جاڭاوزەن قالاسىنداعى جاپپاي ءتارتىپسىزدىك, بۇزاقىلىق, جات پيعىلدى ادامداردىڭ جۇمىستان بوساپ قالعان مۇنايشىلار مەن «وزەنمۇنايگاز» كومپانياسى باسشىلىعى اراسىنداعى ۇزاققا سوزىلعان ەڭبەك داۋىن پايدالانىپ, ءسۇتتەي ۇيىعان تاتۋلىق پەن ىنتىماقتاستىققا سىزات تۇسىرگەن تەرىس ارەكەتتەرىن شىعىسقازاقستاندىقتار دا باتىل ايىپتاپ وتىر. وسىندايدا سوناۋ 1992 جىلعى وسكەمەن قالاسىنداعى ءبىر توپ كاۆكازدىق بۇزاقىلاردىڭ ءتورت جاس جىگىتتى باۋىزداپ, سوڭى ۇلكەن داۋ-دامايعا اينالىپ بارىپ, ارەڭ دەگەندە توقتاتىلعانى ەسكە ءتۇسەدى. سول سىن ساتتە ەلباسى ن.نازارباەۆتىڭ تاپسىرماسىمەن قۇرىلعان ۇكىمەتتىك كومميسسيا مۇشەلەرى تولقىعان جاستارمەن كەزدەسىپ, ەلباسىنىڭ ءسالەمىن جەتكىزگەن ەدى. ەلباسى ن.نازارباەۆ قيىن كەزدە دۇرىس شەشىم قابىلداپ, ءدۇرلىگۋدى باسقانى ەسىمىزدە.
مۇنى نەگە ەسكە الىپ وتىرمىن؟ جاڭاوزەندەگى جاپپاي تارتىپسىزدىككە كىنالى ادامدار قازىر شەت جاقتا ءجۇر دەپ ەستىدىك. ولاردى ۇستاپ, قاتاڭ جاۋاپقا تارتۋ كەرەك. سەبەبى, ولار ەڭ الدىمەن, اتا-بابالارىمىز عاسىرلار بويى اڭساعان تاۋەلسىزدىكتىڭ 20 جىلدىعى تويلانىپ جاتقان كەزدە قوعامعا جات ارەكەتتەرىن جۇزەگە اسىردى. بىرنەشە كىناسىز ادام قازا تاپتى. قازاقستانداعى جۇزدەن استام ۇلت وكىلدەرى قازىر بۇل جات ارەكەتتى باتىل ايىپتاۋدا.
ەلباسى اقتاۋ قالاسىندا وتكەن اكتيۆ جيىنىندا, جاڭاوزەن قالاسىندا تۇرعىندارمەن كەزدەسۋ كەزىندە ايىپتىلاردى قاتاڭ جازالايتىنىن ايتقانى بەلگىلى. شىنىندا دا, «سامۇرىق-قازىنا», «قازمۇنايگاز» كومپانياسىنىڭ باسشىلارى ەڭبەك داۋىن دەر كەزىندە شەشۋ جونىندەگى پرەزيدەنتتىڭ تاپسىرماسىن ورىنداماي, قالاداعى جاعداي دۇرىستالىپ كەلەدى, بارلىعى وڭ شەشىلەدى دەپ بۇرىس اقپارات بەرگەن. ەلباسى وسى جايلى جينالعاندارعا ايتا كەلىپ, زارداپ شەككەن ادامدارعا كومەك بولاتىنىن, قايتىس بولعاندار وتباسىلارىنا ماتەريالدىق قولداۋ جاسايتىنىن ايتتى. ۇكىمەت ءۇش ميلليارد تەڭگەدەن استام كومەك كورسەتپەك. ەلباسى جاڭاوزەندە بولعان كەزدە كوپتەگەن تۇرعىندارمەن جولىعىپ, ماسەلەنىڭ انىق-قانىعىن انىقتادى. مەنىڭشە, سىن ساتتە ەلباسى تاعى دا حالىقتى بىرلىك پەن تاتۋلىققا شاقىرىپ, جاڭاوزەن قالاسىنىڭ جاعدايىنا نازار اۋداراتىنىن ەسكەرتتى. ەندەشە, جاڭاوزەندىكتەردى سابىرلىلىققا ۇندەپ, ەل مەن جەردىڭ كوركەيە بەرۋىنە ۇلەس قوسۋعا شاقىرامىن.
بولاتبەك يمانعاليەۆ, سىرتقى ىستەر مينيسترلىگىنىڭ وسكەمەن قالاسىنداعى كونسۋلى, قاتونقاراعاي اۋدانىنىڭ قۇرمەتتى ازاماتى.
وسكەمەن.