ەلباسىنىڭ تۇركىستان وبلىسى تۋرالى جارلىعى شىققالى بەرى رەداكتسيامىزعا ەل وڭىرلەرىنەن ريزاشىلىققا تولى حاتتار لەگى تولاستاعان ەمەس. الىس-جاقىن باۋىرلاس ەلدەردىڭ مەملەكەت جانە قوعام قايراتكەرلەرى دە بۇل شەشىمدى زور قۋانىشپەن قارسى الىپ, تۇگەل تۇركىنىڭ تۇپقازىعى, كيەلى ورداسى سانالاتىن تۇركىستاننىڭ قايتا تۇلەيتىندىگىنە ريزاشىلىقتارى مەن قولداۋ پىكىرلەرىن جولداعانى ءمالىم. ولاردىڭ كوپشىلىگىن گازەتىمىزدىڭ بەتىندە جاريالاعان بولاتىنبىز. وسىنداي تاعى ءبىر ەرەكشە حات رەداكتسيامىزعا كەشە كەلىپ ءتۇستى. تىلەگى ءبىر تۋىسقان مەملەكەتتەر – قازاقستان, تۇركيا, ازەربايجان, وزبەكستان جانە قىرعىزستاننىڭ قالامگەر-قايراتكەرلەرى قول قويعان بۇل حات بارشا تۇركى جۇرتىن تۇركىستاندى تۇلەتۋگە ۇندەيدى. ءبىز وسى ۇندەۋ-حاتتى نازارلارىڭىزعا ۇسىنىپ وتىرمىز.
ۇلى دالا ەلىندە, قارا شاڭىراق قازاقستاندا بيىلعى ماۋسىم ايىندا تاريحي تاعىلىمى تەرەڭ, تاڭعاجايىپ جاڭالىق بولدى.
الەمدەگى ەڭ جاڭاشىل, باستاماشىل باسشىلاردىڭ بىرەگەيى, قازاقستاننىڭ عانا ەمەس, تۇتاس تۇركى دۇنيەسىنىڭ كوشباسشىسى اتانعان نۇرسۇلتان نازارباەۆتىڭ جارلىعىمەن تۇركىستان وبلىسى قۇرىلدى. شىرايلى شىمكەنت شاھارىنا ءۇشىنشى ءىرى مەگاپوليس رەتىندە رەسپۋبليكالىق مارتەبە بەرىلىپ, تۇركى الەمىنىڭ تەكتى ءتورى تۇركىستان قالاسى ءوڭىر ورتالىعىنا اينالدى.
قازاقستان پرەزيدەنتى ءوزىنىڭ جارلىعىندا تۇركىستان وبلىسى قانداي ماقساتتا قۇرىلعاندىعىن ايقىنداپ, تۇركىستاندى تۇركى الەمىنىڭ مادەني-رۋحاني ورتالىعى رەتىندە جان-جاقتى دامىتۋدىڭ اسا قاجەتتىلىگىن انىق اتاپ كورسەتكەن.
وسىناۋ جاسامپاز جاڭالىق, ءمان-ماڭىزى زور وقيعا قارا شاڭىراق يەسى قازاق حالقىنىڭ, كۇللى قازاقستاندىقتاردىڭ بابالار اماناتىنا ادالدىعىنان, ەلباسىنىڭ ەرەندىگىنەن, كەلەشەكتى كورە بىلگەن كەمەڭگەرلىگىنەن تۋىنداپ وتىر.
