ەلورداداعى تاۋەلسىزدىك سارايىندا استانانىڭ 20 جىلدىعىنا وراي مادەنيەت جانە سپورت مينيسترلىگى استانا اكىمدىگى مەن قازاقستان ساۋلەتشىلەر ورتالىعىمەن بىرلەسە ۇيىمداستىرعان حالىقارالىق ساۋلەتشىلەر كونگرەسى ءوتىپ جاتىر.
كونگرەسكە الىس جانە جاقىن شەتەل ساۋلەتشىلەرى, ۇكىمەت پەن بيزنەس وكىلدەرى, ەلىمىزدىڭ بارلىق وبلىستارى مەن استانا, الماتى, شىمكەنت سىندى رەسپۋبليكالىق ماڭىزى بار قالالاردان ساۋلەتشىلەر, دەۆەلوپەرلەر, تەحنولوگيالىق كومپانيالار, جوبالاۋ بيۋرولارى وكىلدەرى, ينجەنەر-جوبالاۋشىلار, جوعارى وقۋ ورىندارىنىڭ ساۋلەت ونەرى فاكۋلتەتىنىڭ ستۋدەنتتەرى, ۋربانيستەر, قازىرگى زامانعى سۋرەتشىلەر قاتىسۋدا.
كونگرەستىڭ سالتاناتتى اشىلۋىندا «استانا Innovations» اق باسقارما توراعاسى ولجاس سارتاەۆ ءوزى باسقارىپ وتىرعان كومپانيانىڭ ەلباسى تاپسىرماسى اياسىنداعى جۇمىستاردى اتقارۋدا الدىڭعى قاتاردا كەلە جاتقانىن ايتا كەلىپ: «2018 جىلدىڭ قاڭتارىندا مەملەكەت باسشىسى نۇرسۇلتان نازارباەۆ حالىققا ارناعان كەزەكتى جولداۋىندا استانا ۇلگىسىندە Smart city ەتالونىن قالىپتاستىرۋ مىندەتىن قويدى. ءوز مەرزىمىندە قويىلعان مىندەت جاڭا تەحنولوگيالاردىڭ جىلدام ەنۋىنە اسەر ەتتى. دامىپ جاتقان ەل ءۇشىن بۇل بۇگىندە ەڭ باستى ترەند بولىپ وتىر. «استانا Innovations» كومپانياسى وسى تاپسىرما توڭىرەگىندەگى جۇمىستاردى اتقارۋدا جەتەكشى ورىنعا شىقتى. يننوۆاتسيانى تۇرعىن ءۇي شارۋاشىلىعى مەن قاۋىپسىزدىكتەن باستاپ الەۋمەتتىك بلوكقا دەيىنگى ءارتۇرلى سالالاردا ەنگىزۋدە ۇلكەن تاجىريبەمىز بار. ال بۇگىن «اقىلدى قالا» جۇيەسىن قۇرۋ تۋرالى ءسوز قوزعاپ وتىرمىز», – دەدى.
سونىمەن بىرگە حالىقارالىق دەڭگەيدە ءوتىپ جاتقان كونگرەستىڭ ماقساتى – كاسىبي تاجىريبە الماسۋ, الەمدىك ساۋلەت ونەرى دامۋىنىڭ كونتسەپتۋالدىق-تەوريالىق باعىتتارىمەن جانە ونىڭ نەگىزگى تەندەنتسيالارىمەن تانىسۋ, قازاقستاندىق جانە شەتەلدىك جەتەكشى ساۋلەتشىلەرمەن شىعارماشىلىق بايلانىستار ورناتۋ, قوعامداعى سانانىڭ اشىقتىعىن قالىپتاستىرۋ, ساۋلەت ونەرىندەگى ۇلتتىق مادەنيەتتىڭ ۇزدىك داستۇرلەرىن ساقتاي وتىرىپ, پروگرەسسيۆتى الەمدىك تاجىريبە مەن ءبىلىمدى قابىلداۋ قابىلەتتىلىگىن قالىپتاستىرۋ ارقىلى زاماناۋي وتاندىق ساۋلەت ونەرىن دامىتۋ ەكەندىگىن جەتكىزدى.
