كەشە استانادا «دەموكراتيالىق ينستيتۋتى» عىلىمي-زەرتتەۋ قاۋىمداستىعى قوعامدىق بىرلەستىگى 17-19 جەلتوقسان كۇندەرى پارلامەنت ءماجىلىسى سايلاۋىنا ارنالعان قوعامدىق پىكىرگە وسىمەن ەكىنشى رەت الەۋمەتتانۋلىق زەرتتەۋ جۇرگىزگەندەرىن ءمالىم ەتتى.
قوعامدىق بىرلەستىكتىڭ جوبالار ديرەكتورى يۋليا كۋچينسكايانىڭ ايتۋىنشا, ساۋالداما ءۇش كۇن بويى استانا مەن الماتى قالالارى جانە ەلىمىزدىڭ بارلىق وبلىستارىندا ءجۇرگىزىلىپ, سونىڭ ناتيجەسىندە حالىقتىڭ ەلەكتورالدىق بەلسەندىلىگىنىڭ دەڭگەيى پايىزدىق ەسەپپەن العاندا 67,7 پايىزدى قۇراعان. وسى ساۋالداما كەزىندە حالىقتىڭ ەكى سۇراققا عانا جاۋاپ بەرۋىنە ءوتىنىش جاسالدى.
ونىڭ ءبىرىنشىسى – «الداعى 2012 جىلعى 15 قاڭتاردا بولاتىن قازاقستان رەسپۋبليكاسى پارلامەنتى ءماجىلىسى مەن ءماسليحاتتار دەپۋتاتتارىنىڭ سايلاۋىندا داۋىس بەرۋگە قاتىساسىز با؟» دەگەن سۇراق بولسا, ەكىنشىسى – «ەگەر دە ءسىز سايلاۋ ۋچاسكەسىنە پارلامەنت سايلاۋى كۇنى بارساڭىز, وندا دالىرەگى قاي پارتياعا داۋىس بەرەسىز؟» دەگەن سۇراق بولدى.
ءسويتىپ, ءبىرىنشى سۇراققا جاۋاپ رەتىندە رەسپوندەنتتەردىڭ 57,5 پايىزى وزدەرىنىڭ داۋىس بەرۋگە قاتىساتىنىن نىق سەنىممەن ايتقان بولسا, ەكىنشى سۇراققا جاۋاپ بەرگەن ادامداردىڭ باسىم بولىگى «نۇر وتان» پارتياسىنا داۋىس بەرەتىندەرىن مالىمدەدى. «وندا رەسپوندەنتتەردىڭ 80,2 پايىزى سايلاۋعا «نۇر وتان» حالىقتىق-دەموكراتيالىق پارتياسىنا داۋىس بەرۋ ءۇشىن باراتىندارىن ايتسا, حالىقتىڭ 7,1 پايىزى «اق جول» قازاقستاننىڭ دەموكراتيالىق پارتياسىنا داۋىس بەرەتىندەرىن جەتكىزگەن, دەيدى يۋ.كۋچينسكايا. ودان ءارى جالپىۇلتتىق سوتسيال-دەموكراتيالىق پارتياسى رەسپوندەنتتەردىڭ 2,2 پايىز داۋىسىن, قازاقستاننىڭ كوممۋنيستىك حالىقتىق پارتياسى – 2,1 پايىزىن, «ءادىلەت» دەموكراتيالىق پارتياسى – 1,8 پايىزىن, پاتريوتتار پارتياسى – 1,6 پايىزىن, قازاقستاننىڭ «اۋىل» سوتسيال-دەموكراتيالىق پارتياسى 1,5 پايىزىن جيناعان بولسا, «رۋحانيات» پارتياسى سۇرالعان ادامداردىڭ 0,1 پايىز داۋىسىنا يە بولعان».
وسىلايشا, وتكەن مونيتورينگ قورىتىندىلارىمەن سالىستىرعاندا ساياسي پارتيالاردىڭ ەلەكتورالدىق بەلسەندىلىگى مەن رەيتينگتەرىنىڭ وسكەندىگى بايقالادى, دەيدى قوعامدىق بىرلەستىك وكىلى.
ساۋالدامالىق سۇراققا قازاقستاننىڭ بارلىق وڭىرلەرىنەن, استانا مەن الماتى قالالارىنان 1 500 رەسپوندەنت قاتىسسا, ولارعا قوعامدىق بىرلەستىكتىڭ 50-80 وكىلى سۇراۋ سالعان. ساۋالداما «قازاقستاننىڭ ازاماتتىق اليانسى» ۇيىمىنىڭ تاپسىرىسى بويىنشا جۇرگىزىلىپتى.
داستان كەنجالين