تۇركىستان ۇعىمى – ۇلى ۇعىم. تۇركىستان دەگەندە بۇكىل تۇركى الەمى, تۇركى قاعاناتى, تۇركىلىك تەگىمىز, تۇركىلىك ءتۇبىرىمىز, تۇركىلىك تامىرىمىز ويعا ورالادى. جادىمىزدى جاڭعىرتادى. بارشامىزدىڭ بويىمىزدى سەرپىلىس سەزىمى كەرنەپ, رۋحىمىز اسقاقتايدى. تۇركىستان دەگەن ءسوز جاڭعىرۋعا, جاڭارۋعا شاقىرادى. مىنە, سوندىقتان دا تۇركىستان وبلىسىنىڭ قۇرىلۋى, تۇركىستان شاھارىنىڭ ۇلكەن ءۋالايات ورتالىعىنا اينالۋى – تۇگەل تۇركىنىڭ رۋحىن بيىكتەتەتىن بىرەگەي قۋانىش.
تاريحتان ايان, تۇركى حالىقتارى جۇزدەگەن جىلدار بويى وتارشىلدىقتىڭ, باسقىنشىلىقتىڭ تاقسىرەتىن تارتتى. قاسىرەتتەرىن شەكتى. سۇرقيا ساياساتتاردىڭ سالدارىنان تۇركى تاريحى مەن مادەنيەتى, تۇركى ءتىلى مەن جازۋى ورنى تولماستاي ويسىرادى. وتارشىلدار تۇركى حالىقتارىنىڭ ەلۋگە جۋىعىن جاۋلاپ الىپ, اياۋسىز ەزىپ-جانشىدى. جارتىسىنان استامى جويىلىپ كەتتى. قالعاندارىنىڭ كوپشىلىگى شالاجانسار كۇيگە ءتۇستى. تاڭعاجايىپ تىلدەرىنەن, قايتالانباس سالت-داستۇرلەرىنەن, جادىلارىنان جاڭىلدىرىلدى.
بارلىق تۇركى حالىقتارى سياقتى قازاق ۇلتى دا قانقاساپ قىرعىنداردى باستان كەشتى. قارا شاڭىراق يەسى رەتىندە كوبىرەك كۇيزەلىسكە ۇشىراپ, گەنوتسيدكە دۋشار بولدى. حح عاسىردىڭ باسىنان ورتا تۇسىنا دەيىن بىرىنەن كەيىن ءبىرى قايتالانعان قاسىرەتتەردەن, قولدان ۇيىمداستىرىلعان اشارشىلىقتان بەس ميلليون قازاق قىرىلدى. الاش ارداقتىلارىنىڭ تۇركىستان مەملەكەتى, تۇركىستان رەسپۋبليكاسى حاقىنداعى ارمان-اڭسارلارى دا, ناقتى ارەكەتتەرى دە, ىزگىلىكتى يدەيالارى مەن ماقسات-مۇراتتارى دا ساياسي قۋعىن-سۇرگىنگە ءتۇستى.
تاۋەلسىزدىكتىڭ, كوشباسشى كورەگەندىگىنىڭ ارقاسىندا كەڭ پەيىلدى, كوركەم مىنەزدى, جانى جومارت قازاق حالقى, بارشا قازاقستاندىقتار – قارا شاڭىراق قازاق ەلى دۇنيە جۇزىندەگى داڭقتى مەملەكەتكە اينالدى. سوندىقتان دا تۇركىستاننىڭ تىڭ تىنىس اشقانى – تەك قازاقتاردىڭ عانا ەمەس, تۇتاس تۇركىنىڭ ماقتانىشى, مەرەيى.
ەۋرازيا كىندىگىندەگى كەرەمەت ەلوردا – استانا قالاسى جاقىندا عانا جيىرما جىلدىعىن مەرەكەلەدى. قازاقستان. تاۋەلسىزدىك. نازارباەۆ. استانا. تۇركىستان! بۇل ايشىقتى دا اسىل ۇعىمدار بۇكىل الەمگە ايگىلى. قالامگەرلەر قاۋىمىنا ايرىقشا قىمبات. قاسيەتتى. ەلوردا – ەلباسى ەرلىگى. وسىناۋ وي دا مانەرلى ماقاممەن, ماقتانىشپەن ايتىلادى. ءجيى جازىلادى. شىنىندا دا قازاقستان جەر جۇزىنە تاۋەلسىزدىك پەن نازارباەۆ جانە استانا ارقىلى كەڭىنەن تانىلدى. استانا – ۇلى دالا ەلىنىڭ ابىرويى. ىرگەتاسى ەسىلدىڭ سول جاعالاۋىندا ءVىىى-ءىح عاسىرلاردا قالانعان, تاريح تەرەڭىنەن تاعىلىم تارتاتىن استانا اقوردانىڭ قۇتتى قونىسىنا, «قازاقستاندىق جولدىڭ» جاسامپاز باستاۋىنا اينالدى.
