قىزىلوردا وبلىسىنىڭ قارماقشى اۋدانىنداعى «ارداگەرلەر ءۇيى» عيماراتىنان ورىن بەرىلگەن تاتۋلاسۋ ورتالىعىنا اۋدان اكىمىنىڭ ورىنباسارى ە.مەڭلىباەۆ پەن اۋداندىق سوت سۋدياسى ل.الىبەكوۆا ارنايى كەلىپ جۇمىسىمەن تانىستى.
ەلباسىنىڭ «قازاقستان-2050» ستراتەگياسى قالىپتاسقان مەملەكەتتىڭ جاڭا ساياسي باعىتى» جولداۋىندا قوعامداعى جانجالدى جاعدايدى تومەندەتۋ, داۋلاردى ازايتۋ, بىتىمگەرشىلىك جانە داۋلاردى شەشۋدىڭ باسقا دا بالامالى تاسىلدەرىن ەنگىزۋ ماقساتىندا داۋلاردى سوتتاردان تىس رەتتەۋ ينستيتۋتتارىن دامىتۋدى جالعاستىرۋ ارقىلى تەتىكتەر قاراستىرۋ جونىندە ناقتى تاپسىرمالار بەرىلگەن بولاتىن.
بۇگىندە ەل ىشىندە ءتۇرلى داۋ-دامايلار كوپ. بىرەۋدىڭ تاۋىعى كورشى ءۇيدىڭ اۋلاسىنا كىرىپ كوگەرىشتەرىن مايقانداپ جاتسا ءۇي يەسى اشۋمەن اياعىن سىندىرۋى مۇمكىن. الدەنەگە بولا كەرىسكەن ازاماتتار ءبىر-بىرىنە قول جۇمسايتىن ۋاقىتتار بولادى. ادەيى جاسالعان قىلمىس بولماعاندىقتان ەكى تاراپتى سوتقا سۇيرەۋ ادىلەتتى شەشىمگە جەتكىزە بەرمەيدى. كۇنى ەرتەڭ ءبىر-بىرىنە رەنىشى تارايتىن تاراپتاردى تاتۋلاستىرۋعا بىتىمگەر كەرەك. ورتالىق وسى مىندەتتى موينىنا الىپ وتىر.
باقتيار تايجان,
«ەگەمەن قازاقستان»
قىزىلوردا وبلىسى