جامبىل وڭىرىندە وتكەن 20 جىل ىشىندە دايىن ءونىم شىعاراتىن 130 ءىرى كاسىپورىن اشىلدى. ءسويتىپ ايماقتىق جالپى ءونىم 11 ەسەگە ءوستى. «تاراز مەتاللۋرگيا زاۋىتى», «اقباقاي تاۋ-كەن مەتاللۋرگيا كومبيناتى» سىندى قۋاتتى كاسىپورىندار بۇگىندە ەلىمىزدىڭ جۇيەقۇراۋشى ءوندىرىس ورتالىقتارى رەتىندە تانىلا باستادى. «جامبىلگيپس», «مىڭارال تاس كومپاني» كاسىپورىندارى وتاندىق قۇرىلىس يندۋسترياسىنىڭ جەتەكشىسىنە اينالدى. ەكى جىلدا يندۋستريالاندىرۋ باعدارلاماسى اياسىندا 16 جوبا ىسكە اسىرىلدى. ونىڭ جالپى قۇنى 80 ملرد. تەڭگە. 3000-نان استام جاڭا جۇمىس ورنى اشىلدى. «قازفوسفات» كاسىپورنىنا زاماناۋي جاڭا تەحنولوگيا ورناتۋ ارقىلى 10 ءتۇرلى ءونىم شىعارىلا باستادى. زاۋىتتى دامىتۋعا جۇمسالاتىن ينۆەستيتسيا كولەمى 120 ملرد. تەڭگەنى قۇرادى.
وبلىستا شاعىن جانە ورتا بيزنەس سالاسى دا قارقىندى دامىپ كەلەدى. تاۋەلسىزدىك مەرەكەسى قارساڭىندا «سۋپەر فارم» كومپانياسى جامبىل اۋدانىنداعى ايشا ءبيبى اۋىلىنان مەديتسينالىق كيىم-كەشەكتەر مەن بۇيىمدار شىعاراتىن كاسىپورىن اشتى.
تاۋەلسىزدىك جىلدارى وبلىستا ونەركاسىپتىڭ مىقتى ىرگەتاسى قالاندى. 20 جىلدا وڭدەۋشى سەكتوردا ءونىمنىڭ كولەمى 16 ەسەگە ۇلعايدى. پوليەتيلەن قۇبىرلار, تسەمەنت, جارىقتاندىرۋ قۇرالدارى بۇعان دەيىن باسقا ەلدەردەن تاسىمالداناتىن بولعان. قازىر ولار ءوز وبلىسىمىزدا شىعارىلادى. جامبىل كاسىپورىندارى شەتەل رىنوگىنا جوعارى ساپالى حيميا ونىمدەرىن وتكەرە باستادى. 2015 جىلى شيكىزاتتىق ەمەس ەكسپورت كولەمىن 36 پايىزعا, ەڭبەك ونىمدىلىگىن 1,5 ەسەگە دەيىن وسىرۋگە قول جەتكىزەمىز. بۇل – وندىرىسكە جاڭا يننوۆاتسيالىق تەحنولوگيالاردى ەنگىزۋ ارقىلى مۇمكىن بولادى. حيميا جانە مەتاللۋرگيا سالاسىندا جاڭا سەرپىنگە قول جەتكىزۋدى جوسپارلاپ وتىرمىز. بۇگىن مەديتسينالىق بۇيىمدار, اتاپ ايتقاندا, توقىلماعان ماتەريالدان جاسالعان بىرجولعى مەديتسينالىق كيىمدەر وندىرەتىن جاڭا زاۋىتتى ىسكە قوسامىز. زاۋىتقا وزىق تەحنولوگيالار قويىلدى. جاڭا زاۋىت ارقىلى ەلىمىزدەگى مەديتسينالىق مەكەمەلەردىڭ قاجەتتىلىكتەرىن تولىق قامتاماسىز ەتەمىز. بۇل زاۋىت تمد ەلدەرى بويىنشا العاشقى زاۋىت بولعاندىقتان, ولاردىڭ رىنوگىندا باسەكەلەستىكتە الدا بولامىز, دەدى وبلىس اكىمى قانات بوزىمباەۆ كاسىپورىننىڭ اشىلۋ سالتاناتىندا.
كوسەمالى ساتتىباي ۇلى,
جامبىل وبلىسى.