استانا بۇكىل الەمگە باياندى بەيبىتشىلىك پەن كەلىسىم, تاتۋلىق پەن تۇراقتىلىق ورتالىعى رەتىندە ايان. تۇركى دۇنيەسىنىڭ تەكتى ءتورى تۇركىستانداعى ازىرەت سۇلتان كەسەنەسىندە قازاقتىڭ 21 حانى,
8 سۇلتانى, 19 ءبيى, 52 باتىر قولباسشىسى جەرلەنگەن. تەكتى ءتوردى رۋحى تەربەتكەن احمەت ياساۋي بابامىز: ء«وز دىنىڭدەگىنى دوس تۇت, وزگە دىندەگىلەردى دە دۇشپان تۇتپا», دەگەن. ەلباسى نۇرسۇلتان نازارباەۆتىڭ باستاماشىلدىعى ناتيجەسىندە الەمدىك جانە ءداستۇرلى دىندەر ليدەرلەرىنىڭ سەزدەرى بۇعان دەيىن دە بەس مارتە وتكىزىلدى. بيىلعى التىن كۇزدە التىنشى رەت استانا تورىندە ۇيىمداستىرىلماق. قازاقستان باسشىسى, ەلباسى ەلوردانىڭ جيىرما جىلدىق سالتاناتىندا ماعلۇمداعانداي-اق, ەقىۇ-نىڭ تاريحي سامميتىنەن كەيىن «استانا رۋحى» ۇعىمى دۇنيەجۇزىلىك ساياساتقا بەرىك ەندى. وشپەستەي ورنىقتى. بىرەگەي ەكونوميكالىق, ىنتىماقتاستىق فورۋمدارى, بىلتىر عانا وتكەن ەكسپو-2017, تاعى باسقا ءىرى-ءىرى ىزگى شارالار جيىرما جىلدا استانانى ادامزات دامۋىنا ىقپال ەتەتىن جانە تاريحي تەكتى شەشىمدەر قابىلداناتىن جاھاندىق ورتالىققا, الەمدىك ينتەگراتسيانىڭ, قاۋىپسىزدىك پەن بىتىمگەرشىلىكتىڭ ەپيتسەنترىنە اينالدىردى.
تۇتاس تۇركى تۋىسقاندارىمىز, بۇكىل باۋىرلارىمىز, اسىرەسە, اقىن-جازۋشىلارىمىز بەن عالىمدارىمىز ايتىپ تا, جازىپ تا جۇرگەندەي, استانا – تۇركى الەمىنىڭ جۇرەگى.
