ينۆەستيتسيالار جانە دامۋ ءمينيسترى جەڭىس قاسىمبەك كولىك سالاسىنىڭ قىزمەتكەرلەرى مەن ارداگەرلەرىن كاسىبي مەرەكەلەرىمەن قۇتتىقتادى.
«قازاقستاننىڭ كولىك جۇيەسى - شىن مانىندە مەملەكەتتىلىگىمىزدىڭ نەگىزى. بۇل حالقىمىزدىڭ الەۋمەتتىك-ەكونوميكالىق جاعدايى مەن وركەندەۋىنە تىكەلەي اسەر ەتەتىن ەكونوميكانىڭ كۇرەتامىرى. سوڭعى جىلدارى ۇلتتىق باسەكەگە قابىلەتتىلىك پەن تۇراقتى ءوسۋ فاكتورى رەتىندە كولىكتىڭ ماڭىزدىلىعى بىردەن ارتتى. ماسەلەن, 2015 جىلدان باستاپ ەلىمىزدىڭ جالپى ىشكى ونىمىندەگى سالانىڭ ۇلەسى كەمىندە 8% قۇراپ كەلدى. سوڭعى 10 جىلدا ينفراقۇرىلىمدى, كولىك-لوگيستيكالىق اكتيۆتەردى دامىتۋعا سالىنعان جالپى ينۆەستيتسيا كولەمى شامامەن 30 ملرد اقش دوللارىن قۇرادى. وسى كەزەڭدە 2 مىڭ شاقىرىمنان استام تەمىر جول سالىندى, 6,3 مىڭ شاقىرىم جول رەكونسترۋكتسيالاندى, كاسپي تەڭىزىندەگى پورتتىق قۋات 23,5 ملن تونناعا دەيىن ارتتى, 15 اۋەجايدا قايتا جاڭارتۋ جۇمىستارى جۇرگىزىلدى», - دەپ جازدى ول فەيسبۋكتەگى پاراقشاسىندا. ءمينيستردىڭ ايۋىنشا, ينفراقۇرىلىم سالاسىنداعى قارقىندى قۇرىلىس ءتيىستى حالىقارالىق رەيتينگتەردەگى قازاقستاننىڭ كورسەتكىشتەرىنە وڭ اسەرىن تيگىزگەن.
«بۇگىنگى تاڭدا قازاقستان ەۋروپا مەن ازيا اراسىنداعى نەگىزگى قۇرلىقتىق ترانزيتتەۋشى ەل رەتىندە بازالىق ينفراقۇرىلىم جاعدايلارىن ەكونوميكانىڭ جوعارى كىرىس كوزى رەتىندە قۇردى. مۇندا كولىك سالاسىنداعى ءاربىر قىزمەتكەردىڭ ەرەن ەڭبەگى بار ەكەنىن ايتقىم كەلەدى. بارلىق قىزمەتكەرلەر مەن ارداگەرلەرگە, تەمىرجولشىلارعا, اۆتوموبيلشىلەرگە, اۋە جانە سۋ كولىگى قىزمەتكەرلەرىنە, لوگيستيكالىق قىزمەت ماماندارىنا لايىقتى ەڭبەكتەرى مەن ءوز جۇمىستارىنا ادالدىقتارى ءۇشىن العىس ايتامىن», - دەپ اتاپ وتەدى جەڭىس قاسىمبەك. ايتا كەتەيىك, «قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» قر ۇكىمەتىنىڭ قاۋلىسىنا سايكەس تامىزدىڭ ءبىرىنشى جەكسەنبىسىندە كولىك قىزمەتكەرلەرى كۇنى اتالىپ وتكىزىلەدى.