مۇرات ساعىندىقوۆ – 25 جاستا. اتا-اناسىمەن جانە ەكى باۋىرىمەن 7 جىل بۇرىن وزبەكستاننان كوشىپ كەلگەن. تاشكەنتتەگى اتاقتى فيزيكا-ماتەماتيكا مەكتەبىن ۇزدىك بىتىرگەن تالانتتى تۇلەك تاريحي وتانىندا ءومىر جولىن ەڭبەكتەن باستاۋدى ءجون ساناپتى. اۋەلى ۇلكەن قالاداعى «بەدوباي» اتتى تۇرىك ءدامحاناسىنا ىدىس-اياق جۋشى بولىپ جۇمىسقا ورنالاسادى. ءسويتىپ ءجۇرىپ تۇرىك اسحاناسىنىڭ دونەرشى كاسىبىن جەدەلدەتىپ مەڭگەرىپ الادى.
بۇگىندە الماتىدا ءبىر كۇندە 200-گە دەيىن دونەر-كاۋاپ جاسايتىن ماقتاۋلى مامان. ارينە كەلۋشىلەر سانى قۇبىلىپ تۇراتىنى بار.
– ءتۇس مەزگىلىنەن ءتۇن اۋعانشا ىستىق لەپ ۇرعان ەلەكتر پەشتىڭ تۇبىندە تۇرىپ ءدام دايارلاۋ وڭاي ەمەس. بىراق ەتىم ۇيرەندى, – دەيدى كەيىپكەرىمىز ك ۇلىمسىرەپ.
قاتىرما نانعا سيىر ەتى مەن تاۋىق ەتىن, باسقا دا ون-سان ءتۇرلى دامدەۋىش قوسىپ 3-5 مينۋتتا دايىن بولعان دونەر-كاۋاپتى تۇتىنۋشىعا ۇسىنا قويۋ كەرەك. ەڭبەككە بالا كەزدەن ەتەنە جاقىن مۇراتقا مۇنىڭ قيىندىعى جوق.
الاۋلاعان جاسقا قاتار-قۇربىلارى سەكىلدى كەشكىسىن اسەم الماتىنىڭ دەمالىس ورىندارىن قىدىرۋعا ۋاقىت تاپشى. ءدامحانانىڭ ءوزى دە قالانىڭ قاق ورتاسىندا, كەشكىسىن كەلۋشىلەر كوبەيىپ كەتەدى. قولى-قولىنا جۇقپاي دونەر-كاۋاپ جاساپ بەرۋشى جىگىت ءاربىر جاننىڭ جىلى سوزىنەن, ءىلتيپاتىنان قاناتتانادى.
اپتاسىنا ءبىر-اق كۇن دەمالادى. ايلىعى ورتا ەسەپپەن 200 مىڭ تەڭگە. قالا ماڭىنداعى ۇشقوڭىر اۋىلىنان قاتىنايدى. مۇراتتىڭ شەبەرلىگىنە ءتانتى بولعان قالاداعى بىرقاتار ءدامحانالار ۇسىنىس جاساعان. باس تارتتى. جانىنا جاقىن ءارى جاڭا كاسىپكە دەمەۋشى بولعان «بەدوباي» ءدامحاناسىن قيمادى.
مۇراتتىڭ كوپتەن بەرگى ارمانى – الەمدە ورنىن تاپقان تۇرىكتىڭ دونەر-كاۋابى ستيلىندەگى قازاق تاماعىن ومىرگە اكەلۋ.
«بولاشاقتى جوسپارلاۋ ءوزىم ۇزدىك وقىعان فيزمات مەكتەبىنەن جانە اتا-انامنىڭ تاربيەسىنەن قالىپتاسقان عوي» دەگەن سەنىمدى جاستىڭ جىگەرى مەن تالابىنا ءسۇيسىنىپ, ساتتىلىك تىلەدىك.
تالعات ءسۇيىنباي,
«ەگەمەن قازاقستان»
الماتى