ءيا, استانا – تۇركى الەمىنىڭ جۇرەگى, ال تۇركىستان – تۇركى الەمىنىڭ رۋحاني تىرەگى. سوندىقتان دا تۇركىستاندى تۇركى دۇنيەسىنىڭ مادەني-رۋحاني استاناسىنا اينالدىرۋ – بارشامىزدىڭ باستى ماقساتىمىز. تۇركىلەردىڭ ءتۇپ قازىعى, اتاجۇرتى, تۇركى قاعاناتتارىنىڭ تۋى تىگىلگەن تۇركىستان, قازاق حاندىعىنىڭ قانشاما جىلدار بويى استاناسى, ۇلى جىبەك جولىنىڭ باس قالاسى بولعان تۇركىستان, دانىشپان ويشىلىمىز, دارا دا دانا شايىرىمىز, ءدىني-رۋحاني ۇلى ۇستازىمىز احمەت ءياساۋيدىڭ اسىل سۇيەگىن ايالاي تەربەتكەن تۇركىستان 2017 جىلى تۇركى الەمىنىڭ مادەني استاناسى بولعانى ءمالىم. وسى ورايدا تۇگەل تۇركىنى تامساندىرعان 40-تان استام يگى ءىس-شارالار وتكىزىلدى. نۇرسۇلتان نازارباەۆ تۇركسوي تۇركى الەمىنىڭ يۋنەسكو-سىنا اينالۋى تيىستىگىن ايتقان بولاتىن. اقيقاتىندا وسى ماقسات ويداعىداي جۇزەگە اسىپ كەلەدى.
قارا شاڭىراق قازاقستاننىڭ پرەزيدەنتى – ەلباسى ەرەكشەلەپ كورسەتكەندەي, تۇركىستان شاھارىنىڭ, تۇركىستان ءۋالاياتىنىڭ كەلەشەگى كەمەل دە كوركەم. تاياۋ بولاشاقتا تۇركىستان دا اجارلى, استانا سياقتى جان-جاقتى وركەندەگەن, كوركەمدەنگەن, كەلبەتى كەلىستى, وركەنى ءورىستى, وزگەشە ورتالىق بولاتىنى انىق.
ول ءۇشىن, ارينە, بۇكىل تۇركى دۇنيەسىنىڭ قولداۋى مەن قامقورلىعى قاجەت. بىلتىر, ياعني 2017 جىلى تۇركىستان تۇركى الەمىنىڭ مادەني استاناسى بولعان كەزدە بارلىق باۋىرلاس ەلدەردەن مەيماندار ءبىراۋىزدان: «رۋحاني جاڭعىرۋ – تۇتاس تۇركى دۇنيەسىنىڭ تەڭدەسسىز ولجاسى» دەپ باعالاعانى بەلگىلى. شىنتۋايتىندا, دۇنيە جۇزىندە دۇربەلەڭ وقيعالاردىڭ, كۇردەلى دە كۇرمەۋلى, قيلى دا قيىن قۇبىلىستاردىڭ بەلەڭ الۋى ادامزاتتىڭ رۋحاني السىرەۋىنەن, قۇندىلىقتاردىڭ قۇلدىراۋىنان بولىپ وتىرعانى ايان.
ءبىز وسى ماقالانى جازا وتىرىپ, ەڭ الدىمەن سول رۋحاني السىرەۋدەن, قۇندىلىقتاردىڭ قۇلدىراۋىنان باتىل ارىلۋعا باعىت الۋ كەرەكتىگىنە نازار اۋدارساق دەيمىز. وسى ورايدا تۇركىستان رۋحى, رۋحاني جاڭعىرۋ مۇراتتارى العا ۇمتىلۋعا اسىل ارنا, التىن ارقاۋ بولا الادى. سوندىقتان دا تۇركى دۇنيەسىنىڭ ەل تىزگىندەرىن ۇستاعان ەرەندەرىن, كەلەشەكتى كەڭىنەن ويلاي بىلەتىن كەمەلدەرىن, عالىمدارى مەن مادەنيەت, ادەبيەت جانە ونەر وكىلدەرىن, بارشا بيزنەسمەندەرى مەن كۇللى كاسىپ يەلەرىن, مەملەكەتتىك جانە جەكەمەنشىك مەكەمەلەر مەن قوعامدىق جانە ساياسي, سونداي-اق ءدىني بىرلەستىكتەردى, جاستاردى تەكتى ءتورىمىز تۇركىستاندى تۇلەتۋگە بەلسەنە ۇلەس قوسۋعا شاقىرامىز. كۇنى كەشە عانا تۇركى تىلدەس مەملەكەتتەردىڭ قىرعىزستاندا وتكەن ءVى سامميتىندە نۇرسۇلتان نازارباەۆ تۇركى رۋحىن, تۇركىستاندى بىرلەسە بيىكتەتۋ تۋرالى ۇسىنىستار ءبىلدىردى.
