سەكسەننىڭ بەل ورتاسىنا جاقىنداعان مەن تاۋەلسىزدىگىمىزدىڭ قانشالىقتى قىمبات ەكەنىن جاقسى بىلەمىن. تاعاتسىزدانا كۇتكەن تولعانىستى مەرەكە كۇنى كوتەرىڭكى كوڭىلدەگى كوكشەتاۋدىڭ الاڭدارىنداعى مادەني-كوپشىلىك شارالارعا قاتىسۋعا مۇمكىندىگىم بولمادى. ايتكەنمەن, كۇنى بويى تەلەديدار الدىنان تاپجىلماي, ەلباسى نۇرسۇلتان نازارباەۆتىڭ قۇتتىقتاۋىن تىڭداپ, جالپىحالىقتىق قۋانىشقا ورتاقتاسىپ, مەرەيىم ءوسىپ وتىرعان ەدى. ءبىر كەزدە ەكران الدىنا رەسپۋبليكامىزدىڭ باس پروكۋرورى اسحات داۋىلباەۆ شىعىپ, ماڭعىستاۋ وبلىسىنداعى جاڭاوزەن قالاسىنداعى باسبۇزارلىق وقيعا تۋرالى مالىمەت جاساعاندا ءتوبەمنەن جاي تۇسكەندەي بولدى.
مىنە, سول كۇننەن باستاپ بارشامىز الىستاعى قالاداعى اعايىندارىمىزدىڭ حال-جاعداي, تۇرمىسىنا الاڭداۋمەن وتىرمىز. وسىندايدا ەلباسىمىزدىڭ ورىن العان وقيعانى جاسىرماي, اشىق ايتىپ وتىرعانىنا ريزامىز. 17 جەلتوقساننىڭ كەشىندە جاڭاوزەندە 20 كۇندىك توتەنشە جاعداي جاريالانعانىن حابارلادى. ماسەلەنىڭ ەكونوميكالىق قايشىلىقتارعا قاتىستىلىعى دا ايتىلىپ جاتىر. ءبىراق, ەڭ وكىنىشتىسى, كەشىرىلمەيتىن سالدارى تاۋەلسىزدىگىمىزدىڭ سالتاناتتى 20 جىلدىعىنىڭ شىرقى بۇزىلعانىندا دەپ بىلەمىن. مۇنى اقتاۋعا بولمايدى.
مەن سوناۋ ەلۋىنشى جىلداردىڭ باسىندا كازمۋ-ءدىڭ جولداماسىمەن باتىس ولكەدە قىزمەتىمدى باستاعان ەدىم. بۇل تاريحى دا, تاعىلىمى دا مول ولكە. وسىندا كوپتەگەن ازاماتتارمەن تانىسىپ, اعايىن-تۋىستاي باۋىرلاسىپ كەتكەنبىز. ەلدىڭ داڭقىن اسىرعان ماڭعىستاۋ جاڭا قازاقستاننىڭ ماقتانىشى دەسەك, ارتىقتىعى جوق. مۇنى ايتىپ وتىرعانىم, جالپاق ەلگە كۇيە جاعۋعا بولمايتىندىعى. كىسى ساناسىنا سىيمايتىن باسبۇزارلىقتى باستاعانداردىڭ كوزدەگەنى ءدۇنيەقوڭىزدىق دەپ بىلەمىن. ونىمەن ۋلانعانداردان بايىپ, سابىر قاشادى. ءدۇكەندەر, بانكتەر, قوعامدىق جانە تۇرعىن ۇيلەردىڭ تونالۋى سونىڭ ايعاعى. ون ادام ويدا-جوقتا كوز جۇمىپ, سەكسەننەن استام كىسى اۋىر جاراقاتتانىپتى. جاڭاجىلدىق شىرشانى بىلاي قويعاندا, كيىز ءۇي مەن ساحنانىڭ قيراتىلۋى ناعىز قاسيەتسىزدىك ەمەس پە؟ بۇزاقىلاردىڭ بەيبىت حالىققا, ءوز جەرلەستەرىنە وقپەن اتىلاتىن جانە سۋىق قارۋلاردى قولدانعانى جۇرەك سۋىتار سۇمدىق.
پرەزيدەنتىمىز ايتقانداي, بۇل توتەنشە وقيعانىڭ ءتيىستى باعاسى بەرىلەتىنى داۋسىز. «وزەنمۇنايگاز» كومپانياسىنىڭ باسشىسى مەرەكە كۇنگى باسبۇزارلىققا قاتىسىمىز جوق دەپ وتىر. مەملەكەتتىك كوميسسيا ونىڭ دا انىق-قانىعىن ايقىندايتىنى بەلگىلى. ءبىزدىڭ تۇسىنىگىمىزدە, جاڭاوزەن قازاقستان تاۋەلسىزدىگى جىلدارىندا ءوسىپ-وركەندەگەن شىرايلى شاھار. مۇندا كەشەگى داعدارىستى جىلداردىڭ وزىندە كوپتەگەن الەۋمەتتىك نىساندار, جاڭا ءداۋىر كاسىپورىندارى سالىندى. وسى جەردە داڭقتى جىلنامامىزدىڭ ايتۋلى بەتتەرى قاتتالعان دەسەك تە بولادى. سوندىقتان, جازىقسىز حالىقتىڭ ىنتىماق-بەرەكەسى تارقاماسىن, ال داڭقىمىزعا داق ءتۇسىرگەندەر ءتيىستى زاڭدار شەڭبەرىندە قاتاڭ جازالانۋى قاجەت دەپ سانايمىن.
بايان نۇرپەيىسوۆ, زەينەتكەر.
كوكشەتاۋ.