لاس-ۆەگاستا وتكەن جەكپە-جەكتە مەكسيكالىق ساۋل الۆارەستەن ۇتىلعان قازاقستاندىق كاسىپقوي بوكسشى گەننادي گولوۆكين ESPN-ءنىڭ P4P رەيتينگىندە ءبىر ساتىعا تومەندەپ, قازىرگى كەزدە ءتورتىنشى ورىندى قاناعات تۇتۋدا.
ۇزدىكتەر كوشىن 30 جاستاعى ۆاسيلي لوماچەنكو باستاپ تۇر. جەڭىل سالماقتا كۇش سىناسىپ جۇرگەن ۋكراينا بوكسشىسى بەس جىلعا جۋىق ۋاقىت ارالىعىندا 12 جەكپە-جەك وتكىزىپ, 11 رەت جەڭىسكە جەتتى. 9 قارسىلاسىن ايقىن باسىمدىقپەن ۇتتى. ەكىنشى ورىندى تەرەنس كروۋفورد يەلەنۋدە. ول دا 30 جاستا. جارتىلاي ورتا سالماقتاعى اقش-تىڭ وكىلى 33 مارتە شارشى الاڭعا شىعىپ, بارلىق باسەكەنى ءوز پايداسىنان شەشتى. 24 كەزدەسۋدە نوكاۋت بەلگىلەندى. ءۇشىنشى ورىندا – ساۋل الۆارەس. 28 جاستاعى مەكسيكانىڭ ماقتانىشى GGG-ءنى ۇتقاننان كەيىن ۇزدىكتەر قاتارىنان قوسىلدى. ول 53 مارتە رينگكە كوتەرىلىپ, 50 جەكپە-جەكتە ۇستەمدىك تانىتتى. 34 قاسرىلاسىن ەسىنەن تاندىردى. 1 رەت ۇتىلىپ, 2 رەت تەڭ ءتۇستى.
سونداي-اق, «توپ-10» بوكسشىنىڭ قاتارىندا قازاقستاندىق گەننادي گولوۆكين (38-1-1, 34 كو), امەريكالىق ەررول سپەنس (24-0, 21 كو) پەن مايكي گارسيا (39-0, 30 كو), جاپونيالىق ناويا ينوۋە (16-0, 14 كو), تايلاندىق سريساكەت سور رۋنگۆيساي (45-4-1, 40 كو), ۋكراينالىق الەكساندر ۋسيك (15-0, 11 كو) جانە ۇلىبريتانيالىق ەنتوني دجوشۋا (21-0, 20 كو) سىندى ساڭلاقتار بار.
عالىم سۇلەيمەن,
«ەگەمەن قازاقستان»