تۇركىستان يدەياسى, تۇركىستاندى رۋحى تەربەتكەن احمەت ياساۋي مۇراتتارى ارقىلى, تۇركى الەمىنىڭ كوشباسشىسى نۇرسۇلتان نازارباەۆ ۇسىنعان رۋحاني جاڭعىرۋ ماقساتتارىن تەرەڭ ۇعىنىپ, ويداعىداي ورىنداۋ ارقىلى ادامزات دامۋىنا ايشىقتى اسەر ەتۋگە, ىزگىلىك جولىمەن ىلگەرى جىلجۋدا سەرپىلىس جاساۋعا ابدەن بولادى دەگەن سەنىمدەمىز.
«قازىرگى كەزدە الەم قارسى تۇرۋشىلىقتارعا ەمەس, ۇيلەسىمدىلىككە, دامۋ مەن ىنتىماقتاستىققا مۇقتاج. سوندىقتان استانا شاشقان ىزگىلىك پەن قازاقستاندىق قۇندىلىقتاردىڭ نۇرى بۇكىل پلانەتاعا تاراپ, ريزاشىلىقتى شۇعىلا رەتىندە قايتا ورالىپ جاتىر», دەدى قازاقستان پرەزيدەنتى ەلوردانىڭ جيىرما جىلدىعىندا. استانا نۇرىن تۇركىستان مۇراتتارىنىڭ رۋحاني نارىمەن نىعايتا ءتۇسۋدىڭ ناتيجيەلەرى مول بولاتىنىن تەرەڭ تۇسىنگەن ابزال.
بۇگىنگى ۇرپاقتار بىلە بەرمەيتىن بۇرىنعى كەزدەردەگى سۇرقيالىقتار از ەمەس, اعايىندار. سونداي ساياساتتىڭ سارقىنشاقتارى مەن سالدارىنان باتىل جانە جىلدامىراق ارىلۋ اسا قاجەت دەپ سانايمىز. ماسەلەن, 1944 جىلى ۆكپ(ب) ورتالىق كوميتەتىنىڭ قۇپيالانعان قاۋلىسى بويىنشا تۇركى حالىقتارىنىڭ تاريحىن زەرتتەۋگە, ءتىپتى ايتىپ-جازىپ قاراستىرۋعا مۇقىم-مۇلدە تىيىم سالىندى. سونىڭ سالدارىنان بۇرىنعى وتارشىلدار مەن باسقىنشىلار اسقىندىرا بۇرمالاعان, ادەيى وزگەرتكەن تۇركىلەردىڭ تاريحى ودان سايىن بۇرمالاندى, ب ۇلىڭعىر تارتتى.
ەندى مىنە, تۇركى الەمىنىڭ تاريحى مەن ادەبيەتىن, مادەنيەتى مەن ونەرىن, سالت-داستۇرلەرىن, ءتىلى مەن ءدىلىن تۇبەگەيلى تۇردە, تۇركىستاندىق تەكتىلىكپەن, تۇتاسا, تۇتاستىرا, تۇگەندەي تانىماق, بىرلەسە زەرتتەپ-زەردەلەمەك, ۇرپاقتار يگىلىگى, بولاشاق قامى ءۇشىن اينالىمعا ءتۇسىرىپ, يگەرىپ-مەڭگەرمەك مىندەتتەرى تۋىنداپ وتىر. تۇركى الەمىنىڭ مادەني استاناسى اتانىپ, ايتۋلى شارالار وتكىزىلگەن استانا قالاسىندا, تۇركيانىڭ ەسكىشاھار, تاتارستاننىڭ قازان, تۇركىمەنستاننىڭ مارى, ازەربايجاننىڭ شەكي شاھارلارىندا جانە تۇركىستاندا, باسقا دا باسقوسۋلاردا ورتاعا سالىنعان وي-پىكىرلەردى, پاراساتتى پايىمداردى, ۇتىمدى ۇسىنىستاردى سارالاپ, سۇرىپتاپ, جۇيەلى تۇردە جۇزەلەمەك كەرەك.
