بۇل كۇندەرى ءبىزدىڭ ەلىمىز قۋانىش قۇشاعىندا. ەل تاۋەلسىزدىگىنىڭ 20 جىلدىعى قارساڭىندا ەلباسىنىڭ قاتىسۋىمەن وتكەن «قۋاتتى قازاقستاندى بىرگە قۇرامىز» اتتى يندۋستريالىق-يننوۆاتسيالىق فورۋم اياسىندا ەل وڭىرلەرىمەن بولعان تەلەكوپىر كەزىندە ەكىباستۇز ماەس-2 ستانساسىندا جاڭا ەنەرگوبلوكتىڭ قۇرىلىسىن باستاۋعا رۇحسات بەرىلگەن ەدى. ياعني, بۇل ءىرى جوبانىڭ باستالۋى ەلىمىزدەگى باسقا دا زاماناۋي ەنەرگوبلوكتاردى تۇرعىزۋعا جول اشپاقشى. قازىر جوباعا ساي جۇمىستار جۇرگىزىلۋدە.
ال ءبىزدىڭ قولعا العان جاڭا جوبانىڭ قۇنى – 113,5 ملرد. تەڭگەگە جۋىق بولسا, پايدالانۋعا بەرىلۋ ۋاقىتى 2014 جىلعا بەلگىلەنىپ وتىر. ءسويتىپ, جاڭا ەنەرگوبلوكتىڭ ىسكە قوسىلۋى ناتيجەسىندە ستانسانىڭ قۋاتى 1000 مۆت-دان 1600 مۆت-عا دەيىن وسەتىن بولادى.
الىپ ستانسا سولنەچنىي كەنتىندە ورنالاسقان. بۇل – جاس ەنەرگەتيكتەر قاتارى كوبەيەدى دەگەن ءسوز. جاڭا باستالعان №3 ەنەرگوبلوك قۇرىلىسى كەزىندە 1300 ادام جۇمىسقا الىنادى. بۇل كۇندەرى ستانسادا 1600-دەي ادام ەڭبەك ەتەدى. بارلىق قازاقستاندىق ەنەرگەتيكتەردى ەلىمىزدىڭ تاۋەلسىزدىگى مەيرامىمەن قۇتتىقتايمىن. ەلىمىز وركەندەي بەرسىن. قۋاتتى, مىعىم ەلدەر قاتارىنان كورىنەيىك.
عاني ءسالىمجۋاروۆ, «ەكىباستۇز ماەس-2 ستانساسى» اق باسقارما توراعاسى.
پاۆلودار وبلىسى.