بەلارۋس ەلىنىڭ ۆيتەبسك قالاسىندا بالالاردىڭ ءداستۇرلى مۋزىكالىق «سلاۆيان بازارى» فەستيۆالى اياقتالدى. الىس-جاقىن 20 ەلدىڭ جاس ونەرپازدارى قاتىسقان بايقاۋدا جەتىسۋلىق ابىلقايىر جۇلدەلى 3-ورىنعا يە بولدى.
ابىلقايىر جۇمابايدىڭ جاسى جەتىدە. ول الماتىنىڭ ىرگەسىندەگى قاسكەلەڭ قالاسىندا تۇرادى. اياعىن اپىل-تاپىل باسقاننان باستاپ ءان شىرقاۋى اڭسارى اۋعان ەكەن. قازىر اۋداندىق مادەنيەت ءۇيى جانىنداعى مۋزىكا ۇيىرمەسىندە انشىلىكتىڭ قىر-سىرىن مەڭگەرىپ ءجۇر. ابىلقايىردى انشىلىككە باۋلىپ جۇرگەن ۇستازى قالبۇبى ابدوللاەۆا شاكىرتىنىڭ بولاشاعىنان ءۇمىتتى. قارشاداي ۇلدى الەمگە تانىمال ءان بايقاۋىنا اتاندىرىپ تۇرعاندا سەنىمى الداماپتى.
ابىلقايىر ۆيتەبسكدەگى بايقاۋدىڭ العاشقى كۇنى قازاقتىڭ حالىق ءانى «قاراعىم-ايدى» ناشىنە كەلتىرىپ شىرقاپ, قازىلاردىڭ جوعارعى باعاسىنا يە بولدى. ۇلكەن ساحنادان شىرقاعان ەكىنشى ءانى دە «قۇلاققا كىرىپ, بويدى الدى». ول – يتاليالىقتاردىڭ «مەلودراما» اتتى تۋىندىسى ەكەن.
بيىلعى «سلاۆيان بازارىندا» ءان شىرقاعان جاس تالانتتاردىڭ ونەرىن باعالاۋشىلار اراسىندا ديماش قۇدايبەرگەن دە بولدى. ءدۇيىم دۇنيەنى اۋزىنا قاراتقان قازاق ءانشىسى قاسكەلەڭنەن شىققان قوڭىر ءۇندى بالاقايعا ءدان ريزا بولىپتى. ابىلقايىر دا نامىسقا تىرىسىپ, جەر-جەردەن جينالعان 20 جەتكىنشەكتىڭ اراسىنان توپ جارىپ, ءۇشىنشى ورىننان كورىندى. ال بايقاۋدىڭ گران-ءپرينى ۋكراين بالاسى الەكساندر بالابانوۆقا بۇيىردى.
قالماحانبەت مۇقامەتقالي, «ەگەمەن قازاقستان»