جاڭاوزەندە, ودان كەيىن شەتپە ستانساسىندا بولعان وقيعالار قاي-قايسىمىزدى دا بەيجاي قالدىرمايتىنى ءسوزسىز. مۇنداي كەلەڭسىزدىكتىڭ تاۋەلسىزدىك مەرەكەسى كۇنى ورىن الۋى وكىنىشتى, ارينە. وزدەرى تۇراتىن قالاداعى كورنەكتى نىسانداردى ورتەپ, توناۋعا بارعان ادامداردىڭ ارەكەتىن اقتاۋ قيىن. تويىمىزدىڭ شىرقى نەگە بۇزىلدى؟ بۇل ازامات رەتىندە اركىمدى دە ويلانتاتىنى ءسوزسىز. قانداي دا شەشىمىن كۇتكەن وزەكتى ماسەلەلەردى بۇلاي ۋشىقتىرماي-اق شەشۋگە بولاتىن ەدى دەپ ويلايمىن. قاقتىعىستار حالىقتىڭ قامىن ويلاعاندىق بولمايدى. الايدا, وسىنداي وقىس وقيعا ورىن الدى, ەندى ونىڭ زاردابىن جەڭىلدەتۋدىڭ جايىن ويلاۋ قاجەت. وسى باعىتتا ەلباسى مەن ۇكىمەت شۇعىل شەشىمگە كەلىپ, قايعىنى سەيىلتۋ شارالارىن الىپ جاتىر. بۇل ءبىر كۇندە جازىلاتىن جان جاراسى ەمەس, دەگەنمەن قايعىنى بولىسسەڭ جەڭىلدەيدى دەيدى حالقىمىز. سوندىقتان جاڭاوزەندىكتەرگە كومەك قوىن سوزۋدان ەشكىم سىرت قالماق ەمەس. قازىر مەملەكەت باسشىسى مەن ۇكىمەتتىڭ قادامدارى وسى باعىتتا وربىگەنى كوڭىلگە مەدەت.
ەلباسى تاپسىرماسىمەن قۇرىلعان ۇكىمەتتىك كوميسسيا وسى كۇندەرى جاعدايدى تۇراقتاندىرۋ باعىتىندا ءبىراز جۇمىستار اتقاردى. ۇكىمەتتىك كوميسسيا جەتى توپ بويىنشا جۇمىس ىستەپ, نىسانداردى قالپىنا كەلتىرۋ, الەۋمەتتىك قامتاماسىز ەتۋ, ازىق-ءتۇلىكپەن قامتاماسىز ەتۋ, حالىقتى اقپاراتتاندىرۋ, قۇقىقتىق قامتاماسىز ەتۋ باعىتىندا كوپ شارۋالار تىندىردى. ۇكىمەتتىڭ جاڭاوزەندەگى ءتارتىپسىزدىكتەردىڭ زاردابىن جويۋعا جانە قالانى قالپىنا كەلتىرۋگە ارنايى شارالار جوسپارىن بەكىتكەنىن, وسى ماقساتقا 3 ميلليارد تەڭگە بولىنگەنىن ەستىپ, قۇلازىعان كوڭىلىمىزگە سەنىم ۇيالادى. جەكەمەنشىك نىسانداردى قالپىنا كەلتىرۋگە دە قارجى قاراستىرىلماق.
ەلباسى نۇرسۇلتان نازارباەۆتىڭ ماڭعىستاۋ وبلىسىنا ارنايى بارىپ, اكتيۆ وتكىزۋى دە بۇل ماسەلەنىڭ اسا ماڭىزدى ەكەنىن كورسەتەدى. بۇزاقى توپتىڭ ءىس-ارەكەتتەرىنە سەبەپشى بولعان «وزەنمۇنايگاز» كومپانياسى جۇمىستان بوساتىلعان جۇمىسشىلاردىڭ اراسىنداعى ەڭبەك داۋىن دۇرىس شەشپەگەن «سامۇرىق قازىنا» قورى مەن «قازمۇنايگاز» كومپانياسىنىڭ باسشىلارىن اۋىستىرۋى ارقىلى مۇنداي جاعدايعا سوقتىرعانداردىڭ ەشقايسىسىنا كەشىرىم بولمايتىنىن اڭعارتتى. جاڭاوزەندەگى كەزدەسۋدە دە ەلباسى ۇلى ابايدىڭ «حالىق بىرلىگى ءبىزدىڭ ەڭ باستى قۇندىلىعىمىز» دەگەن ءسوزىن تاعى ءبىر ەسكە سالدى. نۇرسۇلتان ءابىش ۇلى, ەلدىڭ وزگە وڭىرلەرىنىڭ قالانىڭ قيراعان نىساندارىن قالپىنا كەلتىرۋگە ۇمتىلىپ وتىرعانىن اتاپ وتە كەلىپ, وتاندىق كاسىپكەرلەردىڭ قيراعان نىسانداردى قالپىنا كەلتىرۋگە ىقپال ەتەتىنىن جەتكىزۋى قيىندىقتى بىرىگىپ كوتەرۋگە جۇمىلعان قازاقستاندىقتاردىڭ ويىن ءدوپ باستى دەسە بولادى. ەلباسى وسى جۇمىستاردى وتە قىسقا مەرزىمدە ورىنداۋدى ۇكىمەتكە قاداپ تاپسىردى. پرەزيدەنت ءاربىر جاڭاوزەندىكتىڭ ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا اشىلعان كاسىپورىنداردا جۇمىسقا ورنالاسۋعا مۇمكىنشىلىگى بار ەكەنىن اشىپ ايتتى. بۇل جاڭاوزەندىكتەر ءۇشىن كۇرمەۋى قيىن ماسەلەنى شەشۋگە العىشارت جاسايتىنى ءسوزسىز. بىزدەر, قازاقستاندىقتار, جاڭاوزەننىڭ بولاشاعىنا ۇلكەن سەنىممەن قارايمىز. مەملەكەت جەرگىلىكتى جەردەگى حالىقتىڭ جۇمىسپەن قامتىلۋىنا, الەۋمەتتىك ماسەلەلەرىنىڭ شەشىلۋىنە بايلانىستى باعدارلامالار قابىلداپ, كەشەندى شارالار الىپ جاتىر. ءبىز قاشاندا بىرلىكتى, تىنىشتىقتى قالاعان حالىقپىز. بۇل كەلەڭسىزدىكتەر بولاشاققا ساباق بولادى, بۇدان قورىتىندى شىعارىلادى. قانداي جاعدايدا دا اعايىن اراسىنىڭ تاتۋلىعىن ويلاعان قازاق حالقى ءوزارا تۇسىنىستىككە, بىرلىك پەن ىنتىماققا ۇيىتقى بولادى دەپ سەنەمىن. بۇل مەنىڭ عانا پىكىرىم ەمەس, سەرىكتەستىكتىڭ وندىرىستىك ديرەكتورى مارات يتەعۇلوۆ باستاعان 60 ادامدىق تاۋارلى-ءسۇت فەرماسى ۇجىمىنىڭ ويى. بىزگە الاڭسىز ەڭبەك ەتىپ, تىنىش ءومىر ءسۇرىپ, ۇلاعاتتى ۇرپاعىمىزدى ءوسىرۋىمىز كەرەك.
ءالمۇرات قوسماعامبەتوۆ, «ايس» جشس تاۋارلى-ءسۇت فەرماسىنىڭ باس زووتەحنيگى.
اقتوبە وبلىسى.