ەلباسى «پاۆلودار مۇناي حيمياسى زاۋىتى» جاۋاپكەرشىلىگى شەكتەۋلى سەرىكتەستىگىنە باردى
مەملەكەت باسشىسى پاۆلودار وبلىسىنا جۇمىس ساپارى بارىسىندا قازاقستاندى يندۋستريالاندىرۋ كارتاسى اياسىندا تۇبەگەيلى جاڭارتىلعان ءارى ءوندىرىس ۇدەرىسى تسيفرلاندىرىلعان پاۆلودار مۇناي حيمياسى زاۋىتىنىڭ جۇمىسىمەن تانىستى.
قازاقستان پرەزيدەنتىنە جاڭارتۋ جۇمىستارى زاۋىتتىڭ شيكى مۇنايدى قايتا وڭدەۋ ونىمدىلىگىن ارتتىرۋعا, ءونىم ساپاسىن ك-4 جانە ك-5 ستاندارتتارىنا دەيىن جەتكىزۋگە مۇمكىندىك بەرگەنى جونىندە مالىمدەلدى. يزومەريزاتسيالاۋدىڭ جاڭا اۆتوماتتاندىرىلعان كەشەندەرى جانە ورتالىق باسقارۋ پۋنكتى ارقىلى باسقارىلاتىن كۇكىرت وندىرەتىن قوندىرعىلار سالىندى.
نۇرسۇلتان نازارباەۆ قازاقستاندا مۇناي ءوندىرۋ كولەمىنىڭ ارتۋىنا بايلانىستى دايىن ءونىم كولەمىن مولايتۋ ءۇشىن ءارى ونى ىشكى جانە شەتەلدىك نارىقتارعا شىعارۋ ءۇشىن حالىقارالىق ستاندارتتارعا ساي كەلەتىن مۇنايدىڭ قايتا وڭدەلۋىن مەيلىنشە جاقسارتۋدى قولعا الۋ قاجەتتىگىن ايتتى.
ەلباسى قازاقستانداعى مۇناي وڭدەيتىن ءۇش زاۋىتتىڭ جاڭارتىلعانىنا قاراماستان, ءتورتىنشى زاۋىت سالۋ قاجەتتىگى تۋىنداپ وتىرعانىن اتاپ ءوتتى.
قازاقستان پرەزيدەنتى زاۋىتتىڭ جاس جۇمىسشىلارىمەن اڭگىمەلەسۋ بارىسىندا پاۆلودار مۇناي حيمياسى زاۋىتى كەڭەس وداعى كەزىندە سالىنعان زاۋىتتاردىڭ سوڭعىسى ەكەنىن ايتىپ, ونىڭ سول ۋاقىتتاعى ەڭ وزىق قۇرال-جابدىقتارمەن جابدىقتالعانىنا توقتالدى.
– سىزدەر ەڭ زاماناۋي زاۋىتتا جۇمىس ىستەيسىزدەر. مۇندا ءوندىرىستى تسيفرلاندىرۋ ءىسى قولعا الىنىپ, جاڭا تەحنولوگيالار ەنگىزىلۋدە. سىزدەر ءوندىرىپ جاتقان ونىمگە دەگەن سۇرانىس ارتىپ كەلەدى, دەمەك, سىزدەردىڭ دە تابىستارىڭىز مولايا تۇسپەك, – دەدى نۇرسۇلتان نازارباەۆ.
جاس ماماندار مەملەكەت باسشىسىنا «بولاشاق» باعدارلاماسى ارقىلى الەمنىڭ ۇزدىك جوعارى وقۋ ورىندارىندا ءبىلىم الۋعا جانە العان بىلىمدەرىن وندىرىستە قولدانۋعا مۇمكىندىك تۋعىزعانى ءۇشىن العىس ايتتى.