پرەمەر-ءمينيستردىڭ ورىنباسارى اسقار جۇماعاليەۆتىڭ توراعالىعىنداعى مەملەكەتتىك قىزمەتتەردى ىرىكتەۋ بويىنشا ۆەدومستۆوارالىق كوميسسيا قر ۇلتتىق قاۋىپسىزدىك كوميتەتىمەن كورسەتىلەتىن مەملەكەتتىك قىزمەتتەردى كورسەتۋ مەرزىمىن قىسقارتۋ جايلى شەشىم قابىلدادى.
ەندى ءۇشىنشى ەلدەرمەن ساۋدا-ساتتىقتا تاريفتىك ەمەس رەتتەۋ شارالارى قولدانىلاتىن اقپاراتتى جاسىرىن الۋعا ارنالعان ارنايى تەحنيكالىق قۇرالداردى اكەلۋگە, اكەتۋگە جانە ولاردىڭ ترانزيتىنە قورىتىندى بەرۋ قۇجاتى بۇرىنعىداي 15 كۇنتىزبەلىك كۇندە ەمەس, 8 جۇمىس كۇنىنەن كەيىن بەرىلەتىن بولادى.
ءۇشىنشى ەلدەرمەن ساۋدا-ساتتىقتا تاريفتىك ەمەس رەتتەۋ شارالارى قولدانىلاتىن شيفرلاۋ (كريپتوگرافيالىق) قۇرالدارىن اكەلۋگە, اكەتۋگە جانە ولاردىڭ ترانزيتىنە قورىتىندى بەرۋ قۇجاتىن بەرۋ مەرزىمى دا 15 كۇنتىزبەلىك كۇننەن 8 جۇمىس كۇنىنە دەيىن قىسقارتىلدى.
شيفرلاۋ (كريپتوگرافيالىق) قۇرالدارىن قامتيتىن تاۋارلاردىڭ سيپاتتاماسى تۋرالى نوتيفيكاتسيالاردى تىركەۋ جۇمىستارى دا ەندى 10 جۇمىس كۇنى ورنىنا 5 جۇمىس كۇنى ىشىندە ورىندالاتىن بولادى.