادى. ناتيجەسىندە باسەكەنىڭ 47 مينۋتىندا يۋسو حيەتانەن نىسانانى ءدال كوزدەپ, «مەگاسپورت» كەشەنىنە جينالعان كورەرمەندەردى ءبىر قۋانتىپ تاستادى. الايدا استانالىقتار دا قاراپ قالعان جوق. 53 مينۋتتا قورعاۋشى كەۆين داللمەن ءوز مۇمكىندىگىن ءمۇلت جىبەرمەدى. نەگىزگى ۋاقىتتا جەڭىمپاز انىقتالماعاننان سوڭ كەزدەسۋ وۆەرتايمعا ۇلاستى. بۇل رەتتە جەرلەستەرىمىزدىڭ جولى بولدى. 64 مينۋتتا مەتتيۋ فرەتتين تاعى دا مەرگەندىك تانىتىپ, ءوز كومانداسىنا جەڭىس سىيلادى.
قازىرگى كەزدە قحل-دىڭ تۇراقتى بىرىنشىلىگىندە «بارىس» 11 ورىندا كەلەدى. وسى كۇنگە دەيىن 9 كەزدەسۋ وتكىزىپ ۇلگەرگەن استانالىق كلۋبتىڭ ەنشىسىندە 11 ۇپاي بار.
عالىم سۇلەيمەن,
«ەگەمەن قازاقستان»