ۇلتتىق تەننيس ورتالىعىندا «پرەزيدەنت كۋبوگى – 2018» جارىسى باستالدى. جىل سايىن وتەتىن ءداستۇرلى تەننيس دوداسى استانا قالاسىندا 22-شىلدەگە دەيىن جالعاسادى. بيىلعى باسەكەنىڭ جۇلدە قورى 205 مىڭ اقش دوللارىن قۇراپ وتىر.
تۋرنيرگە 30 ەلدەن كەلگەن 100 تەننيسشى قاتىسادى. ولاردىڭ ىشىندە الەمدىك رەيتينگكتە توپ 100 قاتارىنا ەنەتىن سپورتشىلار دا بار. ال قازاقستان اتىنان سايىسقا تيمۋر حابيبۋللين, دەنيس ەۆسەەۆ, رومان حاسانوۆ, گوزەل اينەتدينوۆا, اننا دانيلينا جانە جىبەك قۇلامباەۆالار تۇسەدى. جارىسقا قاتىسىپ باستاعان دميتري پوپكو بولسا جاراقاتىنا بايلانىستى بەلورۋس دميتري جيرمونتقا قارسى كەزدەسۋگە شىعا المادى.
ءداستۇرلى جارىس الدىندا قازاقستان تەننيس فەدەراتسياسىنىڭ ۆيتسە-پرەزيدەنتى دياس دوسقاراەۆتىڭ دا پىكىرىن بىلە كەتتىك.
- وزدەرىڭىز بايقاعانداي, بۇل جولى جارىسىمىزدىڭ جۇلدە قورى كوبەيىپ وتىر. مىقتى تەننيسشىلەردى شاقىرىپ, جوعارعى دەڭگەيدەگى تەننيس سايىسىن ۇيىمداستىرۋ ءۇشىن وسىنداي قادامدارعا بارىپ وتىرمىز. «پرەزيدەنت كۋبوگى» جارىسى جىل سايىن دامىپ كەلەدى. تۇبىندە ءبىز بۇل جارىستى اتر TOUR ساناتىنا كىرگىزىپ, ابىرويىن ودان ءارى كوتەرمەكشىمىز. سول ءۇشىن دە قازىردەن باستاپ ارەكەت جاساۋدامىز. ال دميتري پوپكوعا كەلەتىن بولساق, ونىڭ جاراقاتى بۇرىننان مەڭدەپ جۇرگەن. ءتىپتى ول حورۆاتيا – قازاقستان كەزدەۋى كەزىندە دە جاراقاتى بولعان. ەندى وعان وتا جاسالىپ, ءبىرشاما ۋاقىت ەمدەلۋى ءتيىس.
ەرمۇحامەد ماۋلەن,
«ەگەمەن قازاقستان»