تۇركىستان شاھارى باعزى زامانداردان-اق تۇركىلەردىڭ تەكتى ورتالىعى بولعان. پاتشالىق رەسەي مەن كەڭەستىك كەزەڭدە جۇدەپ-جاداپ كەتكەنى, ءتىپتى ازىرەت سۇلتان كەسەنەسىنىڭ كۇمبەزى استىنداعى اقشاڭقان شىراعداندارعا وق اتىلعانى, بەرتىندە اسىل مۇرانىڭ اياقاستى بولىپ, قورلانعانى, تايقازانىنان, تاعى باسقا جاۋھار جادىگەرلەرىنەن ايىرىلعانى ءمالىم.
ال ەجەلگى زامانداردا نەبىر پاراساتى بيىك پاتشالار, قايتپاس-قايسار قاعاندار, حالىق قامىن جەگەن حاندار, ەل قورعاعان قولباسشىلار, ءادىل بيلەر مەن قازىلار, عۇلاما عالىمدار مەن اقيىق اقىن-جازۋشىلار تەكتى ءتورىمىزدى كورىپ قۋاناتىن, ۇلگى الاتىن, ءپىر تۇتاتىن بولعان. تۇركىستان, احمەت ياساۋي بابامىز بادىزدەگەندەي, تەكتى تورگە, ءابۋ ناسىر ءال-فارابي دانامىز دايەكتەگەندەي, قايىرىمدى قالاعا اينالسا دەپ ارماندايمىز, اعايىندار.
قارا شاڭىراق قازاقستان تاۋەلسىز ەل بولعاننان كەيىن تۇركىستان شاھارىندا تۇركيانىڭ مەملەكەت باسشىلارى تۇرعۇت ءوزال, سۇلەيمەن دەميرەل, ابدوللا گۇل, رەجەپ تايپ ەردوعان, تاعى باسقالار بولدى. ابدوللا گۇل نۇرسۇلتان نازارباەۆقا تۇركى الەمىنىڭ اقساقالى رەتىندە ارنايى اساتاياق ۇستاتتى.
ءبىز قازاقستان پرەزيدەنتى نۇرسۇلتان نازارباەۆ پەن تۇركيا پرەزيدەنتى سۇلەيمەن دەميرەل قازىعىن قاققان قوجا احمەت ياساۋي اتىنداعى قازاق-تۇرىك ۋنيۆەرسيتەتى زامانۋي زاۋ-زاڭعار, شاڭقان شاڭىراققا اينالادى دەپ ويلايمىز. تۇركى الەمىنىڭ جاستارىنا شىن مانىندەگى ساپالى دا تەرەڭ ءبىلىم بەرەتىن جانە ناعىز عىلىمي, مادەني-رۋحاني ورتالىق ەتپەكتىڭ ەرەكشە جولدارى قاراستىرىلىپ, ناقتىلى جۇمىستار اتقارىلادى دەپ سەنەمىز. ادامزاتتىڭ, ونىڭ ىشىندە تۇركىنىڭ ۇلى ۇستازدارى, دارا دانالارى ءابۋ ناسىر ءال-فارابي مەن احمەت ءياساۋيدىڭ, باسقا دا ءىرى-ءىرى, ىزگى تۇلعالاردىڭ مۇرالارىن بولاشاقپەن بايلانىستىرا, جان-جاقتى زەرتتەۋدىڭ دە ۇيلەسىمدى, ۇلگىلى ءۇيى وسى ۋنيۆەرسيتەت بولسا دەيمىز. جالپى حقتۋ مەن جاڭادان سالىناتىن ياساۋي مۋزەيى تۇركىتانۋ, تۇركى الەمىنىڭ تاريحى, ءتىلى مەن ادەبيەتى, مادەنيەتى مەن ونەرى, تۇركى حالىقتارىنىڭ سالت-داستۇرلەرى جونىندەگى بارلىق ورتاق قۇندىلىقتاردى جيناقتاپ, جۇيەلەيتىن جانە جان-جاقتى دامىتۋ باعدارلارىن ايقىندايتىن ايرىقشا ايدىنعا اينالا الادى. سايىپ كەلگەندە, تەكتى ءتورىمىز تۇركىستانداعى ازىرەت سۇلتاندايىن اۋليەلەر اۋليەسىنىڭ ەسىمىن ەنشىلەگەن ۋنيۆەرسيتەت تازا تاعلىمدى, ءمولدىر ماقساتتى, وزگەلەردەن وزگەشە ونەگەلى, تۇركىنىڭ تورقۇتى تۇعىرىنا قونسا, قانەكي.
