تامىز ايىنىڭ سوڭعى جەكسەنبىسى قاراعاندىلىقتار ءۇشىن باستى مەرەكە كۇندەرىنىڭ ءبىرى. كەنشىلەر استاناسى شاحتەر كۇنىن اتاپ وتەدى. ءداستۇرلى مەرەكەگە سوڭعى كۇندەرى جيىلەگەن جاۋىن-شاشىن بوگەت بولا المادى. بۇل جولى دا نەگىزگى دۋمان قاراعاندىنىڭ ورتالىق ساياباعىندا باستالىپ, شاحتەرلەر كوپتەپ تۇراتىن قاناتتاس ساران, اباي, شاحتينسك قالالارىندا دا ەرەكشە سالتاناتپەن مەرەكەلەندى. ال وبلىس ورتالىعىنداعى كەنشىلەر مادەنيەت سارايىندا اتاۋلى كۇنگە وراي جيىن بولىپ, شاحتەرلەردى ماراپاتتاۋ ءراسىمى ءوتتى.
– سىزدەرگە وراسان ەڭبەكتەرىڭىز ءۇشىن العىس ايتقىم كەلەدى. بيىل «ارسەلورميتتال تەمىرتاۋ» اق باسشىلىعىمەن كەلىسىمگە قول جەتكىزىپ, رەسمي قۇجاتقا سايكەس, كومپانيا ءوندىرىس نىساندارىنا ءۇش جىل ىشىندە 305 ملرد تەڭگە ينۆەستيتسيالايتىن بولدى. بۇل قاراجات شاحتالاردى دامىتۋعا, ەڭبەككەرلەردىڭ قاۋىپسىزدىگىن ارتتىرۋعا جۇمسالماق. كاسىبي مەرەكەلەرىڭىزبەن شىن جۇرەكتەن قۇتتىقتايمىن, – دەدى سالتاناتتى جيىندا وبلىس اكىمىنىڭ ورىنباسارى الماس ايداروۆ.
شاحتەرلەر مەن ەڭبەك ارداگەرلەرىن «ارسەلورميتتال تەمىرتاۋ» اق-تىڭ اتقارۋشى ديرەكتورى ۆاديم باسين دە كاسىپورىن باسشىلىعىنىڭ اتىنان ارنايى قۇتتىقتادى.
– بۇگىنگى كۇن قاراعاندى ءۇشىن ەرەكشە, ويتكەنى بۇل وسى ءوڭىردىڭ نەگىزىن قالاۋشى شاحتەر ەڭبەگىنىڭ مەرەكەسى, – دەدى ول. وسىنداعى مىڭداعان ادامداردىڭ ءومىرى شاحتەردىڭ ۇلكەن قۇرمەتكە لايىق اۋىر ەڭبەگىمەن بايلانىستى. ءوڭىردىڭ يگىلىكتەرى تىكەلەي سىزدەردىڭ قاجىرلى ەڭبەكتەرىڭىزدىڭ جەمىسى. اسىرەسە ارداگەر شاحتەرلەرگە العىسىمىز شەكسىز, سىزدەردىڭ ارقالارىڭىزدا قازىر ءبىزدىڭ قالىپتاسقان ەڭبەك داستۇرلەرىمىز, جولدارىڭىزدى قۋعان ءىزباسارلار بار.
وسىدان كەيىن بىرقاتار كەنشىلەرگە ءتۇرلى ماراپاتتار تابىس ەتىلدى. «تەنتەك» شاحتاسىنداعى كونۆەيەرلىك كولىك ۋچاسكەسىنىڭ باسشىسى ر.ۆالەەۆ, تازارتۋ كەنجارىنىڭ جۇمىسشىلارى گ.ۆيگوۆسكي (لەنين اتىنداعى شاحتا), ل.كوتوۆ («شاحتينسك» شاحتاسى), ب.ماحامبەتوۆ («اباي» شاحتاسى), س.چەرنىشوۆ (ت.كۇزەمباەۆ اتىنداعى شاحتا), پروحودچيكتەر و.پروسكۋرنين (كوستەنكو اتىنداعى شاحتا) مەن ق.مۇرىنباەۆ («قازاقستان» شاحتاسى), «ساران» شاحتاسىنىڭ جەراستى ەلەكترسلەسارى ي.سۆيريدوۆ ءى دارەجەلى «شاحتەر داڭقى» بەلگىسىمەن ماراپاتتالدى. سونىمەن قاتار ءىى دارەجەلى «شاحتەر» داڭقى بەلگىسىمەن 17 شاحتەر, ءىىى دارەجەلى بەلگىمەن 25 شاحتەر ناگرادتالدى.
ال ءۇش دارەجەلى «ەڭبەك داڭقى» بەلگىسىنىڭ ءار دارەجەسىمەن ون ەكى ادامنان, بارلىعى 36 شاحتەر ماراپاتتالدى. سونداي-اق ونداعان كەنشىلەردىڭ ەڭبەگى مەرەكە ۇستىندە قاراعاندى وبلىسى اكىمىنىڭ قۇرمەت گراموتاسىمەن جانە العىس حاتتارمەن اتالىپ ءوتتى.
قايرات ءابىلدا,
«ەگەمەن قازاقستان»
قاراعاندى