شەكارا, شەكاراشى تۋرالى كىتاپ جوقتىڭ قاسى. اسىرەسە ەلىمىز تاۋەلسىزدىك العان سوڭعى 27 جىلدىڭ كولەمىندە تۋعان ەلىنىڭ شەكاراسىن كوزدەرىنىڭ قاراشىعىنداي كۇزەتىپ كەلە جاتقان شەكاراشىلاردىڭ وتان الدىنداعى مىندەتى, جاڭا پاتريوتتاردى تاربيەلەيتىن تىنىس-تىرشىلىكتەرى جايلى ەڭبەك تاپشى دەسەك, ارتىق ايتقاندىق ەمەس.
شەكارا, شەكاراشى تۋرالى سول شەكارانى اداقتاپ, شەكاراشىلاردىڭ اراسىندا ءجيى بولاتىن اسكەري تىلشىلەر جاقسى بىلەدى. سوسىن دا ءوزىنىڭ سانالى عۇمىرىن شەكاراعا ارناپ, سونىڭ جولىندا ءوزىن ايامايتىن, تۋعان وتانىنىڭ قاسيەتتى شەبىن ناعىز جاۋجۇرەك باتىرداي قورعاپ, ايالاپ, ارداقتايتىن بۇگىنگى كۇننىڭ باتىرلارى – ەلىمىزدىڭ شىنايى پاتريوتتارى عانا شەكاراشى جۋرناليستەرگە شابىت سىيلاپ, قالامىنا قۋات بىتىرەدى. سوندىقتان ۇقك شەكارا قىزمەتىنىڭ بايىرعى ءتىلشىسى, زاپاستاعى پودپولكوۆنيك تامارا داۋلەتباەۆانىڭ «شەكارا سوقپاقتارى» اتتى تۋىندىسى ەلىمىزدەگى اسكەري-پاتريوتتىق تاقىرىپتاردا جارىق كورىپ, قالىڭ جۇرتشىلىق جىلى قابىلداپ جاتقان ادەبيەت دارياسىنا تامعان تامشى سەكىلدى.
ەلىمىزدەگى جوعارى ءبىلىم وردالارىنىڭ ىشىندەگى شوقتىعى بيىك ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى اسكەري جۋرناليستەردىڭ قاتارىن تولىقتىرىپ, شەكاراشىلاردىڭ گازەتىندە ءۇزىلىسسىز ەڭبەك ەتىپ كەلە جاتقان تامارا قۋانىشبەكقىزى ءوزىنىڭ بۇل كىتابىندا «مەنىڭ شەكاراشىلارمەن بىرگە قىزمەت جاساسىپ كەلە جاتقانىما 20 جىلدان اسىپ بارادى. وسى جىلدار ىشىندە بايقاعانىم, «شەكارا» – ولار ءۇشىن قاستەرلى, قاسيەتتى. ماسەلەن, ۇيىرىنەن ءۇزىلىپ بولەك, وقشاۋ جۇرەر ەركىن مىنەزدى جىلقىنى قازاقتار «ساياق» دەيدى. ماعان شەكاراشى سول ساياق ارعىماق سەكىلدى بولىپ كورىنىپ تۇرادى. ويتكەنى شەكاراشى ماماندىعىن تاڭداۋ – كەز كەلگەن ادامنىڭ ماڭدايىنا جازىلماعان. مىڭنىڭ ىشىنەن بىرەۋى بولۋى مۇمكىن...», دەپ شەكاراشىلارعا وزگەشە باعا بەرەدى.
وسىنىڭ ءوزى-اق اسكەري ءتىلشىنىڭ شەكاراشىلارعا – ەلىمىزدىڭ جاڭا پاتريوتتارىن تاربيەلەۋ ىسىنە وراسان زور ۇلەس قوسىپ كەلە جاتقان شەكارا ساقشىلارىنا دەگەن كوڭىلىنىڭ الابوتەن ەكەنىن ايقىن بىلدىرگەن. ويتكەنى ءبىزدىڭ ارىپتەسىمىزدىڭ قولىنا قالام الدىرىپ, ادەبي شىعارماسىنىڭ ارقاۋىنا اينالعاندار – جەلدىڭ وتىندە ءومىر ءسۇرىپ كەلە جاتقاندار. سانالى عۇمىرلارىن شەكاراعا ارناعان ساردارلار مەن «وتان قورعاۋشى» ماماندىعىن ەنشىلەگەن جاس وفيتسەرلەر. سوسىن دا سىرتقى كەلبەت-كوركەمدىگى جاعىنان بولسىن, ىشكى ماعىنا-مازمۇنى تۇرعىسىنان دا بۇل كىتاپ شەكاراشىلار ءۇشىن دە, ولاردىڭ ەل شەبىندەگى جاس دوستارى – بولاشاق شەكارا قورعاۋشىلار ءۇشىن دە ەرەكشە باسىلىم بولىپ شىققانى حاق.
اسقار باتىربەكوۆ