كسرو قۇرامىندا كوپ قيىندىقتار كورگەن تۇركى ەلدەرى ەگەمەندىككە قول جەتكىزگەلى ءوزارا قارىم-قاتىناستار شىنايى سيپات الا باستادى. تۇركيانىڭ, قازاقستاننىڭ, ازەربايجاننىڭ, وزبەكستاننىڭ, قىرعىزستاننىڭ, تۇركىمەنستاننىڭ, تاتارستاننىڭ, تاعى باسقا تۋىستاس ەلدەردىڭ بارىس-كەلىستەرى, باۋىرلاس قالالار مەن وڭىرلەردىڭ, اۋدان-ايماقتاردىڭ ارالاسۋى جيىلەدى. ماسەلەن, 2018 جىل وزبەكستاننىڭ قازاقستانداعى جىلى, 2019 جىل قازاقستاننىڭ وزبەكستانداعى جىلى بولىپ جاريالاندى. ەكى مەملەكەتتە دە مەرەيلى شارالار ۇيىمداستىرىلىپ, ءتيىمدى تىرلىكتەر تىندىرىلۋدا. مۇنداي ۇردىستەر جاراسىمدى جالعاسىن تاپسا, نۇر ۇستىنە نۇر.
قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ تاپسىرمالارىن ورىنداۋدا تىنىمسىز تىرلىكتەر تىندىرىپ جۇرگەن تۇركىستان وبلىسىنىڭ تۇڭعىش اكىمى جانسەيىت تۇيمەباەۆتىڭ باسشىلىعىمەن تۇركىستان قالاسىندا باستالعان جاسامپاز جۇمىستارعا ساتتىلىك تىلەيمىز. ازىرەت سۇلتان كەسەنەسىنىڭ اينالا-توڭىرەگىنە جاقىن جاڭا قۇرىلىستاردىڭ احمەت بابا كۇمبەزىنەن بيىك بولمايتىنى, جاڭادان سالىناتىن ياساۋي مۋزەيىنىڭ تاريحي-تانىمدىق جانە زاماناۋي تالاپتارعا سايكەس جوسپارلانۋى, تەكتى ءتورىمىز تۇركىستاننىڭ باس جوسپارى جاسالىپ جاتقانى, قالانى تۇركى الەمىنىڭ مادەني-رۋحاني ورتالىعى رەتىندە دامىتۋدىڭ ۇزدىك تۇجىرىمداماسىنا حالىقارالىق بايقاۋ جاريالانعانى – ءبارى-ءبارى وتە-موتە قۇپتارلىق. تۇركىستاننىڭ تۋريستىك الەۋەتىن ەسەلەپ ارتتىرۋعا ايرىقشا كوڭىل بولىنەتىنى دە شاتتاندىرادى. بۇل ءۇشىن تۇركيانىڭ تۋريستىك يندۋسترياسى باستى نەگىزگە الىنباق. تەكتى ءتورىمىزدى جىل سايىن بەس ميلليونعا دەيىن تۋريست تاماشالايتىنى شابىتتاندىرادى ءبىزدى. زاماناۋي اۋەجاي, اۆتوۆوكزال, تەمىر جول قۇرىلىستارى, باسقا دا دۇنيەلەر مەجەلەنۋدە. سونداي-اق تۇركىستاندا باعزىدا بولعان تاريحي ءتورت قاقپا قۇرىلىسى دا قولعا الىنادى دەگەن سەنىمدەمىز.