كونگرەسس اياسىندا «قالالىق ورتا: ءداستۇرى مەن كەلەشەگى» تاقىرىبىندا حالىقارالىق عىلىمي-پراكتيكالىق كونفەرەنتسيا وتۋدە. كونفەرەنتسيادا پلەنارلىق وتىرىس جانە «جاڭا قالالار. جاڭا كەلبەت», «الەۋمەتتىك جوبالاۋ. اۋىلدان باستاپ قالاعا دەيىن» اتتى 2 پانەلدىك سەسسيا وتكىزۋ قاراستىرىلعان. سونداي-اق كونگرەسس جۇمىسى شەڭبەرىندە «قۇندىلىقتاردى سينتەزدەۋ. جاھاندىق كونتەكستەگى لوكالدىق سايكەستىك» تاقىرىبىندا «دوڭگەلەك ۇستەل» ءماجىلىسى ۇيىمداستىرىلدى. مۇندا جاس تالاپ ساۋلەتشىلەردى شابىتتاندىرۋ دا ۇمىت قالماعان. جاس ساۋلەتشىلەر, سونىمەن بىرگە ستۋدەنتتەر ستارتاپ ۋيكەند فورماتىندا وتكىزىلەتىن «قالالىق ورتا: «اقىلدى» اۋدان» بايقاۋىنا قاتىستى. كونگرەسس اياسىندا شەبەرلىك ساباقتارى, شەتەلدىك تانىمال ساۋلەتشىلەردىڭ دارىستەرى, «ورتانى قالىپتاستىراتىن كىم؟» تاقىرىبىندا ديالوگ الاڭى دا ۇيىمداستىرىلدى.
حالىقارالىق ساۋلەتشىلەر كونگرەسىن استانادا وتكىزۋدىڭ دە وزىندىك ءمانى بار. بۇگىندە ەلوردانىڭ الەۋەتى, ونىڭ ساياسي, الەۋمەتتىك-مادەني ءومىرىنىڭ قارقىنى, بەيبىتشىلىك جانە كەلىسىم ورتالىعى مارتەبەسى استاناعا تۇرعىنداردىڭ ءارتۇرلى توپتارى مەن الەم ەلدەرىنىڭ كاسىبي جانە ساياسي قاۋىم وكىلدەرىنىڭ نازارىن اۋدارتۋدا. زاماناۋي دۇنيەجۇزىلىك ساۋلەت ونەرىنىڭ الەمدىك ترەندتەرى, ونىڭ ارحيتەكتۋرالىق كەلبەتى ەلوردانىڭ ايشىقتى ەرەكشەلىگى بولىپ تابىلادى, بۇل ءوز كەزەگىندە سەرپىندى دامىپ جاتقان قالانىڭ قايتالانباس اتموسفەراسىن قۇرايدى. البەتتە, بۇل الەمگە ايگىلى ساۋلەتشىلەر مەن ساۋلەت ونەرىنىڭ وتاندىق مايتالماندارىنىڭ شىعارماشىلىعىنداعى ۇندەستىك ناتيجەسى.
«استانادا تۇراقتى دامۋ پرينتسيپتەرىن ەنگىزۋگە ارنالعان مىنانداي باعدارلامالىق قۇجاتتار جۇزەگە اسىرىلىپ جاتىر: استانانىڭ 2020 جىلعا دەيىنگى باعدارلاماسى; تۇراقتى دامۋدىڭ 17 ماقساتى ايقىندالعان بۇۇ باعدارلاماسى, ونىڭ التاۋى استاناعا سايكەس كەلەدى; سونداي-اق ەسدۇ ستاندارتتارى بار. وسى قۇجاتتاردىڭ ءبارى استانانى دامىتۋ ءۇشىن انىقتالعان 20 قادامدى باعدارلامانى قۇرۋدا نەگىزگى پلاتفورما بولىپ وتىر», – دەدى «استانا Innovations» اق باسقارما توراعاسى. سونداي-اق ول يننوۆاتسيانى ەنگىزۋدە تۇراقتى دامۋ پرينتسيپتەرى, جاسىل تەحنولوگيا, ۋربانيستيكا, سمارت جوسپارلاۋ سەكىلدى ماڭىزدى ەلەمەنتتەردى قولدانباي, قاجەتتى تابىسقا جەتۋ مۇمكىن ەمەس ەكەنىن اتاپ ءوتتى.
كونگرەسس بارىسىندا ارىپتەستىك تۋرالى مەموراندۋمعا قول قويىلدى. مەموراندۋم ارىپتەستىكتىڭ ىشىندە نەگىزىنەن مەملەكەتتىك ساياسات پەن استانانىڭ يندۋستريالىق-يننوۆاتسيالىق دامۋى سالاسىنا باعىتتالعان. «Astana Innovations» اق پەن دەنساۋلىق ساقتاۋ مينيسترلىگى, ءبىلىم جانە عىلىم مينيسترلىگى, ەڭبەك جانە حالىقتى الەۋمەتتىك قورعاۋ مينيسترلىگى, سونىمەن قاتار, «تەحنولوگيالىق دامۋ جونىندەگى ۇلتتىق اگەنتتىك» اق اراسىندا 4 مەموراندۋمعا قول قويىلدى.
قاتارىنان 4 كۇنگە جوسپارلانعان ايتۋلى جيىن بۇگىن ءوز جۇمىسىن اياقتايدى.
ۇلاربەك نۇرعالىم ۇلى,
«ەگەمەن قازاقستان»