15 قىركۇيەكتە الماتىدا جاڭا حالىقارالىق كينوفەستيۆال شىمىلدىعىن تۇرەدى. بۇل شارا قالا اكىمدىگىنىڭ باستاماسىمەن العاش رەت ۇيىمداستىرىلىپ وتىر.
سەرگەي دۆورتسەۆويدىڭ «ايكا» فيلمىندە باستى ءرولدى ويناعان سامال ەسلياموۆا كانن كينوۆەستيۆالىندە ەڭ ۇزدىك ايەل ءرولى نوميناتسياسىمەن ماراپاتتالعان بولاتىن. بيىل العاش رەت الماتىدا ۇيىمداستىرىلىپ جاتقان Almaty Film حالىقارالىق فەستيۆالى ءدال وسى فيلممەن اشىلادى.
«بۇل كينوفەستيۆالدىڭ ماقساتى – قازاقستان كينويندۋسترياسىنا حالىقارالىق جوبالاردى تارتىپ, الماتىنىڭ مارتەبەسىن الەمگە تانىتۋ» دەيدى ۇيىمداستىرۋشىلار.
بايقاۋعا 10 فيلم قاتىسادى. ولار «ۇزدىك رەجيسسەر», «ۇزدىك اكتەر», «ۇزدىك اكتريسا» اتالىمدارى بويىنشا ماراپاتتالادى.
كونكۋرستان تىس 21 فيلم كورەرمەندەر نازارىنا ۇسىنىلادى. ۇزدىكتەردى وتاندىق جانە شەتەلدىك كينومامانداردان قۇرالعان قازىلار القاسى ساراپقا سالادى. سونىمەن قاتار حالىقارالىق كينوفەستيۆال بارىسىندا «تۇلپار» ۇلتتىق سىيلىعى تابىستالادى.
كينوفەستيۆال اياسىندا كورسەتىلەتىن كينولاردى الماتىلىق كورەرمەندەر تەگىن تاماشالاي الادى.
ء«بىز حالىقارالىق جوبا ارقىلى شەتەلدىك ارىپتەستەرىمىزدى الماتى مەن الماتى وبلىسى اۋماعىندا بىرلەسىپ كينو تۇسىرۋگە تارتقىمىز كەلەدى. بۇل ءبىرىنشى كەزەكتە جەكەمەنشىك كينوعا ۇلكەن قولداۋ بولار ەدى. سونداي-اق, حالىقارالىق دەڭگەيگە شىعۋعا, وتاندىق كينويندۋستريانى دامىتۋعا ۇلكەن مۇمكىندىك», دەيدى «Almaty Film Festival» پرەزيدەنتى اقان ساتاەۆ.