احمەت ياساۋي قارا شاڭىراق قازاقستان جەرىندەگى سايرامدا دۇنيەگە كەلدى. تۇركىستان توپىراعىندا ماڭگىلىك مەكەنىن تاپتى. «مەن اۋەلى تۇركىمىن, سونسوڭ مۇسىلمانمىن», دەدى. تاعى دا: «ىشتەرىندە قۋلىق تولعانداردىڭ, كوكىرەكتەرىندە ار-ۇيات سولعانداردىڭ جۇرەكتەرى دىرىلدەمەيدى», دەگەن.
تۇركىستان ءۋالاياتىنىڭ قۇرىلعانىنا, تۇركىستان شاھارىنىڭ ءوڭىر كىندىگى بولعانىنا بۇكىل تۇركى جۇرتى تۇگەلدەي جۇرەك تەبىرەنتە قۋانىپ, تەكتى ءتورىمىزدى تۇلەتۋگە شىن ىقىلاسپەن ۇلەس قوسادى دەگەن تىلەكتەمىز.
نۇرسۇلتان نازارباەۆ مەڭزەگەندەي, استانا ءححى عاسىرداعى داۋىرلەۋىمىزدىڭ اق باستاۋى بولسا, تۇركىستان تىڭ تىنىستار اشاتىن تەكتىلىكتىڭ قۇنارلى قاينارى بولا بەرسىن.
مارحابات بايعۇت,
جازۋشى, پۋبليتسيست, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» جانە «تۇركى الەمىنە قىزمەتى ءۇشىن» سىيلىقتارىنىڭ لاۋرەاتى, «قۇرمەت», «پاراسات» وردەندەرىنىڭ يەگەرى (تۇركىستان وبلىسى)
ياxيا اكەنگين,
تۇركى الەمى جازۋشىلارى جانە ونەرپازدار
قورىنىڭ پرەزيدەنتى (تۇركيا)
انار,
جازۋشى, رەجيسسەر, ستسەناريست, پۋبليتسيست, ازەربايجاننىڭ حالىق جازۋشىسى, قوعام قايراتكەرى, «گەيدار اليەۆ» سىيلىعىنىڭ لاۋرەاتى (ازەربايجان, باكۋ قالاسى)
مەحمونقۋل يسلومقۋلوۆ,
جازۋشى, اۋدارماشى, حالىقارالىق «الاش» جانە «ارعىماق» سىيلىقتارىنىڭ لاۋرەاتى, وزبەكستان جازۋشىلار وداعى قازاق ادەبيەتى ءبولىمىنىڭ جاۋاپتى حاتشىسى
(وزبەكستان, تاشكەنت قالاسى)
سۇلتان راەۆ,
جازۋشى-دراماتۋرگ, قىرعىز رەسپۋبليكاسى پرەمەر-ءمينيسترىنىڭ كەڭەسشىسى, قىرعىز رەسپۋبليكاسىنىڭ ەڭبەك سىڭىرگەن مادەنيەت قايراتكەرى, حالىقارالىق «اتاتۇرىك» قورىنىڭ التىن مەدالى مەن «دەنيەل» سىيلىعىنىڭ لاۋرەاتى (قىرعىزستان, بىشكەك قالاسى)