قازاقستان سوتسيال-دەموكراتيالىق «اۋىل» پارتياسىنان تىركەلگەن پارلامەنت ءماجىلىسىنىڭ دەپۋتاتتىعىنا كانديداتتار قازىرگى كۇنى ەلىمىزدىڭ ءار تۇكپىرىندە حالىق اراسىنا بارىپ, وزدەرىنىڭ سايلاۋالدى باعدارلامالارىن ءتۇسىندىرىپ, ۇگىت-ناسيحات جۇمىستارىن قىزۋ جۇرگىزۋدە.
كەشەگى كۇنى پارلامەنت ءماجىلىسىنىڭ دەپۋتاتتىعىنا كانديدات, اۋىل شارۋاشىلىعى عىلىمدارىنىڭ دوكتورى, اكادەميك كوپماعامبەت ەلەمەسوۆ اتىراۋ وبلىسىنىڭ ماحامبەت اۋدانىندا بولىپ, اۋدان ورتالىعىنىڭ جۇرتشىلىعىمەن جانە اۋىل ادامدارىمەن كەزدەستى. كەزدەسۋ بارىسىندا اكادەميك پارتيا باعدارلاماسىندا كوزدەلگەن باسىمدىقتاردى جانە ولاردى جۇزەگە اسىرۋ ءۇشىن قولدانىلاتىن تەتىكتەردى اڭگىمەلەدى.
– ءبىز نارىقتىق رەفورمالاردىڭ قيىن كەزەڭىنەن وتتىك. قازاقستان حالقىنىڭ ەڭبەگىنىڭ, باي تابيعي-رەسۋرستارىمىزدىڭ جانە سولار بويىنشا الەمدىك نارىقتا قالىپتاسىپ وتىرعان قولايلى باعانىڭ ناتيجەسىندە ەل ەكونوميكاسى اياعىنان نىق تۇردى. بۇل رەتتە مەملەكەت باسشىسى نۇرسۇلتان نازارباەۆتىڭ ەڭبەگىن ايتپاي كەتۋگە بولمايدى. دەگەنمەن, حالىقتىڭ تۇرمىسىن جاقسارتۋدا ءالى دە ەسكەرەتىن ماسەلەلەر بارشىلىق. مىنە, سول ماسەلەلەر «اۋىل» پارتياسىنىڭ باعدارلاماسى مەن سايلاۋالدى تۇعىرناماسىندا ايقىن كورىنىس تاپقان, – دەگەن اكادەميك وسى ورايدا پارتيانىڭ العا قويىپ وتىرعان مىندەتتەرىنە جان-جاقتى توقتالدى. سولاردىڭ قاتارىندا ەلىمىزدە كۇشتى الەۋمەتتىك مەملەكەتتى نىعايتۋ, اۋىلدىڭ ءال-اۋقاتىن ارتتىرۋ سەكىلدى ماڭىزدى ماسەلەلەر بار.
– اۋىلدا جۇمىس ورىندارىنىڭ ءوسۋى 2,5-3 ەسە قامتاماسىز ەتىلۋى ءتيىس. اۋىلدىقتاردىڭ كىرىسى ايىنا ءبىر ادامعا كەمىندە 100 مىڭ تەڭگەگە, اۋىل دارىگەرلەرى مەن مۇعالىمدەرىنىڭ جالاقىسى 150 مىڭ تەڭگەگە جەتۋ قاجەت, – دەي كەلە, «اۋىل» پارتياسىنىڭ پارلامەنت ماجىلىسىنەن قاجەتتى ورىنداردى العان جاعدايدا وسى ءۇشىن كۇش سالاتىندىعىن جەتكىزدى.
جالپى, «اۋىل» پارتياسىنىڭ قۇرامىندا اۋىلدىڭ ءمۇددەسىن كوزدەيتىن اۋىل شارۋاشىلىعى قىزمەتكەرلەرىمەن قاتار, مادەنيەت پەن ونەردىڭ ادامدارى دا از ەمەس. سولاردىڭ قاتارىندا جازۋشى دۋلات يسابەكوۆتى, اتاقتى ءانشى نۇرعالي ءنۇسىپجاندى ايتۋعا بولادى. «اۋىل» پارتياسىنىڭ اتىنان پارلامەنت ءماجىلىسى دەپۋتاتتىعىنا كانديدات بولىپ تىركەلگەن ولار قازىرگى كۇنى وسىنداي مارتەبەگە يە بولعان اۋىل شارۋاشىلىعىنا قاتىستى مەكەمەلەردىڭ باسشىلارى سەيىتقازى كەشۋوۆ, ءاليحان مەدەلبەكوۆپەن بىرگە پارتيانىڭ الماتى قالالىق ۇيىمىنىڭ سايلاۋالدى شتابىندا اۋداندىق پارتيا ۇيىمدارىنىڭ توراعالارىمەن, قالاداعى بەلسەندى ازاماتتارمەن كەزدەسىپ, ءماجىلىس قۇردى.
كەزدەسۋ بارىسىندا سايلاۋالدى ناۋقاندى ۇيىمداستىرۋ ماسەلەلەرى, جوسپارلانعان جۇمىستاردىڭ ورىندالۋ بارىسى جانە پارتيانىڭ ورتالىق شتابىمەن, الماتى وبلىستىق شتابىمەن جۇمىستاردى ءبىر ارنادا ۇيلەستىرىپ وتىرۋ جاعدايى تالقىلاندى.
ءدال وسى كۇنى مۇنداي كەزدەسۋلەر ەلىمىزدىڭ باسقا دا وڭىرلەرىندە بولىپ ءوتتى.
سۇڭعات ءالىپباي.