بيىل وڭىردە بۇقار جىراۋدىڭ 350, مۇسا شورمانوۆتىڭ 200, ەستاي اقىننىڭ 150 جانە سۇلتانماحمۇت تورايعىروۆتىڭ 125 جىلدىق مەرەيتويلارى اتالىپ وتۋدە.
ال ءماشھۇر ءجۇسىپتىڭ 160 جىلدىعىنا ارنالعان نەگىزگى مادەني-رۋحاني ءىس-شارالار عۇلامانىڭ كەسەنە كەشەنىندە, كيىز ۇيلەر قۇرىلعان ەتنواۋىلدا جانە دالا ساحناسىندا ۇيىمداستىرىلدى. مەرەيتويعا كەلگەن عۇلامانىڭ ۇرپاقتارى, ءوڭىر جۇرتشىلىعى جاڭاجولداعى ەسكەلدى شاتقالىنداعى كەسەنەسىنە كەلىپ, قۇران باعىشتاپ, دۇعا وقىدى. كەسەنە ەلىمىزدىڭ «قاسيەتتى رۋحاني قۇندىلىقتارى» باعدارلاماسى بويىنشا رەسپۋبليكالىق كيەلى ورىندار تىزبەسىنە ەنگەن.
كەسەنە جانىنداعى مەموريالدىق مۋزەيدە ساقتالعان جەكە زاتتارىمەن, كوپتەگەن كونە مۇرالارىمەن تانىستى. كەيبىر عىلىمي ماتەريالدار ۇرپاقتارى قۋاندىق ءجۇسىپوۆ اعامىزدىڭ, نارتاي, لاۋرا, ەستاي جۇسىپوۆتەردىڭ جەكە ارحيۆتەرىندە دە بار كورىنەدى.
باياناۋىل اۋدانىنىڭ اكىمدىگىنىڭ حابارلاۋىنشا, جىل باسىنان بەرى وڭىردەگى كىتاپحانا, مۋزەيلەردە ءماشھۇر بابامىزدىڭ مەرەيتويىنا وراي كوپتەگەن رۋحاني-مادەني شارالار وتكىزىلگەن. وبلىس ورتالىعىنداعى بۇقار جىراۋ اتىنداعى ادەبيەت جانە ونەر مۋزەيىندە «عۇلاما تاعىلىمى» اتتى كورمە ۇيىمداستىرىلدى.
كورمەگە الماتىداعى ورتالىق عىلىمي كىتاپحانا قورىندا ساقتالعان جانە بۇعان دەيىن جەرگىلىكتى مۋزەيلەرىنە قويىلماعان قولجازبالارى, ەسكى كىتاپتارى جانە قازاق زيالىلارىمەن جازىسقان حاتتارىنىڭ تۇپنۇسقالارى, تىرلىگىندە پايدالانعان قۇران كىتابى, قۇندى جادىگەرلەر قويىلدى. مۋزەي قىزمەتكەرلەرى الماتى كىتاپحاناسىندا ساقتالىپ كەلگەن قولجازبالارىنىڭ تسيفرلىق فورماتتاعى نۇسقاسىن الىپ قالعان-دى.
ەندى مىنە, مەرەيتويلىق شارا بارىسىندا عۇلامانىڭ 20 تومدىق شىعارمالار جيناعىنىڭ تسيفرلىق فورماتقا كوشىرىلگەن نۇسقاسىنىڭ تۇساۋكەسەرى ءوتتى. ۇلتتىق عىلىم اكادەمياسىنىڭ قورىنان ءماشھۇر ءجۇسىپتىڭ قۇجاتتارى جەتكىزىلدى. رەسپۋبليكالىق «مادەنيەت» جۋرنالى ءوزىنىڭ تۇتاس ءبىر ءنومىرىن ءماشھۇر جۇسىپكە ارناپتى.
تويعا ارنايى كەلگەن وبلىس اكىمى بولات باقاۋوۆ تاريحشى ادەبيەتشىلەرمەن, ماشھۇرتانۋشىلارمەن, عۇلامانىڭ شىعارماشىلىعىن زەرتتەۋشىلەرمەن كەزدەستى.
ەسكەلدى شاتقالىندا ايتىس اقىندارى ەكى كۇن بويى ايتىستى. ءسوز جارىستىڭ العاشقى اينالىمى جاڭاجول اۋىلىنىڭ مادەنيەت ۇيىندە وتسە, ەكىنشى كۇنى كەسەنەنىڭ قاسىندا جالعاستى. كەسەنە جانىنداعى جاڭاجول اۋىلىندا تۇراتىن تىلەك جۇمكەن ۇلى ايتىس جۇلدەگەرى اتاندى. بۇل دا ءبىر ىرىم ەتەرلىك بەلگى.
توي سوڭى ەتنواۋىل ساحناسىنداعى رەسپۋبليكالىق «كونە عاسىر كۇمبىرى» اتتى جىرشى, تەرمەشىلەر سايىسىنا جالعاستى. ات بايگەسى دە قىزدى. ۇلىلار مەرەيتويلارىنىڭ قورىتىندىسى وبلىس ورتالىعىندا 3-5 تامىز ارالىعىندا وتەتىن « ۇلى دالا ەلى» ەتنوفەستيۆالىندە دە جالعاسىن تابادى.
فاريدا بىقاي
«ەگەمەن قازاقستان»
پاۆلودار وبلىسى
سۋرەتتى تۇسىرگەن: ۆالەري بۋگاەۆ