«نۇر عاسىر» مەشىتىنىڭ 10 جىلدىق مەرەيتويىنا وراي ۇيىمداستىرىلعان ءىىى رەسپۋبليكالىق «ادەمى اۋەزدى ازانشى» جارىسى ءوز مارەسىنە جەتتى. تورەشىلەر شەشىمىمەن, قىزىلوردا وبلىسى, «اقمەشىت-سىرداريا» مەشىتىنىڭ ۇستازى شىڭعىس جاپپارحان ۇلى «ادەمى اۋەزدى ازانشى – 2018» دەگەن اتقا لايىق دەپ تانىلدى. بايگە جەڭىمپازىنا 1 000 000 تەڭگەنىڭ قارجىلاي سەرتيفيكاتى مەن بايقاۋدىڭ ەستەلىك كۋبوگى سىيعا بەرىلدى. ماراپاتتى جارىس دەمەۋشىسى قۇلعازيەۆ كەلباتىر مىرزا سالتاناتتى تۇردە تابىستادى. ايتا كەتۋ كەرەك, جارىس جەڭىمپازى اتانعان شىڭعىستىڭ جاسى نەبارى 24-تە. ول – بۇگىنگى بايقاۋدىڭ ەڭ جاس قاتىسۋشىسى.
جارىستىڭ ءىى جۇلدەلى ورنىن «نۇر استانا» مەشىتىنىڭ ازانشىسى حاديرشاەۆ سالمان ابدۋلحافيز ۇلى يەلەندى. ەلوردا مەرەيىن اسقاقتاتقان ازاماتقا ارنايى كۋبوك جانە ۋمرا قاجىلىعىنا جولداما بەرىلدى. ۇزدىك ۇشتىكتى قورىتىندىلاعان ء«ماشھۇر ءجۇسىپ» مەشىتىنىڭ ازانشىسى تەمىرعاليەۆ سەرىك (پاۆلودار) ءىىى جۇلدەلى ورىندى جەڭىپ الدى. ول ارنايى كۋبوكپەن جانە 300 000 تەڭگە كولەمىندە قارجىلاي سەرتيفيكاتپەن ماراپاتتالدى.
وزگە قاتىسۋشىلاردان وزا شاپقان تاعى دا 2 قاتىسۋشى ىنتالاندىرۋ جۇلدەسىنە يە بولدى. تالدىقورعان وڭىرىنەن كەلگەن عازيز نۇرجول مەن اتىراۋلىق ازامات, «يساتاي-ماحامبەت» مەشىتىنىڭ باس يمامى يمانعاليەۆ ەرجانعا 100 000 تەڭگە كولەمىندە قارجىلاي سىياقى جانە العىس حاتتار تابىس ەتىلدى. بايقاۋدىڭ بۇدان وزگە بارلىق قاتىسۋشىلارىنا 50 000 تەڭگەدەن بەرىلدى.