مەملەكەتتىك حاتشى گۇلشارا ابدىقالىقوۆانىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
جيىندى اشقان مەملەكەتتىك حاتشى ەلباسى ن.نازارباەۆتىڭ «ۇلتتىق ادامي كاپيتالدىڭ ساپاسى الەمدىك ەكونوميكا ءوسىمىنىڭ باستى فاكتورىنا اينالىپ وتىر. جاڭا زامان ادامدارىنىڭ دايىندىق دەڭگەيى – ۇلتتىق ەكونوميكا مەن مەملەكەت دامۋىنىڭ شەشۋشى رەسۋرسى» دەگەن ءسوزىنىڭ وزەكتىلىگىنە نازار اۋداردى.
گۇلشارا ابدىقالىقوۆا بيىل 25 جىلدىعىن اتاپ وتەتىن «بولاشاق» باعدارلاماسى جوعارى بىلىكتى ماماندار دايىنداۋ ىسىنە ماڭىزدى ۇلەس قوسىپ كەلە جاتقانىن, وسى ۋاقىت ىشىندە 13 مىڭعا جۋىق ستيپەنديا ءبولىنىپ, 10 مىڭنان استام بىلىكتى كادرلار دايارلانعانىن جانە ولاردىڭ ەل ەكونوميكاسىنىڭ ءتۇرلى سالالارىندا جۇمىس ىستەپ جۇرگەنىن اتاپ ءوتتى.
«بولاشاق» باعدارلاماسىنىڭ تيىمدىلىگىن باعالاۋ ماقساتىمەن نازارباەۆ ۋنيۆەرسيتەتتىڭ ءبىر توپ عالىمى باعدارلاماعا ەكونومەتريالىق ساراپتاما جۇرگىزدى. وسى زەرتتەۋ جۇمىسى سالىنعان ينۆەستيتسيانىڭ ماتەريالدىق جانە ماتەريالدىق ەمەس يگىلىگىن قامتاماسىز ەتۋ ىسىندە «بولاشاق» ستيپەندياسىنىڭ ءتيىمدى ەكەنىن كورسەتتى. ەل ەكونوميكاسىنىڭ بارلىق سەكتورى ءۇشىن جوعارى سىنىپتى ماماندار دايىندالدى. ماسەلەن, باعدارلامانىڭ كارديوحيرۋرگيا سالاسىنىڭ تۇلەكتەرى 32 مىڭنان اسا تەگىن وتا جاسادى. ءبىر وتانىڭ ورتاشا باعاسى 300 مىڭنان 10 ميلليون تەڭگەگە دەيىن جەتەدى.
باسقوسۋدا ءبىلىم جانە عىلىم مينيسترلىگى شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرمالارىنىڭ ورىندالۋى تۋرالى مالىمدەدى.
كوميسسيا شەشىمىمەن ماگيستراتۋرادا, دوكتورانتۋرادا وقۋعا, سونىمەن قاتار الەمنىڭ جەتەكشى عىلىمي جانە وندىرىستىك ورتالىقتارىنا تاعىلىمدامادان وتۋگە جىبەرىلەتىن 128 ۇمىتكەرگە ستيپەنديا تاعايىندالدى.
جيىن قورىتىندىسى بويىنشا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «بولاشاق» حالىقارالىق ستيپەندياسىن ىسكە اسىرۋدى ودان ءارى جالعاستىرۋ جونىندە بىرقاتار تاپسىرما بەردى.
اباي اسانكەلدى ۇلى,
«ەگەمەن قازاقستان»