ۋەفا ەۋروپا ليگاسىندا سىنعا تۇسكەن قوستانايدىڭ «توبىل» كومانداسى اتالعان ءتۋرنيردىڭ ەكىنشى ىرىكتەۋ كەزەڭى اياسىنداعى قارىمتا كەزدەسۋدە ەرەۆاندا ارمەنيانىڭ «پيۋنيك» كلۋبىنا قارسى ويناپ, جەڭىلىپ قالدى.
سىرت الاڭداعى ماتچ ءا دەگەننەن-اق «توبىلدىڭ» قاۋىپتى شابۋىلدارىمەن باستالدى. ونىسى تۇسىنىكتى ەدى. ەگەر الاڭ يەلەرى ءبىر گول سوعاتىن بولسا, كەلەسى كەزەڭگە ءوتۋ مۇمكىندىكتەرى جوعارىلايدى. ويتكەنى «پيۋنيكتىڭ» قوستانايدا سوققان ءبىر گولى بار. ال «توبىل» گول سوعاتىن بولسا, وندا ءبىزدىڭ كوماندا كەلەسى كەزەڭگە جولداما الادى.
ەكى كوماندا اراسىنداعى ويىننىڭ ءبىرىنشى بولىگى تەڭ ناتيجەمەن اياقتالدى. العاشقى تايم «توبىل» كومانداسىنىڭ ءجيى شابۋىلداپ, قارسىلاس قاقپاعا ءجيى-ءجيى قاۋىپ توندىرۋىمەن ەستە قالدى. دەگەنمەن, تەڭ ەسەپ الاڭ يەلەرىن قاناعاتتاندىرمايتىن بولعان سوڭ, ارمەنيا كومانداسى ەكىنشى تايمدى جوعارى قارقىنمەن باستادى. ماتچتىڭ 82 مينۋتىندا «پيۋنيك» كلۋبى ءوز دەگەندەرىنە جەتتى. «توبىل» ايىپ الاڭىنىڭ الدىنداعى قاربالاس ءساتتى ءتيىمدى پايدالانعان قارسىلاس كوماندانىڭ ويىنشىسى موحامەد كوناتە ەسەپتى اشىپ, كومانداسىن العا شىعارىپ قانا قويماي, ەۋروپا ليگاسىنىڭ ءۇشىنشى كەزەڭىنە الىپ شىقتى.
قاقپاسىنا گول وتكىزىپ العان سوڭ «توبىل» بۇكىل كوماندا بولىپ شابۋىلعا شىققانىمەن, گول سوعا المادى. ەسەپ ماتچ سوڭىنا دەيىن وزگەرىسسىز قالدى. وسىلايشا, سىرت الاڭدا سوققان ءبىر گولدىڭ ارقاسىندا «پيۋنيك» جارىستىڭ كەلەسى كەزەڭىنە ءوتتى.
قوستانايدا وتكەن العاشقى ويىندا «توبىل» 2:1 ەسەبىمەن جەڭىسكە جەتكەن بولاتىن.