مادەنيەت جانە سپورت مينيسترلىگىنىڭ ءباسپاسوز ورتالىعىندا «مۋزەي ءىسىنىڭ ۇزدىكتەرى» اتتى جوبا جۇمىسىنىڭ بارىسى تۋرالى ارنايى بريفينگ ءوتتى. بريفينگ بارىسىندا مادەنيەت جانە سپورت ءمينيسترى ا.مۇحامەدي ۇلىنىڭ باستاماسىمەن «رۋحاني جاڭعىرۋ» باعدارلاماسى اياسىندا ەلىمىزدە تۇڭعىش رەت مۋزەي ءىسى سالاسىنىڭ ماماندارىنا ارنالعان تانىمدىق ەنتسيكلوپەديانى باسپادان شىعارۋ جۇمىستارىن جۇزەگە اسىرۋ تۋرالى ماسەلە قاراستىرىلدى.
«مۋزەي ءىسىنىڭ ۇزدىكتەرى» اتتى جوبا اياسىندا ەلىمىزدە العاش رەت ەكى تىلدە جارىق كورەتىن اتالمىش ەنتسيكلوپەديانىڭ ماتەريالدارىن جيناقتاۋ جۇمىستارىن ۇلتتىق مۋزەي ۇجىمى جۇرگىزەدى. بريفينگكە قاتىسقان ۇلتتىق مۋزەيدىڭ قورلاردى جيناقتاۋ, ەسەپكە الۋ جانە ساقتاۋ قىزمەتىنىڭ جەتەكشىسى, باس قور ساقتاۋشى رىسكۇل بەكتاليەۆا ءوز سوزىندە اتالمىش جوبانىڭ وتە ماڭىزدى جانە جاقسى باستاما ەكەندىگىن ەرەكشە ايتىپ ءوتتى. ال «استانا وپەرا» مۋزەيىنىڭ مەڭگەرۋشىسى اپريزا حۋساينوۆا بۇرىن-سوڭدى ءدال وسىنداي جوبالار جۇزەگە اسپاعاندىعىنا توقتالىپ, ءاردايىم بارلىق ماراپاتتار مەن لايىقتى قۇرمەت كورسەتىلۋدەن مۋزەيلەر مەن كىتاپحانالاردىڭ قىزمەتكەرلەرى تىس قالىپ قوياتىندىعىن دا ءسوز ەتتى. قورىتىندى سوزىندە بۇل ەنتسيكلوپەديا قازاقستانداعى بارلىق مۋزەيلەرگە, جالپى مادەني ۇيىمدارعا تاپتىرماس قۇرال بولاتىندىعىن دا تىلگە تيەك ەتتى. ەنتسيكلوپەديانىڭ تۇساۋكەسەر ءراسىمى جانە ەنتسيكلوپەدياعا ەنگەن ۇزدىك مۋزەي قىزمەتكەرلەرىن ارنايى سالتاناتتى تۇردە ماراپاتتاۋ ءراسىمى ۇلتتىق مۋزەيدە وتەدى. جوبا اۆتورى – ۇلتتىق مۋزەيدىڭ عىلىمي-ادىستەمەلىك قىزمەت باسشىسى, فيلوسوفيا دوكتورى (PhD) سايا اليپوۆا.
باعاشار تۇرسىنباي ۇلى, «ەگەمەن قازاقستان»