ەلباسى كىتاپحاناسىنىڭ عيماراتىندا قازاقتىڭ ۇلى اقىنى, دانا ويشىلى, قازاق جازبا ادەبيەتىنىڭ نەگىزىن قالاۋشى اباي قۇنانباي ۇلىنىڭ تۋعان كۇنىنە وراي الەۋمەتتىك جەلىلەردە جاريالانعان ء«ىى اباي وقۋلارى» جىل سايىنعى ادەبيەت سايىسىنىڭ جەڭىمپازدارىن ماراپاتتاۋ ءراسىمى ءوتتى. اباي شىعارماشىلىعى – وتاندىق مادەنيەتىمىزدىڭ ماقتانىشى, ۇلتتىق كودتىڭ اجىراماس بولىگى. ۇلى اقىننىڭ ەسىمى دۇنيە ءجۇزىنىڭ وقىرمان قاۋىمىنا كەڭىنەن تانىمال.
الەۋمەتتىك جەلىلەر مول تاجىريبەسى بار قالىڭ وقىرمان قاۋىمنىڭ جانە دە اباي تۋىندىلارىمەن ەندى عانا تانىسقان جاس وقىرمانداردىڭ كەڭىنەن قولداناتىن بەلسەندى «كەزدەسۋ ورنىنا» اينالعان. جوبا, ەڭ الدىمەن, جاستارعا باعىتتالسا دا ەلىمىزدىڭ بارلىق وڭىرلەرىن قامتيتىن ءتۇرلى جاستاعى تۇرعىندارى مەن ءار سالادا ەڭبەك ەتەتىن ماماندارىنىڭ باسىن قوستى.
ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ: «ەلباسى نۇرسۇلتان نازارباەۆ: «اباي ءسوزى – قازاقتىڭ بويتۇمارى. اباي مۇراسى – قازاقتىڭ ەڭ قاسيەتتى قازىناسى» دەگەن ەدى. ەلباسى كىتاپحاناسى مەملەكەت باسشىسىنىڭ «رۋحاني جاڭعىرۋ» باعدارلاماسىن قولداۋ ماقساتىندا قازاقتىڭ ۇلى اقىنىنىڭ مۇراسىن ناسيحاتتاۋعا ارنالعان ء«ىى اباي وقۋلارى» اتتى ءداستۇرلى ادەبي سايىسىن جاريالاعان بولاتىن. بۇل جاستارىمىزدى ەلىن, جەرىن سۇيۋگە تاربيەلەيتىن يگى شارا. وسى سايىستىڭ بيىلعى جەڭىمپازدارىن ماراپاتتاۋ راسىمىنە قوش كەلدىڭىزدەر» دەپ, جاس تالاپتارعا ءسات-ساپار تىلەدى.
مەرۋەرت توقمولداەۆا (تاراز قالاسى, ستۋدەنت) ءى ورىن, اقتوتى اسانوۆا (الماتى قالاسى, وقۋشى) ءىى ورىن, دانا مۇحامەتىلدا (تاراز قالاسى, ستۋدەنت) ءىىى ورىن الدى. سونىمەن قاتار سايىسقا قاتىسۋشىلار ارنايى اتالىمدار بويىنشا دا ماراپاتتالدى.
سالتاناتتى ماراپاتتاۋ راسىمىنە فيلولوگيا عىلىمدارىنىڭ دوكتورى سەرىك نەگيموۆ, بەلگىلى قوعام قايراتكەرى ورازگۇل اسانعازى مەن ايتىسكەر اقىن سەرىكزات دۇيسەنعازى, سونداي-اق عىلىم مەن مادەنيەت ماماندارى, استانا قالاسىنىڭ پەداگوگيكالىق قاۋىمداستىعىنىڭ وكىلدەرى قاتىستى.
باعاشار تۇرسىنباي ۇلى, «ەگەمەن قازاقستان»