قوستانايدا سوڭعى جىلدارى پەداگوگيكا عىلىمدارىنىڭ كانديداتى, ا.بايتۇرسىنوۆ اتىنداعى مەملەكەتتىك ۋنيۆەرسيتەتتىڭ پروفەسسورى ليليا ساركيسيان جەتەكشىلىك ەتەتىن «مۇگەدەك ستۋدەنتتەرگە ارنالعان قولجەتىمدى ءبىلىم» قوعامدىق ۇيىمى وتباسىنىڭ بەرىكتىگى, وتباسىنداعى جانە بالا تاربيەسىندەگى اكەنىڭ ءرولى جونىندە كوپتەگەن شارالار جۇرگىزىپ كەلەدى. ۇستىمىزدەگى جىلى وسى ۇكىمەتتىك ەمەس ۇيىمنىڭ ۇيىتقى بولۋىمەن «مەنىڭ اكەم وتە جاقسى» جانە «اكە – جاۋاپتى لاۋازىم» جوبالارى قولعا الىنعان بولاتىن.
العاشقى جوبا بويىنشا قوستاناي قالاسىنداعى مەكتەپتەردەگى 7 جانە 17 جاس ارالىعىنداعى بالالار اراسىندا بەس اتالىم بويىنشا بايقاۋ ۇيىمداستىرىلدى. بالالار ادەبي جانە مۋزىكالىق شىعارمالاردا, سالعان سۋرەتتەرىندە, فوتوسۋرەتتەردە اكە تۋرالى ءوز ويلارىن جەتكىزدى. مۇنداي بايقاۋ «مەن – اكەمىن» دەگەن تاقىرىپپەن اكەلەردىڭ اراسىندا دا ءوتتى. سونىمەن قاتار, وتباسىنداعى اكەنىڭ ءرولى جانە شاڭىراقتىڭ بيىك, بوساعانىڭ بەرىكتىگىن ساقتاۋدىڭ وزەكتىلىگى جونىندەگى بۇقارالىق اقپارات قۇرالدارىندا جاريالانعان, كورسەتىلگەن ماتەريالدارى ءۇشىن جۋرناليستەر دە بايقاۋدان تىس قالمادى. بايقاۋلارعا بارلىعى 279 جۇمىس ءتۇستى. جەڭىمپازدار انىقتالدى.
– وسى جوبا شەڭبەرىندەگى بايقاۋعا قاتىسقان بالا دا, اكە دە جەڭىسكە جەتتى دەپ ويلايمىن. ولار قوعامداعى وزەكتى بولىپ وتىرعان ءماسەلەگە ءوز كوزقاراستارىن ءبىلدىرىپ عانا قويعان جوق, سونىمەن قاتار اركىم ونىڭ شەشىمىن تابار جول ىزدەدى, – دەيدى ليليا ۆاگانوۆنا.
ال «اكە – جاۋاپتى لاۋازىم» جوباسى شەڭبەرىندە وتكەن شارالارعا وبلىستاعى عالىمدار, كوپكە تانىمال شىعارماشىلىق ادامدارى, مەكتەپتەردەگى الەۋمەتتىك پەداگوگتار, پسيحولوگتار, ۇكىمەتتىك ەمەس ۇيىمدار, ءدىن وكىلدەرى تارتىلدى. كونفەرەنتسيانىڭ «اكە – جاۋاپتى لاۋازىم» دەگەن سەكتسيالىق ماجىلىستەرى قوستاناي قالاسىنداعى جوعارى وقۋ ورىندارى مەن مەكتەپتەردە, كىتاپحانالاردا ءوتتى. مىسالى, قوستاناي پەداگوگيكا كوللەدجىندە پەداگوگيكا عىلىمدارىنىڭ كانديداتى ي.پارحومەنكو جۇرگىزگەن «وتباسىنداعى ادامگەرشىلىك قارىم-قاتىناستىڭ دامۋىنداعى اكەنىڭ ءرولى» دەگەن سۇراق-جاۋاپ فورماسىنداعى لەكتسياعا 96 ستۋدەنت قاتىسقان بولسا, ونىڭ 70-ءى ۇلدار, ياعني بولاشاق اكەلەر. مەكتەپتەردە وتكەن وسى تەكتەس تاقىرىپتاعى اڭگىمەلەرگە وقۋشىلار قاتىستىرىلدى. ال ل.تولستوي اتىنداعى ورتالىق كىتاپحانادا وتىزدان اسا جاس شاڭىراق يەلەرى – اكەلەر باس قوسىپ, الەۋمەتتىك ماڭىزى تەرەڭ اڭگىمە قوزعادى.
ەلباسى نۇرسۇلتان نازارباەۆ وتباسى ينستيتۋتىن دامىتۋدى مەملەكەتتىك ساياسات دەڭگەيىنە كوتەردى, ەلىمىزدە 2015 جىلعا ارنالعان گەندەرلىك تەپە-تەڭدىك ستراتەگياسى جاسالدى. ۇلتتىق ءداستۇردىڭ, حالىقتىق پەداگوگيكانىڭ, ءتىلىمىز بەن ءدىلىمىزدىڭ تۇما باستاۋى – وتباسىنىڭ, بالا باقىتىنىڭ ءتۇگەل بولۋى ءۇشىن دە اكەنىڭ ورنى ورتايماۋى ءتيىس. سوندىقتان «مۇگەدەك ستۋدەنتتەرگە ارنالعان قولجەتىمدى ءبىلىم» قوعامدىق ۇيىمى كوتەرگەن ماسەلە قوستاناي جۇرتشىلىعىنىڭ نازارىن اۋدارىپ وتىر.
ءنازيرا جارىمبەتوۆا,
قوستاناي.